Alaksiej Bahdziej naradziŭsia i žyŭ u Hrodnie. Pa słovach jaho svajakoŭ, vučyŭsia dobra.
«Uziaŭšy jaho atestat u ruki, pytali: što ž jon u vas z hetkimi adznakami i tut siadzić», — kažuć jany pra pośpiechi Alaksieja.
Alaksiej skončyŭ muzyčnuju škołu pa kłasie domry, dobra śpiavaŭ. Byŭ pryzioram muzyčnych konkursaŭ.
Vučyŭsia Alaksiej u hrodzienskaj škole №12. Archiŭ sajta navučalnaj ustanovy maje kolki dopisaŭ pra školnaje žyćcio Bahdzieja. 11 «B» kłas, dzie jon vučyŭsia, naprykład, u 2018 hodzie nazvany «samym razumnym». Jaho vučni ŭdzielničali ŭ televizijnaj hulni-konkursie «Samy razumny kłas» i pieramahli. U paviedamleńni pra toje napisana: «Bahdziej Alaksiej atrymaŭ siertyfikat na padvyšanuju stypiendyju». Taksama jamu vykazanaja padziaka za ŭdzieł u vałanciorskim školnym ruchu.
Paśla chłopiec pastupiŭ u Hrodzienski dziaržaŭny ŭniviersitet imia Janki Kupały, na fakultet matematyki i infarmatyki. U jaho sacsietkach paznačana, što jon pry hetym pracavaŭ barmienam u zabaŭlalnym centry «Hałaktyka».
Padstavaj dla kryminalnaha pieraśledu chłopca i suvoraha sudovaha vyraku stali jaho dopisy ŭ telehram-kanałach. Pavodle pravaabaroncaŭ «Viasny», u materyjałach spravy adznačana, što Alaksiej Bahdziej u žniŭni 2020 hoda ŭ telehram-kanale «Hrodna dla žyćcia» raźmiaščaŭ tekstavyja paviedamleńni z zaklikami da hvałtoŭnych dziejańniaŭ. Taksama ŭ ich havaryłasia pra vyrab kaktejlaŭ «Mołatava», źviaržeńnie dziejnaj ułady, užyvańnie hvałtu, błakavańnie prajezdaŭ, akazańnie supracivu pradstaŭnikam ułady.
Asudzili Alaksieja Bahdzieja jašče na pačatku lipienia. Sud Leninskaha rajona Hrodna pryznaŭ chłopca vinavatym u padrychtoŭcy da arhanizacyi masavych biesparadkaŭ (artykuł 293 KK) i adpraviŭ na 6 hadoŭ u kałoniju ŭzmocnienaha režymu.
4 žniŭnia ŭ Hrodzienskim abłasnym sudzie jaho apielacyjnuju skarhu pakinuli biez zadavalnieńnia i prysud rajonnaha sudu nabyŭ moc.
Rodnyja asudžanaha niekalki razoŭ bačylisia z Alaksiejem u śledčym izalatary. Na pytańnie pra jaho emacyjny stan adkazvajuć, što trymajecca i namahajecca zžycca z tymi ŭmovami, u jakich apynuŭsia. Na spatkańniach havaryŭ pra svaje mary i zatrymańnie.
