U 2011 hodzie Pavieł razam z paplečnikam adkryŭ «Art Siadzibu» — arhanizacyju, jakaja ładziła lekcyi i zabaŭlalnyja mierapryjemstvy.
A praz try hady — viadomuju kramu Symbal.by. Toje, što adzieńnie z nacyjanalnymi matyvami stała modnym, i jaho zasłuha — Symbal.by staŭ mas-markietam u śviecie vyšyvanak i suvieniraŭ z «Pahoniaj». Jaho baniery visieli navat u mietro.
Napiaredadni vybaraŭ-2020 krama vypuściła mierč z nadpisam «Psicho3%» — i atrymała sotni zamovaŭ. Nastolki hety słohan byŭ papularny ŭ narodzie. Praz heta ŭ kramy pačalisia prablemy. Adnak biełarusy ŭ znak salidarnaści vykupali ŭsio, što było na składach. Za apošni tydzień pracy krama pradała stolki, kolki zvyčajna za čatyry miesiacy.
U 2020-m Pavieł zapuściŭ taksama kampaniju «Hodna», kab prasoŭvać nacyjanalnuju ideju. U jaje ramkach zapisvali anłajn-kancerty, histaryčnyja lekcyi, intelektualna-zabaŭlalnyja šou pa-biełarusku.
U Paŭła dvoje maleńkich dziaciej — Sonia i Miron. Jon raskazvaŭ, jak starajecca ich vychoŭvać u biełaruskaj kultury. Vadziŭ, naprykład, dačku na kancert «Dzieciukoŭ», nabyvaŭ joj kazki pa-biełarusku.
«Vybačaj, lubaja, ale žanaty ja na Biełarusi», — kazaŭ jon žoncy.
Jon zastaŭsia ŭ Biełarusi i byŭ zatrymany 15 listapada 2021 hoda. Jamu niekalki razoŭ davali sutki, u vyniku na svabodu jon tak i nie vyjšaŭ. Spačatku suprać jaho była zaviedziena sprava pa artykule 342 (arhanizacyja i padrychtoŭka dziejańniaŭ, jakija parušajuć hramadski paradak, abo aktyŭny ŭdzieł u im). Zatym była zaviedziena sprava za kiraŭnictva «ekstremisckim farmavańniem» (361-1).
Potym stała viadoma pra jašče adnu spravu («zdrada dziaržavie», art. 356), pa joj Biełavusu pahražaje da 15 hadoŭ turmy.
Za kratami Pavieł znachodzicca ŭžo bolš za 9 miesiacaŭ.
Adras dla listoŭ:
SIZA-1. 220030, h. Minsk, vuł. Vaładarskaha, 2
Pavieł Biełavus
Što zrabiŭ dla Biełarusi Pavieł Biełavus
