Himars
Śviežyja danyja pa pastaŭkach zbroi ad Vialikabrytanii, Francyi, Hiermanii, Ispanii, Italii i Polščy, jakija źbiraje Kilski Instytut suśvietnaj ekanomiki, śviedčać ab skaračeńni dapamohi ad jeŭrapiejskich krain.
Heta paćviardžaje šmatlikija vykazvańni ŭkrainskich vajennych čynoŭnikaŭ i palitykaŭ: bujnyja jeŭrapiejskija dziaržavy źnižajuć tempy ŭ vajennaj dapamozie, a pieršapačatkova samyja aktyŭnyja pamočniki Ukrainy — Vialikabrytanija i Polšča, pavydychalisia.
Krystaf Trebieš, kiraŭnik Instytuckaj hrupy, jakaja adsočvaje pastaŭki zbroi Ukrainie, kaža, što jeŭrapiejskija abaviazacielstvy pa vajennaj dapamozie Ukrainie pačali źnižacca z kanca krasavika.
«Niahledziačy na toje, što vajna ŭstupiła ŭ krytyčnuju fazu, novyja inicyjatyvy pa akazańni dapamohi vyčarpalisia», — kaža jon.
Ministr abarony Łatvii Arcis Pabryks raniej zajaŭlaŭ Politico, što takija krainy, jak Francyja i Niamieččyna, pavinny zrabić bolš dla dapamohi Ukrainie ŭ jaje supraćstajańni rasijskaj ahresii.
«Kali my chočam, kab vajna skončyłasia jak maha chutčej, jany pavinny spytać siabie, ci dastatkova jany robiać?» — skazaŭ jon, pakazvajučy, što realnaja dapamoha hetych krain niepraparcyjnaja ich mahčymaściam.
Padobny spad u pastaŭkach nieabchodnaj zbroi adznačajecca i z boku hałoŭnaha donara — ZŠA. Kala dvuch dziasiatkaŭ bujnych amierykanskich adstaŭnych vajskoŭcaŭ, dypłamataŭ, a taksama pradstaŭnikoŭ ekśpiertnaj supolnaści źviarnulisia da Administracyi prezidenta Džo Bajdena z zaklikam dać Ukrainie ŭsio nieabchodnaje dla vajennaj pieramohi nad Rasijaj.
Aŭtary pietycyi adznačajuć, što ciapierašniaja administracyja ZŠA vydaje Ukrainie ŭzbrajeńniaŭ u miežach, dastatkovych dla stvareńnia patavaj situacyi, ale hetaha nie staje dla viartańnia terytoryj, zachoplenych Rasijaj.
Pa vyrazie aŭtaraŭ lista, takim čynam Bieły dom, mahčyma, «vyryvaje paražeńnie z łap pieramohi».
