Budavać abjekt pa adrasie Internacyjanalnaja, 38 pačali ŭ 2017 hodzie. Za niekalki hadoŭ da hetaha na Kastryčnickaj płoščy źnieśli były muziej VAV. Budaŭnictva tady mnohija minčuki ŭspryniali niehatyŭna. Ličyli, što budynak nie ŭpisvajecca ŭ architekturu horada, a architektary nazyvali znos muzieja VAV pačatkam maštabnaj biady.
Budaŭnictvam zajmałasia kampanija Dana Holdings — kampanija sierbskich nuvaryšaŭ, jakija atrymlivajuć vyhadnyja ŭčastki dla zabudovy ŭ Minsku i trapili pad sankcyi ES jak nabližanyja da Alaksandra Łukašenki.
Niekalki hadoŭ tamu budynak dabudavali, i siońnia jaho pradajuć pa dahavornaj canie.
«Capital Palace — vaśmipaviarchovy šmatfunkcyjanalny budynak premium-kłasa na centralnaj płoščy stalicy. Znakavaje dla Biełarusi miesca z sučasnymi i histaryčnymi tradycyjami horada i krainy sapraŭdy ŭnikalnaje. Vakoł raźmieščanyja papularnyja i ekskluziŭnyja abjekty i budynki. Budynak pabudavany ŭ 2020 hodzie z vykarystańniem jakasnych materyjałaŭ i sučasnych technałohij. Maje dvuchuzroŭnievy padziemny parkinh na 170 mašynamiescaŭ», — napisana ŭ abjavie.
Realt patelefanavaŭ, kab daviedacca pra canu i ŭmovy.
«Cana dahavornaja. Kankretnych ličbaŭ ja vam nie nazavu. Mnie skazali, što ŭsio budzie zaležać ad zapytu, — adkazaŭ śpiecyjalist, jaki zajmajecca prodažam abjekta. — Ale jakoj by ni była cana, tam nie budzie PDV, jany vyzvalenyja».
Pa słovach śpiecyjalista, uładalniki hatovyja pradavać asobna kožny pavierch. Ale kali znojdziecca kupiec dla ŭsiaho budynka całkam — taksama hatovyja da ŭhody.
«Niejkich abmiežavańniaŭ abo pažadańniaŭ da pakupnika niama. Heta moža być jurydyčnaja asoba, ale kali znojdziecca fizičnaja, taksama hatovyja pradavać».
