Usie fota: 1387.by
Jak usio pačałosia?
Ideja rabić dydaktyčnyja hulni dla školnikaŭ naviedała Ludmiłu ŭ časy, kali jana pracavała ŭ Centry dziciačaj tvorčaści. Tam babrujčanka była namieśnicaj dyrektara pa vychavaŭčaj pracy i zajmałasia prajektam biełaruskamoŭnaj źmieny letnika dla sotni dziaciej. A kali jana pajšła nastaŭničać u škole, paŭstała pytańnie — jak matyvavać vaśmikłaśnikaŭ ź cikavaściu naviedvać šosty navučalny dzień. Ludmiła prapanavała im stvarać hulni dla małodšych. Formy nastaŭnica prapanoŭvała sama, a jaje vučni padbirali leksičny materyjał.
Tak babrujčanka pačała stvarać nastołki — jak dla małodšaha, tak i dla darosłaha školnaha ŭzrostu. Mnohija słovy ci pytańni jana śpiarša testuje praz svoj instahram, a paśla dadaje ŭ hulni.
Tematyka hulniaŭ
Adnymi ź pieršych hulniaŭ byli łato dla małodšaha ŭzrostu, trochkutniki ź sinonimami i antonimami dla starejšych kłasaŭ (pa ich dobra rychtavacca da alimpijadaŭ), rebusy. Z apošnich — «Praŭda i chłuśnia» na ekałahičnuju temu, «Pčołka Lela» dla samych maleńkich (dapamahaje vyvučyć novyja słovy), nastołka-chadziłka «U pošukach skarbaŭ», moŭnaje damino, «Kalejdaskop» antonimy, «Kalejdaskop» litaratura, dy inšyja.
Ciapier u skarboncy nastaŭnicy 12 hulniaŭ, i try na padychodzie.
— Adna hulnia ŭžo hod lažyć, nijak nie dašlifuju pytańni. Abkatvaju na dzieciach, a jany ich nie biaruć. Treba spraščać. Ale heta budzie hulnia žyćcia, — śmiajecca Ludmiła Kryłova. — Dapamahajuć vučni dy instahram. Tam ja kožny dzień vykładaju pytańni z hulniaŭ, jakija rablu, takim čynam ich abkatvaju. Ideju hulni «Nieznajomcy» hod tamu prapanavała minčanka, napisała, a paśla my stelefanavalisia. Dla hetaj nastołki ja hod padbirała cikavyja słovy. Amal usio stvarajecca letam, bo maju bolš volnaha času dla afarmleńnia hulni ŭ «smačnaje adzieńnie».
Jak prydbać nastołku ad Ludmiły
Svaje nastołki Ludmiła drukuje ŭ Minsku, pa 30 asobnikaŭ. Pakul jana nie znajšła zamoŭcaŭ, zacikaŭlenych u vyrabie bolš vialikich nakładaŭ. Ale ŭ minułym hodzie na druk 100 asobnikaŭ achviaravaŭ staličny pradprymalnik. «Heta byŭ pryjemny šok, — uzhadvaje babrujčanka. — Jon prosta napisaŭ: «Chaču dapamahčy». I ciapier, kali mianie zaprašajuć z aŭtarskimi majstar-kłasami «Vučym movu hulajučy, abo łajfchaki dla cikavaha navučańnia», maju mahčymaść rabić udzielnikam padarunki. Bo mnie padaryli — i ja daru. Źviartałasia ŭ časopisy, ale adzinaje, što jany mohuć prapanavać — kalarovy ŭkładyš.
Tamu ŭ asnoŭnym rablu svaimi siłami, na ŭłasnyja hrošy. I dziakuj nastaŭnikam, jakija cikaviacca nastołkami, dasyłaju im. Naahuł u mianie niama mety na hetym zarabić. Žadaju padaryć mahčymaści vučyć movu cikava!
Na fota: taksama Ludmiła robić zakładki dla knih, ź ich dapamohaj možna ŭdaskanalvać svaje viedy
Zacikavili nastołki Ludmiły Kryłovaj? Pišy ŭ jaje instahram. Tam ža možna ŭbačyć usie hulni i navat paŭdzielničać u stvareńni novych.
