25-hadovy Jahor Makarevič naradziŭsia ŭ Minsku, maci pracavała na roznych dziaržaŭnych pradpryjemstvach. Sam Jahor skončyŭ, jak paznačaje na svajoj staroncy ŭ fejsbuku, BDU i Akademiju kiravańnia.
Jon šmathadovy aktyvist roznaha rodu simulacyj taho, čaho ŭ realnaści nie isnuje, kštałtu «moładzievych savietaŭ deputataŭ» i «moładzievaha parłamienta».
Hienieratar biaskoncych śpičaŭ u fejsbuku ź pierafrazami Łukašenki, jakija łajkajuć funkcyjaniery BRSM, ideołahi i Špakoŭski.
Usie detali historyi ŭciahvańnia Jahora ŭ pracu pa padtrymcy łukašenkaŭskaha kursa nieviadomyja, imavierna, hetamu mocna paspryjaŭ BRSM i jaho suviazi ź ludźmi kštałtu Vadzima Hihina — pieršaje fota, dzie Makarevič i Hihin vystupajuć z adnoj trybuny, chłopiec apublikavaŭ jašče tady, kali jamu było 17 hadoŭ.
Za košt enierhii i, u cełym, biednaty takoha rodu arhanizacyj na tałkovyja kadry, staŭ zorkaj simulacyi «dyjałohu ŭładaŭ z moładździu».
U łukašenkaŭskija palityčnyja koły jaho pryviała kolišniaja sienatarka, a ciapier pieršaja namieśnica ministra adukacyi Iryna Staravojtava, jakaja ŭ čas svajoj kadencyi ŭ Saviecie Respubliki była staršynioj kamisii pa adukacyi, navucy, kultury i sacyjalnym raźvićci.
Dla imitacyi dyjałohu z moładździu jana ŭziała Makareviča svaim pamočnikam. Paśla pryznačeńnia ŭ Minadukacyi ŭładkavała jaho svaim pamočnikam tam, ale nijakaj realnaj raboty Makarevič nie rabiŭ — zajmaŭsia svaim prajektam «moładzievaha parłamienta», dzie byŭ kiraŭnikom.
2020 hod daŭ šaniec takim Makarevičam prajavić siabie.
Jahor ad imia «moładzievaha parłamienta» apublikavaŭ fejkavy rejtynh kandydataŭ u prezidenty siarod «pradstaŭnikoŭ aktyŭnaj moładzi horada Minska».
U im Łukašenku napisali 61%, ale nie była patłumačana vybarka ŭdzielnikaŭ, nichto pra takoje apytańnie nie čuŭ, što naradziła adpaviednyja žarty, što Łukašenka nabiraje 61% navat siarod apytańnia pamiž tryma beerseemaŭcami.
Mienavita taki pracent u stalicy paźniej Alaksandru Łukašenku napisaŭ Centrvybarkam. U toj ža čas «Naša Niva» publikavała źviestki sacyjołahaŭ z Akademii navuk, što rejtynh Łukašenki pierad vybarami ŭ Minsku składaŭ usiaho 24%. U žniŭni 2020-ha na tych učastkach u Minsku, dzie za padlikam hałasoŭ dazvolili sačyć naziralnikam, Łukašenka atrymlivaŭ usiaho ad 10 da 35% hałasoŭ.
Pierad vybarami Jahor taksama vystupaŭ z prapahandaj Łukašenki jak biazźmiennaha lidara.
«Nieadnojčy byvaŭ za miažoj i mahu skazać, što navat krainy Zachodniaj Jeŭropy časam sastupajuć Biełarusi ŭ płanie ŭparadkavanaści, nie kažučy ŭžo pra SND», — kazaŭ jon u intervju. Ale heta niapraŭda — «Naša Niva» pravieryła bazu pierasiačeńniaŭ miažy i vyjaviła, što Makarevič nikoli ŭ žyćci nie byvaŭ u Jeŭropie.
Jaho ŭjaŭleńni ab zamiežžy sfarmiravanyja Maskvoj i Picieram, kudy jon z 17 hadoŭ, razam z Hihinym i ciapierašnim kiraŭnikom BRSM Łukjanavym, pačaŭ katacca na kanfierencyi kštałtu «Pasiedžańniaŭ Rady Moładzievaj pałaty pry Parłamienckim Schodzie Sajuza Biełarusi i Rasii» jak pradstaŭnik biełaruskaj moładzi.
Adzin raz Makarevič byvaŭ u Azierbajdžanie, na hetym jaho hieahrafičnaja erudycyja skančajecca.
Makarevič vystupaŭ pierad studentami, kryčaŭ u miehafon pierad amierykanskim pasolstvam, uskładaŭ z Kačanavaj kvietki i abiacaŭ «vajnu moładzi suprać fejkaŭ».
Kalehi pa cechu sapraŭdy ličać, što ŭ jaho jość talent i vialikaja budučynia ŭ łukašenkaŭskaj Biełarusi.
«Unikalny vypadak dla sistemy, kali taki małady čałaviek užo moža sieryjna hienieravać biessensoŭščynu z pasyłam «Za Radzimu, za Stalina!», tonka sčytvać miesiedžy Łukašenki, paŭtarać heta svaimi słovami i biez zapinak — heta toje, čamu pad kaniec žyćcia navučycca nie kožny adstaŭny pałkoŭnik na pasadzie ideołaha.
Adna ŭ jaho biada — faktyčna nidzie nie pracavaŭ, ni ŭ čym nie raźbirajecca, raniej takich nazyvali kamsamolcami», — ličyć čałaviek, jaki pierasiakaŭsia z Makarevičam.
Na «Kamvoli» — pradpryjemstvie na 800 supracoŭnikaŭ — Makarevič budzie adkazvać za padbor kadraŭ i tłumačeńnie palityki Łukašenki.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
