Amierykanski sałdat sa snaradam Excalibur
Excalibur — vysokadakładnyja snarady pavyšanaj dalokaści. Heta raspracoŭka kampanii Raytheon Missile & Defense. Adchileńnie ad celi ŭ ich składaje mienš za dva mietry. Jak adznačajuć u kampanii, adzin taki snarad moža zamianić u siarednim nie mienš za dziesiać zvyčajnych.
Praŭda, surazmoŭca vydańnia ŭdakładniŭ, što Excalibur nie ŭvachodziać u najbližejšy pakiet dapamohi ZŠA, miemarandum ab vydzialeńni jakoha 19 žniŭnia padpisaŭ prezident ZŠA Džo Bajden. Ale, mahčyma, hetyja snarady ŭklučać u skład nastupnaha tranša.
Što tyčycca ciapierašniaha pakieta, to, pa infarmacyi Politico, ZŠA ŭpieršyniu adpravić va Ukrainu 15 raźviedvalnych bieśpiłotnikaŭ ScanEagle. «Nievialikija drony (…) buduć nieacennyja ŭ budučym nastupleńni na horad Chierson na poŭdni», — adznačaje vydańnie.
Taksama ŭ pakiet upieršyniu ŭklučanyja 40 ciažkabraniravanych supraćminnych mašyn MaxxPro, pieršapačatkova raspracavanych dla amierykanskich vojskaŭ u Iraku. Va Ukrainie jany buduć rasčyščać darohi i pali, pierš čym naziemnyja vojski rušać napierad praz zaminavanyja rasijanami terytoryi.
U tranš taksama ŭvajšli supraćtankavyja rakietnyja kompleksy TOW, šasnaccać 105-mm haŭbic i 36 tysiač snaradaŭ da ich, a taksama 2 tysiačy snaradaŭ dla hranatamiotaŭ Carl Gustaf, pryznačanych dla raboty ŭ blizkim bai. «Heta śviedčyć pra toje, što ŭkraincy čakajuć blizkaha boju ŭ najbližejšyja tydni», — adznačaje Politico.
ZŠA taksama adpraŭlajuć bolš vysakachutkasnych supraćradyjołakacyjnych rakiet, nacelenych na rasijskija radyjołakacyjnyja sistemy.
Čytajcie taksama:
Novy pakiet dapamohi Ukrainie: što mohuć «Harpuny» i «Ekskalibury»
