Śviatłana Cichanoŭskaja padčas vizitu ŭ Bierlin, 20 lipienia 2022 hoda
— Na forumie demakratyčnych siłaŭ, jaki prajšoŭ tut ža, u Bierlinie, tydzień tamu, hučała krytyka vas i vašaj kamandy. Jakoj vam bačycca meta heta forumu i ci dasiahnutaja jana? Jak by vy adkazali na krytyku?
— Ja razumieju, što jość ludzi, nie zadavolenyja našaj pracaj, ale ž u nas adna meta. Viedajecie, ja tam pačuła, što my, ja i ofis, robim niedastatkova. Moža, i tak. Ale ci mahčyma rabić dastatkova? Robim što možam. I vy rabicie. Taksama pačuła, što Cichanoŭskaja, maŭlaŭ, pavinna pieradać uładu. Viedajecie, mnie «ŭłada» nie patrebnaja. Mnie važna darabić toje, što pačali: vyzvalić ludziej i davieści krainu da svabodnych vybaraŭ. Ad taho, što my papryznačajem adno adnaho na roznyja pasady, pieramieny nie nastanuć. Treba ciarpliva pracavać, šukać, što abjadnoŭvaje, nie davać kryŭdam kiravać nami.
— Vaš vizit u Niamieččynu byŭ pryśviečany nie tolki miemaryjalnym mierapryjemstvam, heta i palityčny vizit. Raskažycie pra jaho vyniki.
— U Niamieččynie ciapier abmiarkoŭvajuć stratehiju pa Ukrainie, dla mianie važna było dabicca, kab za Ukrainaj nie zhubiłasia Biełaruś. My staim pierad pahrozaj straty niezaležnaści, i ŭ Bierlinie mianie pačuli. My damovilisia, što ŭ G-7 padymuć pytańnie Biełarusi, budzie zajava z pazicyjaj. Rychtujemsia da Hienasamblei AAN i płanujem słuchańni ab Biełarusi «na palach». Važna, što Niamieččyna nie pryznaje Łukašenku prezidentam, i padčas sustreč heta prahučała dosyć vyrazna. Ja padziakavała za padtrymku płatformy dla zboru dokazaŭ złačynstvaŭ režymu. Spadziavajemsia, što ŭdasca zrušyć ź miesca spravy va ŭniviersalnaj jurysdykcyi. Padziakavała za mabilny špital, jaki my pieradali biełaruskim miedykam va Ukrainu; mahčyma, budzie bolš dapamohi miedykam. My damovilisia, što Niamieččyna źnimie abmiežavańni na vydaču viz u Minsku: sapraŭdy, Niamieččyna siarod lidaraŭ u vizach. Mnie nie treba było tłumačyć, što režym i narod — roznyja rečy. Usie vialikija ŚMI pišuć pra Biełaruś.
— Vy sustrakalisia z Anhiełaj Mierkiel. Ci budzie sustreča ź ciapierašnim kancleram Ołafam Šolcam? Nakolki va ŭmovach vajny tema Biełarusi aktualnaja dla niamieckich palitykaŭ?
— Ja sustrakałasia z Ołafam Šolcam minimum dvojčy, ale da taho, jak jon aficyjna zastupiŭ na pasadu. U nas dobryja adnosiny: ź im i jaho kabinietam. 21 lipienia ja sustrełasia z kiraŭnikom jaho administracyi, my razmaŭlali paŭtary hadziny. Šmat uvahi pryśviacili palitviaźniam, supolnym dziejańniam u mižnarodnych arhanizacyjach, abmierkavali scenaryi raźvićcia padziej u vypadku ŭstupleńnia biełaruskich vojskaŭ va Ukrainu. Biełaruś ciapier najpierš cikavaja ŭ kantekście vajny z Ukrainaj; tut razumiejuć, što, kali b nie Łukašenka, mahčyma, i vajny nie było b. Cikava, što ŭradavaja kaalicyja i apazicyja ŭ niejkaj stupieni spaborničajuć u pytańniach Biełarusi: chto bolš robić. Vialikuju spravu robić biełaruskaja dyjaspara, arhanizacyja «Razam» nie daje Biełarusi pakinuć paradak dnia.
