Supracoŭniki rekłamnych ahienctvaŭ Mediahouse i Primary JWT Dźmitryj Zyba i Rusłan Pračakoŭ u razmovie z vydańniem adznačyli, što šerah brendaŭ, jakija pracujuć u Biełarusi, pryniali rašeńnie, ci prynamsi rychtujucca jaho pryniać, ab «razmarozcy» markietynhavaj aktyŭnaści. Bo jany, maŭlaŭ, uśviedamlajuć, što takaja sacyjalna-ekanamičnaja situacyja, jak ciapier, — heta nadoŭha, z hetym pryjdziecca žyć. U jaje treba ŭbudoŭvacca i praciahvać pracavać.
Adpaviedna, pačaŭ raści popyt na rekłamu. U hetym letnim siezonie adznačylisia bujnyja pivavarnyja kampanii, vytvorcy vady, marožanaha, sousaŭ, snekaŭ, mabilnyja apieratary.
Taksama pavialičyłasia kolkaść zvarotaŭ ad rasijskich kampanij, što źviazana z novymi biznes-realijami, kali rasijanie, pazbaŭlenyja mahčymaści pracavać šmat dzie ŭ śviecie, musiać źviartać uvahu na raniej im mienš cikavyja rynki «družalubnych krain». Pryčym, źviartajucca biznesy z roznych katehoryj. «Chvala zapytaŭ ad rasijskich kampanij — heta, padobna, novy trend, jaki farmujecca na budučyniu», — adznačyŭ Dźmitryj Zyba.
Za apošnija try miesiacy istotna źmianiŭsia skład topu rekłamadaŭcaŭ na telebačańni, jakoje praciahvaje być zapatrabavanym kanałam dla prasoŭvańnia mas-markieta, rytejła i peŭnych katehoryj tavaraŭ. Pry hetym ciapierašni top rekłamadaŭcaŭ — biełaruskija kampanii: mabilnyja apieratary, rytejł, vytvorcy miasa-małočnaj haliny, a taksama farma. Jany mianiajuć raniejšych lidaraŭ — Nestle, Jacobs, P&G, Henkel, Coca-Cola, L'oreal.
Dźmitryj Zyba ličyć, što źnižeńnie kolkaści mižnarodnych hulcoŭ na TB — heta dobraja mahčymaść atrymać bolš efiektyŭnaje i bolš biudžetnaje TB-raźmiaščeńnie dla biełaruskich kampanij: «Ciapier vykupiŭ, umoŭna, 500-600 GRP u miesiac — i hetaha chapaje, kab u brenda byŭ vybudavany maksimalny achop u TB, i kaštuje heta tańniej, čym hod—dva tamu».
Praŭda, paśla niekalkich chvalaŭ rełakacyi na rynku źjaviłasia prablema z adukavanymi brend-mieniedžarami jak u rekłamnaj, tak i ŭ markietynhavaj śfiery.
Choć heta ŭ peŭnaj stupieni i nie tolki biełaruskaja tendencyja, bo śviežaje daśledavańnie Fiederacyi rekłamadaŭcaŭ i kampanii MediaSense pakazała: amal pałova (48%) usich rekłamadaŭcaŭ, ahienctvaŭ, kampanij, jakija zajmajucca rekłamnymi technałohijami, i ŭładalnikaŭ ŚMI ličać, što rekłamnaja industryja ciapier pieražyvaje «najhoršy za ŭsiu historyju kryzis». U hetym daśledavańni pryniali ŭdzieł bolš za 400 respandentaŭ — najbujniejšych suśvietnych rekłamadaŭcaŭ, ahienctvaŭ, miedyjapłatformaŭ i technałahičnych kampanij.
Siarod pryčyn kadravych prablem u rekłamnym biznesie na suśvietnym uzroŭni nazyvajuć vyharańnie i «kradziež kadraŭ» z boku IT-śfiery, dzie bolš vysokija zarpłaty i bolš hnutkija hrafiki. A ŭ Biełarusi da hetaha dadajecca ŭzrovień adukacyi, što nie paśpiavaje za sučasnymi realijami, plus niekalki chvalaŭ rełakacyi śpiecyjalistaŭ.
«Zamiest profi prychodziać maładyja chłopcy, učarašnija vypuskniki VNU, jakija dalokija ad realij funkcyjanavańnia rynku i z-za hetaha davodzicca ŭvieś čas padciahvać ekśpiertyzu jak siarod maładych supracoŭnikaŭ ahienctva, tak i siarod brend-mieniedžaraŭ z klijenckaha puła — a hety čas i resursy, jakija možna było vydatkavać na raźvićcio novaha instrumientaryju i pašyreńnie praduktovaha partfiela ahienctva», — adznačaje Dźmitryj Zyba.
Hulcy miedyjnaj rekłamy vykazvajuć aściarohi, što ŭ suviazi z sankcyjnymi abmiežavańniami ŭskładnicca abo całkam stracicca dostup da suśvietnych technałahičnych płatformaŭ, servisaŭ, kanałaŭ prasoŭvańnia:
«Voś prykład: apošnija hady šmat havorycca pra ličbavizacyju vonkavaj rekłamy. Pra heta išli razmovy i na našym rynku, byli bačnyja peŭnyja pierśpiektyvy raźvićcia. Užo ŭ Minsku źjaŭlalisia ličbavyja paneli. Ale za pryhažościu słoŭ apierataraŭ ahienctvam i klijentam patrebnyja ličby. Źviestki płanavałasia atrymlivać z dapamohaj technałahičnych servisaŭ (naprykład, Google), ale ciapier suśvietny hihant naŭrad ci daść prahramnaje zabieśpiačeńnie pad takija prajekty na Biełaruś», — adznačaje Rusłan Pračakoŭ.
«Sankcyjnyja błakady na našym rynku, my vielmi spadziavajemsia, buduć mienš vostryja i pryncypovyja, jak heta nazirajecca na rynku RF. Tym nie mienš, luboje abmiežavańnie — vialikaja pieraškoda i ryzyka apuścić ruki. A heta moža ŭ pryncypie zatarmazić rekłamny rynak u jaho raźvićci. Choć, viadoma, hulcy buduć šukać alternatyvy. Zamiest Google — toj ža «Jandeks» abo inšyja, zamiest WeTransfer niešta inšaje i hetak dalej», — havoryć Pročakoŭ.
