Pieršy punkt u płanie «Bajpoła» — adchilić ad vysokich pasad pradstaŭnikoŭ siłavych struktur. Talerčyk ličyć, što źniać treba budzie kiraŭnikoŭ MUS, Minabarony, Rady biaśpieki, MNS, AAC, Słužby biaśpieki prezidenta, Dziaržpahrankamiteta, SK.
Na ich miescy pryznačać kiraŭnikoŭ, jakija buduć časova vykonvać abaviazki.
«Kandydaty padbirajucca ź liku dziejnych supracoŭnikaŭ, jakija vykažuć zhodu padpisać śpiecyjalnuju dekłaracyju adnaŭleńnia zakonnaści i achovy paradku. Kožnamu čynoŭniku, siłaviku, prakuroru i inšym słužačym dziaržaparata budzie prapanavana padpisać jaje», — kaža Talerčyk.
Prapanujecca časovaja strohaja ijerarchičnaja sistema padparadkavańnia z tryma ŭzroŭniami — kiraŭnik respublikanskaha, abłasnoha i rajonnaha ŭzroŭniu. Kožny zmoža davać ukazańni tolki ŭ ramkach svajho ŭzroŭniu, rasparadčych dziejańniaŭ u adnosinach da nižejšych struktur rabić nie zmohuć.
Taksama «Bajpoł» prapanuje vyvieści sa štatu vajskovyja i siłavyja padraździaleńni, jakija čynili złačynstvy suprać naroda.
«Heta moža być zroblena z pryciahnieńniem armiejskich sił śpiecyjalnaha pryznačeńnia, kab nie dapuścić miaciažu», — prakamientavaŭ Aleh Talerčyk.
Na jaho dumku, važna taksama stvaryć hramadzianskija ŭzbrojenyja farmavańni dla pieraduchileńnia akupiravańnia i mahčymych revanšysckich sprobaŭ režymu. Farmavańnie, pa zadumie, budzie stvaracca pa terytaryjalnym pryncypie ź liku ŭdzielnikaŭ płana «Pieramoha» i inšych aktyvistaŭ. Heta treba, kab zvolnienyja kamandziry nie stvaryli svajo farmavańnie i nie vystupili suprać novaj ułady.
«Bajpoł» taksama ličyć vartym u tranzitny pieryjad ustalavać pamiežny kantrol na ŭsioj miažy z Rasijaj i ŭzmacnić miažu.
«Dla hetaha ŭ pahraničnyja vojski varta pieradać siły i srodki ŭnutranych vojskaŭ, za vyklučeńniem kanvojnaj słužby. Pry hetym kamandavańnie ŭnutranych vojskaŭ adchilajecca, a Karpiankoŭ — pad aryšt», — padzialiŭsia bačańniem Talerčyk.
Z tymi, chto vyviedzieny sa štatu, płanujecca pravodzić indyvidualnyja hutarki, raźviedvalnyja apytańni z palihrafam.
