«Sałdaty i aficery Respubliki Biełaruś, vas pravakujuć na ŭdzieł u vajskovaj ahresii suprać Ukrainy, niapraŭdaj prymušajuć udzielničać u zachopnickaj vajnie», — adznačajecca ŭ śpiecyjalnym videazapisie, raspaŭsiudžanym upraŭleńniem stratehičnych kamunikacyj Uzbrojenych sił Ukrainy.
U videazvarocie nahadvajecca, što biełaruski i ŭkrainski narody majuć supolnuju historyju i dośvied supolnaj baraćby z voraham.
«Siońnia vorah pryjšoŭ na našu ziamlu. Vorah podły i padstupny. Vorah, jaki hvałtuje i zabivaje dziaciej, žančyn, starych. Vorah, jaki nanosić rakietnyja avijacyjnyja i artyleryjskija ŭdary pa žyłych masivach i cyvilnaj infrastruktury, u tym liku z terytoryi Respubliki Biełaruś», — adznačajecca ŭ zvarocie.
Asobna padkreślivajecca, što niahledziačy na toje, što rasijskija vojski zajšli z terytoryi Biełarusi i mienavita ź biełaruskaj terytoryi abstrelvajecca Ukraina, ukrainskija vojski nie pačali abstrelvać u adkaz biełaruskuju terytoryju.
«My hatovy sustreć vas tvar da tvaru. Pryjdziecie ź miram — sustreniem jak bratoŭ, pryjdziecie z vajnoj — sustreniem, jak i pucinskija ordy, ahniom i śvincom. Vy sami bačyli, na što zdolnaja naša armija, jakaja abaraniaje svoj narod i svaju rodnuju ziamlu ad zachopnikaŭ. Bačyli karavany refryžerataraŭ z trupami akupantaŭ, bačyli pierapoŭnienyja rasijskimi zachopnikami biełaruskija balnicy i morhi. My zmožam abaranić siabie, tym bolš, što siońnia z Ukrainaj — ceły śviet», — adznačajecca ŭ zvarocie.