Usie fota: projects.museumtur.ru/beloruss_tekstil/
U ramkach jubilejnych imprez, pryśviečanych 25-hodździu hramadskaj arhanizacyi «Biełaruskaja nacyjanalna-kulturnaja aŭtanomija Respubliki Komi», a taksama z nahody Hoda kulturnaj spadčyny ŭ Rasii, Nacyjanalny muziej Respubliki Komi i Hrodzienski historyka-archieałahičny muziej abmianialisia virtualnymi vystavami.
Hrodzienski muziej padzialiŭsia vystavaj «Biełaruskija tradycyi: Hančarnaje ramiastvo Paniamońnia».
A Nacyjanalny muziej Respubliki Komi pradstaviŭ prajekt na asnovie svajoj kalekcyi biełaruskaha tekstylu. Usie pradmiety, pakazanyja na fota, stvaryła biełaruska Halina Čačko (u zamužžy — Vavilina).
Halina Vavilina ź plamieńnikam. Syktyŭkar, 20 studzienia 1958 hoda
Jana naradziłasia ŭ 1922 hodzie ŭ siale Pahost Žytkavickaha rajona. Padčas Druhoj suśvietnaj vajny siamju pahnali ŭ Hiermaniju. Halina pracavała na kuchni kancłahiera Chiemnic. U 1945 hodzie kancłahier byŭ vyzvaleny savieckimi vojskami. Paśla vajny Halina Čačko pracavała źvieńniavoj, źviano siejała i rassadžvała tytuń. Ministerstva sielskaj haspadarki ŭznaharodziła jaje značkom «vydatnik sacyjalistyčnaj sielskaj haspadarki». U 1958 hodzie Halina pryjechała ŭ Syktyŭkar niańčyć plamieńnika, vyjšła zamuž i zastałasia ŭ stalicy Komi.
Kalekcyja daje ŭjaŭleńnie pra toje, jakim byŭ narodny tekstyl Uschodniaha Paleśsia ŭ paślavajennaje dziesiacihodździe. Usie rečy — ručniki, pakryvała, padzory (nakidki) dla łožka — vyrablenyja ŭ 1946—1958 hadach. Ich pieradała ŭ muziej dačka Haliny Vavilinaj u pamiać pra svaju maci.
