Kaśmietyka adnoŭ z surazmoŭcaŭ
«Za 20 rubloŭ i daražej kuplać pamady pakul nie hatovaja»
Śviatłanie (imia źmieniena) 23 hady. Najbolš aktyŭna dziaŭčyna vykarystoŭvaje kaśmietyku dla tvaru.
«U mianie toŭstaja skura, i, kab na joj nie było vysypańniaŭ i blasku, treba pastajanna karystacca ŭmyvałkami, tonikami, lohkimi kremami. Ciapier pierachodžu na polskuju aptečnuju kaśmietyku Eva Derma, paru miesiacaŭ tamu kuplała polskuju Eveline Cosmetics — heta byŭ uzrovień mas-markietu, ale z pastaŭlenymi zadačami jana spraŭlałasia niadrenna. Prynamsi, lepš rasijskaha «Prapielera», ź jakoha ja pačynała dohlad skury», — raskazvaje jana.
Ruki i nohi z nadychodam leta Śviatłana pačała štodnia mazać małačkom dla cieła.
«Admysłovych pieravah u mianie nie było, — kaža jana. — Kupiła na E-mall za 4 rubli paŭlitrovuju butelku niejkaha ispanskaha małačka Amalfi. Nazva ni pra što nie havoryć, ale ispanskaje, napeŭna, lepšaje za biełaruskuju. Plus skuru jano sapraŭdy dobra ŭvilhatniaje.
Vałasy myju šampuniem Synergetic — heta kłasny rasijski brend, jaki vypuskaje eka-kaśmietyku. Ja vielmi lublu ŭsiakija eka-srodki, pryčym nie tolki ŭ kaśmietycy, tamu addała pieravahu im. Taksama pierad myćciom apracoŭvaju vałasy kakosavym masłam Parachute.
Duchi zaraz ad «Aźmirli Masła Parfuma», tamu što na bolš jakasnyja prosta nie chapiła hrošaj. Raniej karystałasia francuzskimi Cacharel Noa, jany cudoŭnyja i ja vielmi pa ich sumuju (na Ozon butelka 50 mililitraŭ zaraz kaštuje 276 rubloŭ)».
Srodki, jakimi karystajecca Śviatłana
Dekaratyŭnaj kaśmietykaj Śviatłana amal što nie karystajecca.
«Brovy štomiesiac afarboŭvaju ŭ śpiecyjalista, a potym chadžu jak jość, tolki rasčesvaju. Na viejki časam nanošu tuš, francuzskuju Bourjois. Vielmi lublu vadkija pamady, u favarytach apošnim časam — LuxVisage PIN UP, ale ŭ šafcy jašče zavalalisia Complimenti Relouis. Cieni ad Luxvisage. Tanalny krem, pudry nie vykarystoŭvaju», — raskazvaje jana.
U siarednim na ŭsiu kaśmietyku Śviatłana tracić kala 60 rubloŭ na dva miesiacy.
«Tonik, umyvałka, maska-pilinh ad Eva Derma abyducca prykładna ŭ 30 rubloŭ, šviejcarskaja aśviatlalnaja maska ad Swiss Image — jašče ŭ 10, šampuń — 10 rubloŭ.
Duchoŭ chapaje nadoŭha: butelečku ja kupiła ŭ studzieni za 70 rubloŭ, i pakul jany nie skončylisia. Dekaratyŭnaja kaśmietyka abnaŭlajecca jašče radziej: tušy chapaje na paŭhoda i bolš, a vadkija pamady valajucca ŭ šafie prykładna hod», — dzielicca jana.
Krytery vybaru kaśmietyki ŭ Śviatłany zaležać ad taho, dla čaho jana pryznačanaja. Naprykład, vałasy dziaŭčyna myje tolki eka-šampuniami.
«Nie ŭpeŭnienaja, što jany značna lepšyja za sintetyčnyja, ale mnie padabajecca dumka, što ja dahladaju siabie z dapamohaj bolš-mienš naturalnych srodkaŭ, — dzielicca dziaŭčyna. —
Zrešty, kali heta kaśmietyka dla skury, taksama važna, kab tam było pamienš škodnych dadatkaŭ: silikonaŭ, parabienaŭ. Jany sapraŭdy drenna ŭpłyvajuć na skuru, paśla pierachodu na aptečnuju Eva Derma ja adčuła roźnicu z Eveline Cosmetics».
Dla dekaratyŭnaj kaśmietyki kryter adzin — jana pavinna padabacca dziaŭčynie.
«Kali pamada ŭrazić mianie koleram, naprykład, ja nie budu čytać skład. Za 20 rubloŭ i daražej kuplać pamady pakul nie hatovaja.
Adziny kryter, jaki budzie aktualny dla luboj kaśmietyki, jakuju ja vykarystoŭvaju, — jana nie pavinna testavacca na žyviołach. Darečy, najaŭnaść siertyfikataŭ jakaści ES taksama budzie plusam».
Dohladavaj kaśmietykaj dziaŭčyna nie karystałasia da 18 hadoŭ. Potym schadziła da kaśmietołaha na čystku tvara.
«Paśla čystki stała vykarystoŭvać samyja tannyja ŭmyvałki, ale pastupova prysłuchałasia da kaśmietołaha i pierajšła na aptečnuju liniju Eva Derma, u ich dobry košt. Kaśmietołah pakazvała mnie tolki vielmi darahija izrailskija aptečnyja liniejki, i ja była ŭpeŭnienaja, što nie zmahu kupić u aptecy dobruju kaśmietyku pa canie mas-markietu», — kaža dziaŭčyna.
Dekaratyŭnaja kaśmietyka, jakoj karystajecca Śviatłana
Śviatłana ŭspaminaje, što jaje pieršy surjozny makijaž byŭ ź jarka-ružovaj pamadaj.
«Nafarbavała joj vusny i pajšła na pary. Babula nie ŭchvaliła, abazvała mianie niadobrym słovam. Toj dzień ciahnuŭsia vielmi doŭha, mnie zdavałasia, što ŭsie hladziać tolki na maje jarkija vusny.
Kaśmietyka dla mianie — sposab kłopatu pra siabie. Mnie padabajecca rabić maski, vybirać kremy i na praciahu ŭsich hetych pracesaŭ fonam dumać, što dziakujučy hetamu dohladu ja stanu pryhažejšaj i lepšaj.
Dekaratyŭnaja kaśmietyka, u svaju čarhu, prosta sposab samaśćvierdzicca: časam nafarbuju vočy, vusny — i adrazu źjaŭlajecca adčuvańnie, što mahu absalutna ŭsio. Adnak mnie nie treba rabić heta ŭvieś čas, kab adčuvać siabie kamfortna. Naprykład, uletku ja chadžu zusim biez dekaratyŭnaj kaśmietyki», — padsumoŭvaje jana.
«Lepš pierapłacić, ale chadzić z čystym tvaram biez alerhii»
Kaciarynie (imia źmieniena) 27 hod. Abyścisia biez dohladavaj kaśmietyki dziaŭčyna nie moža. Bolš za ŭsio hrošaj u jaje sychodzić na kremy, skraby i toniki.
«Hiel dla myćcia i toniki — Caudalie. Krem dla tvaru ŭ mianie ad firmy Payot — standartnaje ŭvilhatnieńnie, bieź jakoha nikudy.
Dekaratyŭnaj kaśmietykaj ja karystajusia 3-4 razy na tydzień. U mianie ŭ kaśmietyčcy jość roznyja brendy, zaležyć ad nastroju.
Lubimyja srodki ad brendaŭ Bobbi Brown (blask), Giorgio Armani (hubnaja pamada i kansiler), Morphe (cieni), Lancome (tuš). Ciapier z parfumy ŭ mianie dva vodary: Miu Miu i Nina Ricci. Idealny dohlad vałasoŭ ja jašče nie znajšła, tamu kožny miesiac vykarystoŭvaju novyja pradukty. Ciapier sprabuju izrailski brend Mon Platin dla afarbavanych vałasoŭ», — raskazvaje Kaciaryna.
Na dekaratyŭnuju kaśmietyku ŭ dziaŭčyny sychodzić kala 380 rubloŭ. Jaje jana kuplaje raz na dva miesiacy. Na dohlad tvara, cieła i vałasoŭ kala 200 rubloŭ na miesiac. Na duchi — 250 rubloŭ. Ich jana kuplaje raz na try miesiacy.
«Źmianiać pradukty dla dohladu tvara, cieła i vałasoŭ davodzicca raz na miesiac. Astatnija mohuć pratrymacca ad dvuch da čatyroch miesiacaŭ. Hałoŭnaje ŭ kaśmietycy dla mianie — łajalny skład i jakaść praduktaŭ. Ja liču, što lepš pierapłacić, ale chadzić z čystym tvaram biez alerhii. Tamu zaŭsiody vybiraju pravieranyja brendy», — dzielicca Kaciaryna.
Dekaratyŭnaja kaśmietyka, jakoj karystajecca Kaciaryna
Uvohule dziaŭčyna pačała karystacca kaśmietykaj rana.
«Jašče ŭ škole ŭ mianie ŭvieś čas zaharali ščočki i nos, ja vykarystoŭvała pudru samaha śvietłaha adcieńnia, kab z hetym zmahacca. Zvyčajna tak i vyhladali maje pieršyja sproby ŭ makijažy. Paźniej, hadoŭ u 14-15 pieryjadyčna ja pačała vykarystoŭvać tuš», — raskazvaje jana.
Dla Kaciaryny kaśmietyka — heta chobi. Jana lubić ekśpierymientavać z makijažam, časta sprabuje novyja sposaby.
«Dla mianie heta i sposab samavyjaŭleńnia, i, viadoma, sproba schavać niekatoryja niedachopy, a taksama padkreślić dobryja jakaści. Biez kaśmietyki vynieści śmiećcie ja mahu. Tut prablem niama, nie maju niejkich kompleksaŭ», — kaža jana.
«U cełym dla mianie važna dobra vyhladać, bajusia staraści»
Tamary (imia źmieniena) 21 hod. Karystacca dohladavaj kaśmietykaj dziaŭčyna pačała niekalki hadoŭ tamu. U siarednim na ŭvilhatniajučy krem, hiel dla myćcia i krem pad vočy dziaŭčyna tracić kala 200 rubloŭ na dva miesiacy.
«Spačatku kuplała ŭsie marki Bioderma. U siarednim na hetyja try srodki traciła kala 150 rubloŭ. Paśla pierajšła na La Roche-Posay. U mianie adčuvalnaja skura, stali źjaŭlacca kapilary. U hetaj liniejcy kupiła śpiecyjalny krem, za niekalki dzion vykarystańnia kapilary, jakija byli bačnyja, źnikli. Navat dumała ich vydalać łazieram, ale nichto nie daje harantyi, što jany znoŭku nie źjaviacca, a pracedura niatannaja. Krem dapamoh.
U cełym dla mianie važna dobra vyhladać, bajusia staraści. I mnie zdajecca, što kaśmietyčnyja srodki, naviedvańnie kaśmietołaha, pracedury karbaksiterapii (nasyčeńnie kisłarodam) padtrymlivajuć zdarovy vyhlad tvaru.
Ciapier karystajusia liniejkaj Avene. Traču kala 200 rubloŭ na dva miesiacy — heta maska, dzionny krem z SPF, krem pad vočy. Taksama kuplaju syrovatku ź vitaminam C, nanošu ŭviečary pierad snom. Vielmi dobra ŭmacoŭvaje kapilary», — raskazvaje jana.
Duchi dziaŭčyna vykarystoŭvaje roznyja. Z favarytaŭ — Chanel Chance, tualetnaja vada Chanel Chance Eau Tendre, Versace Bright Crystal Absolu, Lancome La Vie est Belle, Dior Addict.
«U siarednim na hod traču kala 500-770 rubloŭ na niešta z hetaha. Plus jašče niejkija duchi raz na hod mnie dorać.
Karystajusia šampuniem Syoss dla afarbavanych vałasoŭ, balzamam. Musić, za heta vychodzić kala 25 rubloŭ. Bolš vałasy niejkim śpiecyjalnym čynam nie dahladaju. Niama takoj zvyčki, dla mianie hałoŭnaje — tvar, dekalte, fihura. U cełym vałasy ŭ mianie zdarovyja. Sam šampuń padbirała doŭha, mnie važna, kab pry ŭkładcy fienam zachoŭvaŭsia abjom, a takoje nie kožny šampuń, jak akazałasia, moža», — kaža Tamara.
Kaśmietyka, jakoj karystajecca Tamara
Dziaŭčyna lubić karystacca dekaratyŭnaj kaśmietykaj. Ale makijaž u jaje zaŭsiody adnolkavy, jana viedaje, što joj pasuje, a što nie.
«Nie lublu, darečy, karystacca pasłuhami vizažystaŭ. Kožny raz farbujuć tak, što ja baču, što heta nie majo. Razumieju, što jany prafiesijna heta robiać, ale, vidać, u maim vypadku heta nie pasuje.
U mianie kłasičny, saviecki, kali chočacie, makijaž — strełki, tuš, pamada, tanalnik. Padvodka — Vivienne Sabo abo Rimmel London, kaštuje pad 40 rubloŭ. Z hetymi markami ja ŭžo niekalki hod. Vielmi ciažka padabrać narmalnuju padvodku ź ćviordym pendźlikam. Važna jašče, kab jana była vodatryvałaja.
Tuš — Dior, Bourjiois abo Maybelline New York. Tut u zaležnaści ad brenda addaju ad 25 da 100 rubloŭ. Tanalnik Eveline Cosmetics, rekamienduju. Jon nie ściahvaje skuru i narmalna vyraŭnoŭvaje. Kaštuje kala 25 rubloŭ. Raniej karystałasia niekalki hadoŭ macirujučym tanalnikam Loreal, vielmi sušyŭ skuru.
Adcieńni pamad vykarystoŭvaju adny i tyja ž, redka niešta mianiaju, kansiervatyŭnaja ja. Pakul jašče ŭ zapasach Relouis, blask dla vusnaŭ — Dior, jość čyrvonaja pamada Chanel. Za hetyja try pazicyi addała kala 180 rubloŭ. U cełym chapaje na miesiacaŭ 5, karystajusia nie kožny dzień.
Uvohule farbavacca pačała jašče ŭ škole, u 15 hadoŭ. Pieršy makijaž — nakłała tuš. U cełym u mianie staŭleńnie da kaśmietyki takoje: heta mahčymaść być jarčejšaj, bolš prykmietnaj (u maim vypadku). Asabliva, kali jość strełki, pohlad bolš strohi, praniźlivy. Kali nie treba ni z kim kamunikavać, to ja pieryjadyčna źjaŭlajusia na ludziach biez kaśmietyki».
Čytajcie taksama:
«Apošni raz farbavałasia 10 hadoŭ tamu». Biełaruski raskazali, čamu admovilisia ad makijažu i jak na heta reahujuć mužčyny
Rekordnaja śpioka: Bred Pit pakazaŭsia ŭ ilnianoj spadnicy FOTA
