Sa słoŭ ekśpiertaŭ i pradstaŭnikoŭ Ministerstva abarony ZŠA, pačynajučy z zatapleńnia rasijskaha fłahmana «Maskva» ŭ Čornym mory ŭ krasaviku i zakančvajučy atakaj na rasijskuju avijabazu ŭ Krymie ŭ hetym miesiacy, ukrainskija vojski vykarystoŭvali amierykanskuju i inšuju zbroju tak, jak mała chto čakaŭ.
Naprykład, ukrainskija siły chutčej pieramiaščajuć rakiety, hruziačy ich na hruzaviki. A bajavyja mahčymaści USU na mory byli pavialičanyja šlacham ustanoŭki rakietnych sistem na chutkachodnych katerach.
Vysokapastaŭleny pradstaŭnik Pientahona zajaviŭ, što ŭkrainskija siły ŭstalavali pastaŭlenyja amierykancami rakiety HARM na savieckija źniščalniki MiH-29. Hetaha nikoli nie rabili da taho — ličycca, što hetyja rakiety niesumiaščalnyja ź MiH-29 i inšymi źniščalnikami, najaŭnymi na ŭzbrajeńni Ukrainy.
«Vy nie možacie prosta paviesić lubuju rakietu na luby samalot, tut zadziejničana šmat avijoniki i inšych aśpiektaŭ vysokapradukcyjnych samalotaŭ. A jany heta zrabili», — padkreśliŭ były hałoŭnakamandujučy armijaj ZŠA ŭ Jeŭropie Frederyk B. Chodžes.
Da ździŭleńnia ekśpiertaŭ pa ŭzbrajeńniach, Ukraina praciahvaje źniščać rasijskija celi z dapamohaj cichachodnych udarnych bieśpiłotnikaŭ tureckaj vytvorčaści «Bajraktar» i niedarahich płastykavych latajučych aparataŭ, madyfikavanych dla skidu hranat i inšych bojeprypasaŭ.
Amierykanskija vajskovyja čynoŭniki źbiantežanyja tym, čamu rasijskija šmatuzroŭnievyja sistemy SPA nie akazalisia bolš efiektyŭnymi ŭ baraćbie ź bieśpiłotnikami, u jakich niama sistem samaabarony i jakija lohka vyjaŭlajucca radaram dy lotajuć z chutkaściu ŭsiaho kala 128 km/hadzinu.
Hienierał Chodžes adznačyŭ, što praz zdolnaść ukrainskich vajskoŭcaŭ źniščać rasijan niezvyčajnym sposabam ich paraŭnoŭvajuć z Makhajvieram — hierojem telesieryjała 1980-ch hadoŭ, jaki vykarystaŭ prostyja impravizavanyja prystasavańni, kab vybracca z dalikatnych situacyj.
Ekśpierty taksama adznačajuć, što inžyniernaja vynachodlivaść ukraincaŭ rezka kantrastuje z pavolnym, marudlivym, daktrynalnym charaktaram nastupleńnia rasijan.
Šmatlikija ataki na rasijskija vajskovyja abjekty ŭ Krymie taksama demanstrujuć zdolnaści ŭkraincaŭ, adznačajuć žurnalisty. Da prykładu, udar pa aeradromie ŭ Sakach 9 žniŭnia. Amierykanskija aficyjnyja asoby kažuć, što Ukraina naniesła hety ŭdar biez papiaredniaha ŭzhadnieńnia z amierykanskimi i inšymi zachodnimi chaŭruśnikami.
Akramia taho, ukrainskija śpiecnazaŭcy i partyzany vykarystoŭvali impravizavanyja zbroju, vybuchoŭku i taktyku ŭ chodzie ŭdaraŭ.
«Dziejańni na Krymskim paŭvostravie, vierahodna, aznačajuć saboj novuju fazu ŭ vajnie, kali ŭkraincy pierachodziać u nastupleńnie ź nierehularnaj vajennaj kampanijaj, nakiravanaj na vyciaśnieńnie Rasii z zony, u biaśpiecy jakoj jana ŭpeŭnienaja», — skazaŭ Mik Małroj, były supracoŭnik Pientahona i aficer CRU.
