Karta frontu pad Limanam pa viersii «Rybaria» pa stanie na 27 vieraśnia
Niama dobrych navin dla Pucina i Łukašenki: ukrainskaja armija praciahvaje nastup u Danieckaj vobłaści.
Miarkujučy pa paviedamleńniach rasijskich frantavych błohieraŭ, Liman rasijskim vojskam utrymać naŭrad ci ŭdasca. Ukrainskija vojski pavoli prasoŭvajucca jak na poŭnač, tak i na ŭschod ad jaho, što stvaryła pahrozu poŭnaha akružeńnia.
«Na ŭschod ad Limana padraździaleńni USU naviali niekalki pantonnych pierapraŭ pamiž Kryvoj Łukaj i Biełahoraŭkaj, stvaryli płacdarm na paŭnočnym bierazie Sievierskaha Danca, pierakinuli na płacdarm techniku i pačali padrychtoŭku da aktyŭnaha nastupu na pazicyi sajuznych sił na hetym učastku, — piša infarmavany rasijski błohier «Rybaŕ». — Mabilnyja raźviedvalnyja hrupy praciŭnika na lohkaj braniavanaj technicy praviali raźviedku bojem pazicyj US RF u Jampali, Torskim. Daroha Kramiannaja—Liman prastrelvajecca i niebiaśpiečnaja».
Zvyčajna rasijskija šavinistyčnyja błohiery malujuć situacyju trochi lepšaj, čym jana jość u realnaści. Tak, pierapravy pad Biełahoraŭkaj źjavilisia davoli daŭno. Ukrainskija vojski prasoŭvajucca pavolna, ale mietadyčna, kab minimizavać straty va ŭmovach, kali jany nie mohuć maryć pra pieravahu ŭ pavietry.
Siońnia ž ułady Charkaŭskaj vobłaści paviedamili, što ŭkrainskija vojski ŭstanavili kantrol nad nasielenymi punktami Kupiansk-Vuzłavaja, Pietrapaŭłaŭka i Kučaroŭka na levym bierazie Askoła.
Ukrainskaja armija nie paviedamlaje pra vyzvaleńnie nasielenych punktaŭ, pakul nie praviedzienaja ich začystka ad praciŭnika i pravierka.
Ukraincy stvaryli šmatlikija płacdarmy na levym bierazie rek Sievierski Daniec i Askoł, u tym liku ŭ Kupiansku i Siańkovie, što daje im vialiki vybar kirunkaŭ nastupu, kančatkovaj metaj jakoha bačycca Svatava. Svatava — rajcentr na poŭnačy Łuhanskaj vobłaści, da vajny ŭ im žyło 16 tysiač čałaviek. Rasijskija vojski akupavali horad 6 sakavika, na 11-y dzień vajny.
Vyzvaleńnie Svatava mieła b jak stratehičnyja, tak i maralnyja nastupstvy.
Heta byŭ by pieršy vyzvaleny rajcentr Łuhanskaj vobłaści, jakaja na siońnia amal całkam kantralujecca rasijskimi vojskami.
Zachop Svatava, važnaha čyhunačnaha centra, aznačaŭ by taksama apieratyŭnaje akružeńnie horada Liman pa vialikim kole. Liman trymaje vialikaja rasijskaja hrupoŭka.
U vyniku imklivaha nastupu 5—10 vieraśnia ŭkrainskaja armija vyzvaliła Bałakleju, Kupiansk, Izium i Vaŭčansk, a rasijskija złučeńni chaatyčna adstupili na levyja bierahi rek Sievierski Daniec i Askoł. U vyniku rasijanam nie ŭdałosia stvaryć nadziejnaj linii abarony pa hetych rekach, jak jany spadziavalisia, ale i ŭkrainskaja armija nie zaniała z nalotu Liman i Svatava. Bai roznaj intensiŭnaści na podstupach da hetych haradkoŭ praciahvajucca ŭžo amal dva tydni.
Miarkujučy pa paviedamleńniach z dvuch bakoŭ, ukrainskija vojski prasunulisia na levym bierazie Sievierskaha Danca i Askoła na 5—20 kiłamietraŭ u piaci-šaści kirunkach adnačasova. Ukrainski płacdarm na levym bierazie Sievierskaha Danca ŭ rajonie Śviatahorska i Iziuma razrośsia da bolš jak paŭtysiačy kvadratnych kiłamietraŭ.
Kamandavańnie Uzbrojenych sił Rasii kidaje ŭ boj reziervy z metaj skavać čaści ŭkrainskich vojskaŭ i źnizić tempy ich prasoŭvańnia, vyjhraŭšy čas dla stvareńnia sucelnaj linii abarony i stabilizacyi situacyi na froncie. Vyhladaje, što hetych reziervaŭ mała.
