ŽK «Pirs» na ŭskrainie Ratamki — kłubny kvartał z katedžami, taŭnchaŭsami, nievysokimi šmatkvaternymi damami — pabudavany ŭ marskim styli, z namiokam na Minskaje mora niepadalok.
Padtrymlivaŭ ahulnuju temu dekaratyŭny kanał. Jon pačynaŭsia z vadaspadu, a skančaŭsia vialikaj dziciačaj placoŭkaj. Viasnoj 2019 hoda žurnalisty byli na ekskursii ŭ kvartale i adznačali: vadajom vielmi padobny na toje, što anansavali na rendarach.
Tak kanał vyhladaŭ u 2019 hodzie
Vosieńniu 2020-ha miesca stała jašče bolš pryjemnym: na bierazie ŭstalavali 12 skulptur čajek. Aŭtarami rabot stali skulptar Kanstancin Sielichanaŭ i architektar Juryj Hradaŭ.
Ale vyjšła tak, što vialikuju častku času ptuški sumna siadziać la kanała, nie zapoŭnienaha vadoj.
Žychar: «Kanał to nie pracuje, to na ramoncie»
— U kvartale ŭžo jaki hod idzie vajna za dekaratyŭny kanał. A jon ža byŭ samaj viadomaj łakacyjaj, traplaŭ na rekłamnyja buklety i ŭ dopisy zabudoŭščyka ŭ sacsietkach, — paviedamiŭ adzin ź miascovych žycharoŭ.
Pa padlikach čytača, prapracavaŭ abjekt kala hoda, fantany na im — stolki ž.
— Pryčym hety hod vykarystańnia byŭ žudasny: brud, pach, žaby, i ŭsio heta pasiarod prestyžnaj i darahoj zabudovy. Potym pačalisia inšyja prablemy: pakryćcio stała razburacca, fantan pierastaŭ pracavać, vadu dla napaŭnieńnia pry hetym brali z abvodnaha kanała, — dadaŭ surazmoŭca.
Zabudoŭščykam kvartała było TAA «Ałmary», jakoje ŭvachodzić u hrupu budaŭničych kampanij «A-100 Deviełapmient». U 2021-m zabudoŭščyk zamoviŭ ekśpiertyzu, jakaja vyjaviła niekatoryja parušeńni. Naprykład, vyśvietliłasia, što raźmiaščeńnie i siačeńni źliŭnych adtulin u ściency kanała nie adpaviadajuć patrabavańniam prajektnaj dakumientacyi.
— Na praciahu 2021 hoda kanał prapracavaŭ niekalki dzion, u inšy čas zabudoŭščyk sprabavaŭ jaho papravić, — raspavioŭ čytač.
— Ramont doŭžyŭsia ŭsio leta — a heta brud i šum pasiarod kvartała. Čymści zamazali, ale ŭsie tut ža pajšło raskolinami. Byŭ abiacany robat dla ŭborki dna, ale jaho nie dali.
Uvosień 2021-ha tavarystva ŭłaśnikaŭ «Pirsa» adpraviła ŭ vykankam Minskaha rajona list, u jakim padrabiazna apisali prablemy. Siarod inšaha adznačyli, što ŭstalavanyja pompy i sistema filtracyi nie spraŭlajucca, a śviežaja vada pačynaje ćviści ŭžo na 5-7 dzień paśla zapusku ŭ vadajom: «Dla ačystki kanała treba całkam źlić vadu i asušyć jaho rečyšča, zatym admyć z užyvańniem aparata vysokaha cisku i znoŭku całkam zapoŭnić kanał vadoj. U vypadku kali ŭ kanałach, pryznačanych dla advodu hruntovych i ściokavych vod ad kvartała i raźmieščanych pa jaho pierymietry, vada adsutničaje, kanał zapaŭniajecca vadapravodnaj vadoj. Takaja pracedura darahaja i pracajomkaja. Adnak dla biaśpiečnaj ekspłuatacyi abjekta ŭ jaho siońniašnim stanie jana prosta nieabchodnaja na rehularnaj asnovie».
U 2021 hodzie zabudoŭščyk pačyściŭ vodazaborny filtr i pakryŭ pavierchniu kanała poliŭretanavym pakryćciom dla zapavoleńnia razbureńnia i karozii bietonnaj čašy. Ale paśla pieršaha ž asušeńnia rečyšča dla ačystki stała jasna, što novaje pakryćcio adsłojvajecca razam ź bietonam, a čaša, švy i prystupki praciahvajuć razburacca, adznačali žychary ŭ liście ŭ Minski rajvykankam.
— Nastupiŭ 2022-y, i zabudoŭščyk pryznaŭ, što minułyja padradčyki niajakasna vykanali pracy, pryčym nienaležnymi materyjałami. I staŭ, užo z dapamohaj inšych padradčykaŭ, rekanstrujavać. Abiacali skončyć pracy ŭ červieni, ale znoŭ usio pieraškadžaje: doždž, sonca, zorki, — iranizuje žychar «Pirsa».
Padstavy dla ironii — niekalki listoŭ ad zabudoŭščyka, dzie paviedamlajecca ab pieranosie ramontu z-za daždžlivaha leta.
Miascovyja ŭ razmovie narakajuć, što zabudoŭščyk čamuści nie pieradaŭ kanał na bałans tavarystvam ułaśnikaŭ. Ciapier vadajom addali dziaržaŭnamu pradpryjemstvu, «Minskvadakanału». Ludzi aścierahajucca, što takim čynam pryvatnaja kampanija choča «zbyć z ruk» prablemu.
Zabudoŭščyk: «Prykładajem usie namahańni, kab likvidavać prablemu da kanca 2022 hoda»
Žurnalisty źviarnulisia pa kamientar u «A-100 Deviełapmient». Voś što tam kažuć pra prablemy kanała, ich pryčynach i pierśpiektyvie ramontu:
— My ščyra škadujem, što žychary «Pirsa» sutyknulisia sa składanaściami ŭ karystańni dekaratyŭnym kanałam. Jašče na etapie prajektavańnia kvartała my razumieli, što idziem na vialikuju ryzyku, intehrujučy takoje składanaje dla Biełarusi rašeńnie, jak kanał ź sistemaj napaŭnieńnia z hruntavych vod. My sapraŭdy sutyknulisia ź ciažkaściami i prykładajem usie namahańni, kab likvidavać prablemu da kanca 2022 hoda.
U kampanii zapeŭnivajuć, što «znachodziacca ŭ bieśpierapynnaj kamunikacyi z žycharami, jakich rehularna infarmujuć ab usich etapach ramontnych rabot».
— Ale pytańnie dla našaj kampanii pa-raniejšamu składanaje, pakolki my pryvykli vykonvać uziatyja na siabie abaviazacielstvy. Niahledziačy na toje što dekaratyŭny kanał užo pieradadzieny na bałans «Minskvodakanału», my, jak adkazny i prystojny zabudoŭščyk, nie vychodzim z pracesu i nie vyjdziem ź jaho da taho času, pakul nie likvidujem niedachopy.
Zabudoŭščyk adznačaje: kali «Pirs» ŭviali ŭ ekspłuatacyju, kanał pracavaŭ spraŭna.
— Adnak u ciopły čas hoda vada ŭ kanale pieryjadyčna ćviła — heta naturalnaja i niepaźbiežnaja źjava dla padobnych vadajomaŭ u haračaje nadvorje. Naša kampanija rehularna spuskała vadu i pravodziła ačystku čašy kanała. Adzin z varyjantaŭ, jaki vyklučyŭ by ćvicieńnie vady nazaŭždy, — heta vykarystańnie śpiecyjalnaha chimičnaha rastvora.
Ale ŭ vypadku z kanałam, dzie ubudavanaja abvodnaja sistema, hety varyjant zabaronieny pa zakonie. Praź niekatory čas my atrymali prośbu ad žycharoŭ pamianiać pieršapačatkovaje bietonaje pakryćcio dna i ścienak kanała na bolš pryvabnaje pakryćcio błakitnaha koleru. My naniali padradčyka, jaki vykarystaŭ palimierny skład, adnak nanios jaho z parušeńniem technałohii.
U vyniku na palimiernym pakryćci paŭstali raskoliny. I prosta zaraz my robim usio, kab vyrašyć pytańnie kančatkova i paśpiachova.
dy u tym, što robiać roznyja ša-raškiny kantory