Mapa stanu frontu pa stanie na 1 kastryčnika pavodle «Rybaria». Rasijskija vojski bjucca za kalidor ad Limana da Kramiannoj
«U samim horadzie Liman zastajecca nie taki vialiki kantynhient abarončaha harnizona: usie vojski raśsiarodžanyja ŭzdoŭž darohi Liman — Zarečnaje — Torskaje i na ŭskrainach Limana, Jampala i Staŭkoŭ», — piša rasijski frantavy błohier «Rybaŕ», rychtujučy hramadskuju dumku da pakidańnia Limana.
Ci ŭdasca rasijskim vojskam prarvacca ź limanskaha atačeńnia, ci častka ich trapić ŭ pałon? Paviedamleńni z frontu pakul supiarečlivyja.
«Bataljon «BARS» adviedzieny z Drobyšava ŭ rajon Kramiannoj. Chłopcy žyvyja», — paviedamlaje rasijski prapahandyst WarGonzo.
«U Limanie mnoha što nie tak, jak zdajecca. Da pazityvu daloka», — paviedamlaje «Sładkov+».
«Niezaležna ad taho, čym skončycca limanskaja epapieja, chłopcy navat nie ŭjaŭlajuć da kanca, što jany zrabili. Ukrainie patrebny byŭ temp, treba było łavić momant paśla Charkaŭskaha nastupu i cisnuć nas na ŭsich napramkach. Jany byli na kuražy, u ich byŭ resurs, całkam realistyčnyja płany, inicyjatyva … ale sutyknulisia z supracivam u Limanie i zaviaźli, — suciašaje rasijski kamandzir Alaksandr Chadakoŭski. — Navat kali harnizon Limana padzie — svaju zvyšzadaču jon vykanaŭ».
29 vieraśnia ŭkrainskija vojski ŭziali Jampal i Staŭki, tym samym praktyčna zamknuli koła akružeńnia vakoł Limana, jaki ŭtrymlivajuć niekalki tysiač rasijskich vajskoŭcaŭ.
Unačy z 29 na 30 vieraśnia rasijski harnizon Drobyšava adstupiŭ u bok Limana. Paviedamlałasia, što ŭkrainskija vojski prastrelvajuć darohi Liman — Svatava i Liman — Kramiannaja.
30 vieraśnia źjavilisia paviedamleńni pra toje, što rasijskaje kamandavańnie kinuła reziervy, kab prarvać atačeńnie Limana. Pavodle infarmacyi rasijskich błohieraŭ, pad Kramiannuju pierakinuli «vahnieraŭcaŭ» z-pad Bachmuta i častki Paŭdniovaj vajskovaj akruhi. Iduć bai, pra ich vynik pakul nie paviedamlajecca.
U miascovych čatach pišuć, što, u pryvatnaści, praciahvajucca bai za Torskaje — pasiołak na darozie Liman — Kramiannaja.
Ukrainskaje kamandavańnie nie paviedamlaje pra vyzvaleńnie nasielenych punktaŭ, pakul nie dasiahaje praciahłaha i ŭstojlivaha kantrolu nad imi.
Liman — horad na poŭnač ad levaha bieraha Sievierskaha Danca. Da vajny ŭ im žyło kala 22 tysiač čałaviek. Rasijskija vojski zaniali jaho 29 maja, paśla bajoŭ.
Paŭnočniej ukraincy stvaryli šmatlikija płacdarmy na levym bierazie raki Askoł i nastupajuć ad Łazavoj, Kupianska dy Dvurečnaj u kirunku Baravoj i Svatava.
Svatava — rajcentr na poŭnačy Łuhanskaj vobłaści, da vajny ŭ im žyło 16 tysiač čałaviek. Rasijskija vojski akupavali horad 6 sakavika, na 11-y dzień vajny.
Vyzvaleńnie Svatava mieła b jak stratehičnyja, tak i maralnyja nastupstvy. Heta byŭ by pieršy vyzvaleny rajcentr Łuhanskaj vobłaści, jakaja na siońnia amal całkam kantralujecca rasijskimi vojskami.
U vyniku imklivaha nastupu 5—10 vieraśnia ŭkrainskaja armija vyzvaliła Bałakleju, Kupiansk, Izium i Vaŭčansk, a rasijskija złučeńni chaatyčna adstupili na levyja bierahi rek Sievierski Daniec i Askoł. U vyniku rasijanam nie ŭdałosia stvaryć nadziejnaj linii abarony pa hetych rekach, jak jany spadziavalisia, ale i ŭkrainskaja armija nie zaniała z nalotu Liman i Svatava.
Bai roznaj intensiŭnaści na podstupach da hetych haradoŭ praciahvajucca ŭžo amal dva tydni.
Adnačasova rasijskija błohiery i kamandzir Alaksandr Chadakoŭski paviedamili, što rasijskija vojski pakinuli raniej zachoplenyja pazicyi ŭ Marjincy i Piaskach pad Danieckam.
U toj ža čas pad Chiersonam i Zaparožžam praciahvajucca pazicyjnyja bai, linija frontu nie mianiajecca.
Vyhladaje, što reziervy rasijskaha kamandavańnia vyčarpalisia, i spadziavacca Rasii zastajecca tolki na novych mabilizavanych. Ale i Ukraina pakul nie maje dastatkova reziervaŭ i avijacyi, kab stvarać vialikija katły, i abmiažoŭvajecca pavolnym prasoŭvańniem.
