«Kali stała zrazumieła, što vybary byli skradzienyja režymam Łukašenki, biełaruski narod śmieła vyjšaŭ na vulicy ź mirnym patrabavańniem svabodnych i spraviadlivych vybaraŭ i pierachodu da demakratyi, — adznačajecca ŭ zajavie. — Biełaruski narod prademanstravaŭ vydatnuju stojkaść, padtrymlivajučy prademakratyčny ruch na praciahu dvuch hadoŭ canoj vialikich asabistych achviaraŭ. Hetyja zakliki da demakratyi ahučvajuć biełarusy ŭ vyhnańni za miažoj, bolš za 1200 palitviaźniaŭ, niespraviadliva zatrymanych unutry krainy, i nieźličonaja kolkaść prostych biełaruskich hramadzian».
U zajavie pryhadvajucca «biesprecedentna brutalnyja» represii z boku režymu Łukašenki i havorycca, što Złučanyja Štaty za apošnija hady zrabili šmatlikija kroki ŭ adkaz na złoŭžyvańnie režymu, u tym liku pašyryli paŭnamoctvy pa sankcyjach i razharnuli značnyja sanacyjnyja miery suprać režymu za jahonyja niedemakratyčnyja i destabilizujučyja pavodziny i parušeńni pravoŭ čałavieka.
«Siońnia my abviaščajem pra kroki pa ŭviadzieńni vizavych abmiežavańniaŭ u dačynieńni da 100 słužbovych asobaŭ režymu i źviazanych ź imi asobaŭ za ich udzieł u padryvie abo naniasieńni škody demakratyčnym instytutam abo ŭ pieraškadžańni pierachodu da demakratyi ŭ Biełarusi ŭ adpaviednaści z Ukazam prezidenta № 8015», — havorycca ŭ zajavie.
U liku hetych asobaŭ — čynoŭniki, jakija zajmajuć vysokija pasady ŭ Administracyi prezidenta, MUS, Kamitecie dziaržaŭnaj biaśpieki, Centralnaj vybarčaj kamisii, Hienieralnaj prakuratury, Hałoŭnym upraŭleńni Śledčaha kamiteta, Ministerstva transpartu i suviazi, HUBAZiKa, Nacyjanalnaj dziaržaŭnaj teleradyjokampanii «Biełteleradyjo», Druhoj nacyjanalnaj telekampanii, Vajskova-pavietranych siłach i Vojskach supraćpavietranaj abarony. U ich lik taksama ŭvachodziać členy Nacyjanalnaha schodu, sudździ, supracoŭniki słužby biaśpieki, členy vykanaŭčych kamitetaŭ i administratary dziaržaŭnych universitetaŭ.
