Piacirazovy najlepšy futbalist čempijanata Biełarusi i dzieviacirazovy čempijon krainy zaraz pieražyvaje nie najlepšyja časy. 36-hadovy Ihar Stasievič užo paru miesiacaŭ znachodzicca ŭ statusie biespracoŭnaha, ale, vidać, usio jašče spadziajecca pahulać. Prynamsi ab namiery zaviaršyć karjeru ad samoha paŭabaroncy nie čuvać, chaj sabie jon usio čaściej śviecicca ŭ aktyŭnaściach, dalokich ad sportu — naprykład, razam z žonkaj pravodzić fotasiesii ŭ vańnie.
Adnak, jak stała viadoma «Trybunie», Stasievič miesiac tamu ledź nie viarnuŭsia ŭ čempijanat Biełarusi. Pryčym nie kudy-niebudź, a ŭ minskaje «Dynama», za jakoje vystupaŭ z 2012-ha pa 2014-j hady. Ale ździełka sarvałasia ŭ apošni momant — pa inicyjatyvie tak zvanaha ministra sportu Siarhieja Kavalčuka, jaki, što cikava, užo navat źmiakčyŭ svaju kateharyčnuju pazicyju pa nie samym dobranadziejnym u ideałahičnym płanie futbalistu.
«Trybuna» daviedałasia padrabiaznaści.
Jak pravodzić hety hod?
Paśla sychodu z BATE ŭ 2020-m karjera jašče niadaŭna top-hulca pačała imkliva skočvacca. Stasievič nie zachacieŭ iści na panižeńnie zarobku ŭ rodnym kłubie i adpraviŭsia ŭ bahaty Salihorsk. Ale kali ŭ finansavym płanie ŭ «Šachciory» usio było ŭ adnosnym paradku, to ŭ astatnim — prosta kašmar. Chaj u siezonie paŭabaronca zhulaŭ u 32 matčach va ŭsich turnirach (71 chvilina ŭ siarednim na poli), ale statystyka pry hetym atrymałasia hniatlivaja: usiaho try hały i čatyry «asisty». Mienš za 10 bałaŭ za hod Stasievič nabiraŭ da hetaha ažno ŭ 2013-m.
Siezon u Salihorsku zapomniŭsia jašče kanfliktam z hałoŭnym trenieram Siarhiejem Hurenkam. Pa roznych śviedčańniach, Stasievič byŭ adnym z hałoŭnych niezadavolenych prapanavanymi śpiecyjalistam nahruzkami. Z-za sproby buntu Ihar na miesiac vypaŭ sa składu «harniakoŭ».
Pry źmienščyku Hurenki Alaksiei Bahu Stasievič akryjaŭ i tolki ŭ adnym matčy nie vyjšaŭ ź pieršych chvilin. Ale paśla zakančeńnia čempijanata kłub raźvitaŭsia z trenieram, jaki zdoleŭ z «harniakami» uziać čarhovaje čempijonstva, a nieŭzabavie paśla hetaha z Salihorska źjechaŭ i paŭabaronca. Stasievič (jak i jašče adzin ciapier biespracoŭny futbalist Alaksandr Hutar) nie zachacieŭ iści na istotnaje panižeńnie zarobku, vyklikanaje ŭviedzienym fiederacyjaj limitam.
Biez kłuba futbalist prasiadzieŭ da 22 lutaha 2022 hoda. Za dva dni da pačatku vajny va Ukrainie Stasievič padpisaŭ damovu z «Čajkaj» z rasijskaj Futbolnaj nacyjanalnaj lihi, jakoj na toj momant kiravaŭ Siarhiej Tašujeŭ. Ale niešta ŭ Ihara nie skłałasia ŭ Rastoŭskaj vobłaści. Ni pry Tašujevie, ni pry Siarhiei Čarankovie, jaki źmianiŭ kalehu ŭ kancy sakavika, biełarus nie bliščeŭ. Za niekalki miesiacaŭ paŭabaronca vyjšaŭ na pole tolki ŭ 12 matčach va ŭsich turnirach (u siarednim 70 chvilin na poli) i nabraŭ usiaho čatyry bały. Pryčym u aktyvie — nivodnaha hoła, a tolki «asisty». Choć, varta pryznać, niekatoryja pasy byli pa-sapraŭdnamu pryhožyja (tolki voś partniory nie karystalisia imi).
U kancy siezona Stasievič atrymaŭ traŭmu, z-za čaho prapuściŭ zaklučnuju častku čempijanatu. A ŭ červieni 2022-ha pa zakančeńni termina kantraktu pakinuŭ «Čajku».
Amal viarnuŭsia ŭ čempijanat Biełarusi, ale nie dakazaŭ svaju «patryjatyčnaść»
Paśla adjezdu z Rasii Stasievič niekatory čas znachodziŭsia ŭ statusie biespracoŭnaha, ale kali adčyniłasia tranśfiernaje akno ŭ Biełarusi, ledź znoŭ nie apynuŭsia siarod hulcoŭ Čempijanata Biełarusi. Pavodle našaj infarmacyi, u pasłuhach paŭabaroncy było zacikaŭlenaje «Tarpieda-BiełAZ», ale da kankretnaj prapanovy sprava nie dajšła. A voś inšy kłub, kudy ŚMI pieryjadyčna adpraŭlali Stasieviča, akazaŭsia bolš nastojlivym. Havorka pra minskaje «Dynama». Praŭda, sprava ŭskładniałasia tym, što Stasievič jašče paśla padziejaŭ 2020-ha trapiŭ u tak zvany čorny śpis futbalistaŭ i staŭ «niepažadanym» dla spartyŭnych čynoŭnikaŭ.
Reč u tym, što ŭ žniŭni 2020 hoda Ihar razam z adnakłubnikami pa BATE adkryta padtrymaŭ napadajučaha barysaŭčan Antona Saroku, jaki byŭ zatrymany praz try dni paśla vybaraŭ i adpraŭleny na siem sutak aryštu, ale vyjšaŭ daterminova na «chvali» vyzvaleńniaŭ. A ŭ listapadzie 2020-ha hulec vystaviŭ na dabračynny aŭkcyjon futbołku zbornaj Biełarusi sa svaim aŭtohrafam. Atrymanyja srodki pajšli ŭ Biełaruski fond spartyŭnaj salidarnaści. Łot z majkaj Stasieviča vykupili za 2750 dołaraŭ.
I niachaj paŭabaronca nie pryniaŭ udzieł u zapisie rolika, u jakim biełaruskija futbalisty asudzili hvałt z boku režymu Łukašenki, ale ŭ śpis tych, kaho niepažadana bačyć u ajčynnym futbole, Ihar usio roŭna patrapiŭ.
Varta adznačyć, što paśla sychodu z «Šachciora» Stasievič niekatory čas treniravaŭsia z dublem BATE, žurnalist Mikałaj Ivanoŭ tady pisaŭ, što «žoŭta-sinija» razam z minskim «Dynama» «chacieli padpisać hulca, ale pierachod u hetyja kłuby zaraz niemahčymy». Uładzisłaŭ Tatur u toj ža čas paviedamlaŭ, što najbolš vierahodnym varyjantam praciahu karjery futbalista było «Tarpieda-BiełAZ», u trenierskim štabie jakoha poŭna znajomych ludziej». Ale padpisańnie ź biełaruskimi kłubami akazałasia niemahčymym — znoŭ ža z-za śpisu niepažadanych i asabistaj zabarony Kavalčuka.
Tym nie mienš, minułym letam Stasievič byŭ blizki da viartańnia ŭ ČB, pryčym u padkantrolnaje «ministru» «Dynama». Pavodle infarmacyi «Trybuny», krychu bolš za miesiac tamu kiraŭnictva «bieła-błakitnych» źviarnułasia da čynoŭnika z prośbaj usio ž źmiakčyć pazicyju pa hulcu i dazvolić jamu padpisać kantrakt z «Dynama». Kavalčuk niekatory čas padumaŭ i daŭ dabro, ale pry adnoj umovie — Stasievič pavinien zapisać takoje ž videa, jakoje zapisaŭ inšy hulec minskaha kalektyvu Alaksandr Sačyŭka. Heta značyć, pa sutnaści, publična zajavić svaju svaju patryjatyčnaść u najhoršym łukašysckim značeńni, z pafasam raskazać pra toje, jak jon hanarycca «stajać na poli i słuchać himn RB, nazirać za čyrvona-zialonym ściaham, jaki raźviavajecca». Dy i ŭvohule pryznać, što ŭłady prykładajuć kałasalnyja namahańni dla raźvićcia sportu ŭ krainie i heta daje značnyja vyniki.
36-hadovy Stasievič, jaki ŭsio jašče nie žadaje zakančvać karjeru, pahadziŭsia na hetyja ŭmovy. Dalej za spravu ŭziaŭsia Kavalčuk. Čynoŭnik asabista napisaŭ scenar rolika, pryčym, pavodle našaj infarmacyi, śpič atrymaŭsia jašče bolš «patryjatyčnym» i pafasnym, čym u Sačyŭki. Vynikovaje videa było zahadana dasłać u Minsporta na ŭzhadnieńnie.
U pačatku žniŭnia videa było zroblena, a rolik, jak i naležyć, nakiravali Kavalčuku. Ale tak zvany ministr zaŭvažyŭ niedazvalalnyja, na jaho dumku, rečy: jak akazałasia, Stasievič prajaviŭ inicyjatyvu i zamianiŭ niekalki fraz u padrychtavanym dla jaho śpičy. Pra jakija mienavita abaroty idzie havorka, nam, na žal, daviedacca nie ŭdałosia. Adnak, jak zapeŭnivajuć našyja krynicy, scenar straciŭ maksimalnuju pafasnaść i patryjatyčnaść, jakoj damahaŭsia Kavalčuk.
U vyniku čynoŭnik pahladzieŭ videa i praktyčna pramym tekstam praz kiraŭnictva «Dynama» pieradaŭ nastupnaje: «Nu, kali Stasievič źmianiŭ tekst, tady i my źmienim svajo rašeńnie pa im. Padpisvać kantrakt z hulcom zabaraniaju». Hetaja zabarona, darečy, niehałosna raspaŭsiudziłasia nie tolki na «Dynama», ale na inšyja biełaruskija kłuby, jakija mahli b potym vykazać žadańnie zaprasić paŭabaroncu. Pa sutnaści, Kavalčuk kančatkova začyniŭ pierad Stasievičam dźviery ŭ čempijanat Biełarusi.
Kab daviedacca, što nakont hetaha dumaje sam hulec, my nieadnarazova sprabavali ź im źviazacca. Adnak našyja pytańni Stasievič ihnaravaŭ: u tych ža mesiendžarach zapyty čytaŭ, ale na ich nie adkazvaŭ.
Zaraz Ihar, jakomu 21 kastryčnika spoŭnicca 37, trenirujecca z «Isłačču». Ale nie na stałaj asnovie, a dla padtrymańnia formy — dva-try razy na tydzień.
