Jelisiejevy pali ŭ Sienicy
Pryvatnaja pačatkovaja škoła «Jelisiejevy pali» mieścicca ŭ Sienicy pa adrasie vuł. Zachodniaja, 26.
Fota tut i dalej: sajty škoł
Miesiac navučańnia kaštuje 600 jeŭra. Čas znachodžańnia ŭ škole ad 8:30 da 19 hadzin. U košt uvachodzić nie tolki navučańnie pa zvyčajnaj prahramie ad Minadukacyi, ale i raznastajnyja dadatkovyja zaniatki i 5-razovaje charčavańnie (abiacajuć, što ŭ zbałansavanym mieniu i ažyny, i johurty, i indyčka). Anhlijskuju movu ŭ hetaj ustanovie vyvučajuć štodzionna. Chatnija zadańni dzieci robiać u škole razam z nastaŭnikami.
Himnazija Green Hill
Hetaja pryvatnaja himnazija znachodzicca ŭ stalicy na Zasłonava, 10. Hadziny pracy z 8 ranicy da 19 viečara.
Na sajcie ŭstanovy paznačana, što letaś škoła stała pieramožcam u konkursie «Premija numar adzin» u naminacyi «Pryvatnaja škoła №1» u Biełarusi. U škole možna vučycca z 1 pa 11 kłas, ale sielota nabor adbyvaŭsia tolki ŭ 1—7 kłasy. Uchił robicca na anhlijskuju movu i matematyku.
Košt navučańnia ŭ hetaj ustanovie zaležyć ad abranaha baćkami pakieta. Navučańnie pa pakiecie «Adukacyjny» z 9 da 15 hadzin kaštuje 500 jeŭra ŭ miesiac. Pakiet «Poŭny dzień» abydziecca ŭ 600 jeŭra, a kali abrać varyjant «Usio ŭklučana», to miesiac navučańnia budzie kaštavać užo 790 jeŭra.
Smart School
«Smart Skuł» — heta mižnarodnaja sietka pryvatnych škoł, jakija pracujuć nie tolki ŭ Biełarusi, ale i ŭ Rasii, Hruzii, Polščy i inšych krainach. Minskaja škoła znachodzicca niepadalok ad «Drymłenda». Dakładny adras: Arłoŭskaja, 80.
Plus jość pačatkovaja škoła ŭ vioscy Žukaŭ Łuh.
Košt navučańnia — 1400 rubleŭ u miesiac. Na sajcie paznačana, što cana ŭ rublach fiksujecca na ŭvieś navučalny hod. Pry žadańni za asobnuju płatu možna nabyvać dadatkovyja kursy. Čas pracy z 8 da 19. Zaniatki ŭ škole pačynajucca a 9-j ranicy. U škole možna vučycca z 1 pa 11 kłas.
«Apielsin»
Pryvatnaja škoła «Apielsin», jak i «Jelisiejevy pali», znachodzicca ŭ Sienicy. Adras — vuł. Bahdanoviča, 3.
Navučańnie z 1 pa 11 kłas. Cana 1500 rubloŭ. U abaviazkovy kurs navučańnia ŭklučany pradmiety STEM, a taksama pahłybleny kurs anhlijskaj movy. Hadziny pracy: z 8.30 da 18.30.
A što ŭ rehijonach?
Pryvatnyja škoły jość nie tolki ŭ stalicy. Tak, naprykład, u Hrodnie jość škoła «Terytoryja pośpiechu». Košt navučańnia ŭ pačatkovaj škole razam z charčavańniem składaje 950 rubloŭ u miesiac, ale heta tyčycca tolki pieryjadu z 9 da 15 hadzin. Da hetaha času dzieci nie tolki paabiedajuć, ale i zrobiać chatnija zadańni pad nahladam nastaŭnikaŭ. Kali pakidać dziacia paśla 15 hadzin, to baćkam davodzicca dapłočvać pa 3 rubli za hadzinu. Aproč hetaha, u škole jość dadatkovyja hurtki i zaniatki pa 10-25 rubloŭ za hadzinu.
Kali kazać pra pryvatnyja škoły ahułam, to siarod najbolš admietnych rysaŭ, jakija adroźnivajuć ich ad dziaržaŭnych — heta maleńkija kłasy (maksimum pa 12—15 vučniaŭ), indyvidualny padychod, šmatrazovaje charčavańnie, vykanańnie chatnich zadańniaŭ u škole, navučańnie tolki ŭ pieršuju źmienu, šyroki vybar dadatkovych siekcyj i hurtkoŭ, a taksama pahłyblenaje vyvučeńnie anhlijskaj movy.
Čytajcie taksama: Jak Iryna Abielskaja akazałasia zasnavalnicaj pryvatnaj škoły ŭ Drazdach
