Pakul jaho nie zabili, prosta kožny dzień śpiecyjalnaja kamisija vynosić jamu vymovu.
Ciapier Navalny nazyvaje siabie lidaram i zasnavalnikam «Pramzony», prafsajuza hramadzian, pracaŭładkavanych na pradpryjemstvach kryminalna-vykanaŭčaj sistemy.
«Nu a čamu nie? Ja rabotnik kałonii. Švačka. I inšyja zeki taksama rabotniki. I achoŭniki taksama rabotniki kałonii. Z punktu hledžańnia pracoŭnych pravoŭ my nie adroźnivajemsia. My možam stvaryć prafsajuz dla abarony svaich pravoŭ.
Tyja, chto sačyŭ za majoj dziejnaściu, viedajuć, što ja vialiki prychilnik prafsajuzaŭ. Heta vielmi važna — damahacca bolšaj zarpłaty i lepšych umoŭ pracy. My šmat dapamahali prafsajuzam, i ja viedaju, jakaja składanaja i časta niebiaśpiečnaja praca ŭ pa-sapraŭdnamu niezaležnym i bajavym prafsajuzie.
Nu, kali ja zaklikaŭ rabić heta inšych, to varta zrabić heta i samomu, chaj navat u samym niebiaśpiečnym dla hetaha miescy, dzie zabastoŭki, niepadparadkavańnie i schody prama zabaronienyja», — raspaviadaje jon.
Za strajk u miescach pazbaŭleńnia voli pa dziejučym praviłach začyniać u ŠIZA. I, chutčej za ŭsio, stanuć katavać — «heta, praŭda, užo nie pa praviłach, a pa dobraj tradycyi», — udakładniaje jon.
Tamu Navalny pajšoŭ inšym šlacham — skłaŭ dakumienty i adpraviŭ apaviaščeńnie ab stvareńni prafsajuza kiraŭnictvu.
«Pieršaj uznaharodaj mnie byli dzikija vočy supracoŭnikaŭ administracyi. Jany dumali, što ja žartuju, kali ja kazaŭ ab prafsajuzie. I ciapier nazyvajuć jaho vyklučna «niezakonnym».
Potym mianie stali štodnia vyklikać na dyscyplinarnuju kamisiju i davać mnie vymovy pa ŭsiakich farmalnych pryčynach: parušeńnie formy adzieńnia i h. d.
Potym da mianie ŭ barak pryjšła cełaja delehacyja i ŭračysta ŭručyła mnie «pieraściarohu ab padrychtoŭcy złačynstva».
Jaho, na dumku administracyi, Navalny rychtuje, stvaryŭšy prafsajuz.
Reakcyja źniavolenych taksama pakul nie natchniaje.
«Zeki, ščyra skažu, spałochalisia prafsajuza jašče bolš za administracyju. Kožny raz, kali ja zahavorvaju pra jaho, maje zabojcy sumna kažuć: «Alaksiej, spynisia, kali łaska. Z-za ciabie nas naohuł nikoli nie vypuściać, i ŭsio heta skončycca drenna».
Nu, prafsajuz — sprava dobraachvotnaja. Ja nikoha nie prymušaju. Moj prafsajuz abaronić i pravy tych pracoŭnych, chto ŭ jaho nie ŭstupiŭ.
Ale pakul na kožnaje majo «prafsajuz» chtości pobač — choć zek, choć mient — paśpiešliva dadaje «z adnaho čałavieka», — raspaviadaje Navalny.
Jon ličyć, što prafsajuz z adnaho čałavieka — taksama niadrenna. «Lepš, čym zusim biez prafsajuza».
Navalny raspaviadaje, što ŭ Rasii siadzić ciapier blizu 600 tysiač čałaviek. Pieravažnaja kolkaść ź ich pracuje. I heta zusim rabskaja, amal biaspłatnaja praca ŭ žudasnych umovach.
«Tak, bolšaść rabotnikaŭ — złačyncy (choć šmat nievinavatych), ale jany pavinny zahładzić svajo złačynstva pa zakonie. I pracavać pa praviłach».
Zarobak u Navalnaha 5173 rasijskich rubli 04 kapiejki (kala 220 biełaruskich rubloŭ).
«I heta VIELIZARNAJA zarpłata. Nie žartuju. Astatnija ŭ majoj bryhadzie atrymlivajuć značna mienš. Jak ža my možam biez prafsajuza? Nam patrebny prafsajuz», — reziumuje jon.
Navalny raspaviadaje, što jaho prafsajuz užo maje pieramohi. Jon pieramoh taburetki.
«Kali vy siadzicie za šviejnaj mašynkaj pa 7-8 hadzin na dzień, paviercie, heta važna. Pa ŭmovach pracy pracoŭnaje miesca švački pavinna być abstalavanaje kresłam-kruciołkaj z rehulavanaj śpinkaj. U realnaści ŭsie zeki-švački siadziać na taburetkach. Maja była vyšynioj 42 sm. Heta nievynosna, realna muka, i praz paru hadoŭ harantuje surjoznaje zachvorvańnie śpiny», — kaža jon.
Navalny raspaviadaje, što prafsajuz ustupiŭ u «kanstruktyŭny dyjałoh z pracadaŭcam — turemnaj sistemaj» i z dapamohaj jurystaŭ FBK dakazaŭ, što ŭ švačak pavinny być kresły sa śpinkaj.
«Spačatku heta vyklikała ździŭleńnie. Zek pavinien pakutavać. Potym navat pačali chłusić, što my siadzim nie na taburetkach, a na kresłach sa śpinkaj (dadumalisia ž, tak?), a potym — ta-da! — u cech unieśli kresły sa śpinkaj, a taburetki zabrali. Kanstruktyŭnaja praca! Usie zadavolenyja (nu amal).
Ciapier adna z zadač «Pramzony» hetak ža spakojna i kanstruktyŭna damahčysia zamieny taburetak na kresły sa śpinkaj pa ŭsioj zonie, potym u rehijonie, potym dla ŭsich švačak na zonach Rasii», — piša jon.
Jak luby sapraŭdny prafsajuz, «Pramzona» maje svajo ŚMI. Heta tielehram-kanał z takoj ža nazvaj. Tam jość zvarotnaja suviaź, ustanoŭčyja dakumienty i instrukcyja dla tych asudžanych, chto taksama pracuje ŭ šviejnym cechu i choča zamianić taburetku na kresła z rehulavanaj śpinkaj.
«Uvohule, kali žyćcio dało mnie limon u vyhladzie turemnaha terminu, to treba pieratvaryć jaho ŭ limanad choć niejkaj karysnaj dziejnaści dla hramadstva», — napisaŭ Navalny.
22 sakavika Lefortaŭski sud Maskvy pryhavaryŭ Alaksieja Navalnaha da dzieviaci hadoŭ kałonii strohaha režymu pa abvinavačvańni ŭ machlarstvie i niepavazie da suda.
U červieni 2022 hoda Navalnaha etapavali ŭ kałoniju strohaha režymu №6 u pasiołku Mielechava Uładzimirskaj vobłaści. Tam jaho adpravili ŭ adzin atrad z asudžanymi za zabojstvy.
