Pielaskaja škoła. voranava.blogspot.com
Pra heta paviedamlaje hazieta «Śvietły šlach».
Škołu pierad pačatkam navučalnaha hoda pravieryła inśpiekcyja MNS. Pry praviadzieńni pravierki, jak zajavili ŭ MNS, u Pielaskaj siaredniaj škole byŭ vyjaŭleny šerah parušeńniaŭ.
«Tak, nie harantavanaja biaśpiečnaja i bieśpieraškodnaja evakuacyja dziaciej i piedahohaŭ z pamiaškańnia škoły ŭ vypadku nadzvyčajnaj situacyi, nie zabiaśpiečanaja naležnaja supraćdymnaja abarona i abarona ad raspaŭsiudžvańnia ahniu. Akramia taho, praviedzienaje pieraprafilavańnie pamiaškańniaŭ pa funkcyjanalnym pryznačeńni. Składy pieraprafilavanyja pad vučebnyja kłasy i majsterni», — raspaviała aficyjnaja pradstaŭnica abłasnoha ŭpraŭleńnia MNS Volha Adzijeva.
Pavodle jaje słoŭ, vyjaŭlenyja parušeńni stvarajuć pahrozu pryčynieńnia škody žyćciu i zdaroŭju navučencaŭ i piedahohaŭ. Na hetaj padstavie na adras kiraŭnika ŭstanovy nakiravanaja prapanova ab prypynieńni dziejnaści škoły da likvidacyi vyjaŭlenych zaŭvah.
Jak raspavioŭ načalnik Hałoŭnaha ŭpraŭleńnia adukacyi Rusłan Abramčyk, u suviazi z vyniasieńniem pradstaŭleńnia ab zabaronie ekspłuatacyi budynka Hałoŭnaje ŭpraŭleńnie adukacyi abłvykankama i Adździeł adukacyi Voranaŭskaha rajvykankama prymajuć nieabchodnyja miery.
— Usie navučency, a heta 40 dziaciej ź Lidskaha rajona i 74 z Voranaŭskaha, buduć pieraviedzienyja dla navučańnia pa miescy žycharstva. Kožnamu z 24 piedahohaŭ, ź jakich 10 — hramadzianie Litvy, budzie prapanavanaje miesca pracy na terytoryi Voranaŭščyny. Situacyja znachodzicca pad kantrolem orhanaŭ upraŭleńnia adukacyi, orhanaŭ vykanaŭčaj ułady, a taksama prafsajuza rabotnikaŭ adukacyi i navuki. Jana budzie daviedzienaja da łahičnaha zaviaršeńnia ŭ častcy pracaŭładkavańnia kožnaha z členaŭ pracoŭnaha kalektyvu. Nie tolki piedahohaŭ, ale i techpiersanału.
Z zakryćciom škoły ŭ Pielasach u Biełarusi zastałasia tolki adna litoŭskaja škoła — u Rymdziunach.
U škole ŭ Pielasach u minułym hodzie vučylisia bolš za 120 dziaciej. U krasaviku stała viadoma, što navučańnie na litoŭskaj movie ŭ škole spynienaje. Ministerstva adukacyi Litvy paabiacała nie vydzialać srodki na škołu, kali rašeńnie nie budzie admienienaje.
