Jaho viedali pad nikam «Lediaj». Na erzia heta aznačaje «žniec».
31-hadovy Alaksiej Vieščavajłaŭ byŭ sałdatam-navodčykam 1-j internacyjanalnaj roty 517-ha bataljona 1-j asobnaj bryhady śpiecyjalnaha pryznačeńnia imia Ivana Bohuna Uzbrojenych sił Ukrainy.
Pieršy raz Alaksiej uziaŭ u ruki zbroju paśla napadu Rasii na Ukrainu ŭ 2014 hodzie. Ën ustupiŭ u 72-ju asobnuju miechanizavanuju bryhadu imia Čornych zaparožcaŭ i pravajavaŭ dva hady.
Paśla zaviaršeńnia kantraktu jon viarnuŭsia da žonki ŭ Biełaruś, dzie jaho asudzili na 2 hady turmy za ŭdzieł va ŭzbrojenym kanflikcie biez dazvołu ŭładaŭ. U lutym 2022 hoda Vieščavajłaŭ iznoŭ pajechaŭ va Ukrainu zmahacca suprać rasijskich zachopnikaŭ.
Alaksiej vajavaŭ u pałku «Pahonia» i zahinuŭ u bai pad Družkaŭkaju, što kala Bachmuta — adzinym kirunku, dzie ruskija praciahvajuć nasiadać.
Pabracimy bajca raskazali «Našaj Nivie», što mina prylacieła ŭ akop Vieščavajłava. Jon zahinuŭ na miescy. Jaho sasłužyŭca lohka paraniła.
Alaksieja charaktaryzujuć jak daśviedčanaha bajca, humarysta, dušu kampanii.
Alaksiej Vieščavajłaŭ na froncie. Fota telehram-kanała Vandy
Rada starejšyn erzianskaha naroda nazvała Alaksieja Vieščavajłava erzianskim nacyjanalistam, «jaki pryjechaŭ u Ukrainu, kab dapamahčy hetaj svabodalubnaj nacyi ŭ baraćbie z rasiejskim ahresaram».
«Pryzyŭny znak Toramy vyryvaje našaha brata z pola boju — Inieškipaz zabiraje jaho ŭ Jabłyčnyja Sady. Tudy, dzie Ciušcia vaładaryć z našymi prodkami», — paetyčna piša pra zahinułaha erzianski telehram-kanał Vandy.
Čaściej za ŭsio biełarusy nie viedajuć naroda erzia, bo bolš pašyranaja ŭ nas nazva, u adpaviednaści z rasijskaj tradycyjaj — mardva. Ale nasamreč takoha naroda niama, u jahony skład davoli štučna ŭklučanyja dva asobnyja, choć i blizkija narody — erzia i mokša. Sami ich pradstaŭniki vyraznaje adroźnieńnie adnych ad druhich pravodziać. Razam erzia i mokšy kala miljona, kožnaha pryblizna pa pałovie. Ale ŭ vyniku šmatviakovaj kałanizacyi i asimilacyi jany mocna raściarušanyja pa ŭsim Pavołžy, a ŭ samoj Mardovii karennyja narody składajuć tolki 33 pracenty nasielnictva.
«Lediaj» mieŭ jechać delehatam na Erzianski nacyjanalny źjezd, jaki adkryvajecca 30 vieraśnia ŭ Estonii. Ale ŭžo nie zmoža.
Abaraniaŭ Bachmut, mina prylacieła ŭ akop — jak zahinuŭ dabraachvotnik pałka «Pahonia»
