Lidara partyi BNF zatrymali ŭviečary 12 krasavika ŭ Škłovie, paśla čaho pavieźli ŭ Minsk. Potym stała viadoma, što jon utrymlivajecca ŭ SIZA KDB.
«Pavodle viersii abvinavačvańnia, Kastusioŭ dasiahnuŭ tajemnaha pahadnieńnia ź Ziankovičam i Ščyhielskim ab zachopie ŭłady niekanstytucyjnym šlacham, a taksama pahadziŭsia ź ich dovadami ab tym, što hetyja mety mohuć być dasiahnutyja tolki hvałtoŭnym čynam», — pišuć dziaržaŭnyja ŚMI.
Pa słovach prakurora, Kastusioŭ, znachodziačysia ŭ siabie doma ŭ Mahiloŭskaj vobłaści, u režymie anłajn-kanfierencyi ŭdzielničaŭ u abmierkavańni płana pa zachopie ŭłady. Ryhor Kastusioŭ svaju vinu ni pa adnym z pradjaŭlenych abvinavačańniaŭ nie pryznaŭ.
«Ja nie pryznaju vinu», — zajaviŭ jon u sudzie, patłumačyŭšy, što ŭdzielničaŭ u anłajn-kanfierencyi zmoŭcaŭ tolki jak słuchač.
«Viadučym zum-kanfierencyj byŭ Ziankovič i zaŭsiody vyznačaŭ tematyku razmovy», — cytuje BiełTA słovy Kastusiova. Pa jaho słovach, skład udzielnikaŭ zum-kanfierencyj pastajanna mianiaŭsia.
Z nahody taho, što zmoŭcy nibyta płanavali pryciahnuć na svoj bok vojska i inšych siłavikoŭ, Kastusioŭ skazaŭ tak: «Ja nie vieru, što siarod biełaruskich hienierałaŭ jość takija, chto moža zdradzić Radzimie».
Na dopycie Kastusiova spytali, ci ahavorvaŭ jon kaho-niebudź z abvinavačanych. Jon adkazaŭ: «Ja staraŭsia nie ahavorvać, drenna pamiataju».
Palityk zajaviŭ u sudzie, što na jaho cisnuła śledstva. Pa jahonych słovach, jahonyja dačka i ziać na niekatory čas zatrymlivalisia. «Kali vašu siamju represujuć, vy možacie napisać što zaŭhodna», — skazaŭ jon.
Kastusioŭ mierkavaŭ, što jaho mohuć zatrymać, ale ź Biełarusi nie źjechaŭ, choć u jaho było dzie žyć za miažoj. Jon raskazaŭ, što jahonyja ziać z dačkoj i čatyrma dziećmi vymušanyja byli źjechać z krainy paśla jaho zatrymańnia.
Kastusioŭ skazaŭ, što papiaredžvaŭ Ziankoviča i inšych udzielnikaŭ zum-kanfierencyj, što ich mohuć prasłuchoŭvać śpiecsłužby i što heta budzie mieć surjoznyja nastupstvy. Pry hetym, jak vynikaje sa słoŭ prakurora, Kastusioŭ «razumieŭ, što heta byŭ vajskovy pieravarot». Śledčamu Kastusioŭ kazaŭ, što «ŭspryniaŭ razmovy Ziankoviča ab źviaržeńni ŭrada i padrychtoŭcy vajskovaha pieravarotu prosta jak bałbatniu».
Ryhor Kastusioŭ taksama skazaŭ, što nikoli nie zaklikaŭ da fizičnaj likvidacyi Alaksandra Łukašenki. I nahadaŭ, što ŭ pačatku svajoj palityčnaj karjery navat padtrymlivaŭ jaho.
«Ja tolki pryznaju vinu ŭ tym, što daŭ hetym ludziam uciahnuć mianie ŭ hetyja razmovy: ab siłavoj źmienie ŭłady, ab troch hrupach vajskoŭcaŭ, ab finansavańni hetaha mierapryjemstva», — padkreśliŭ Ryhor Kastusioŭ.
