Pucin nahadaŭ, što Turcyja i asabista prezident Erdahan «šmat zrabili dla taho, kab była dasiahnutaja damoŭlenaść ab vyvazie ŭkrainskaha zbožža» (u Stambule prajšli pieramovy pad ehidaj AAN).
«Ale pieršapačatkova my stavili pytańnie takim čynam, što heta pavinna być zapakietavana, a mienavita: my budziem sadziejničać vyvazu ŭkrainskaha zbožža, ale zychodzim z taho, što i ŭsie abmiežavańni, źviazanyja z mahčymymi pastaŭkami na ekspart rasijskaha zbožža, buduć źniatyja», — zajaviŭ Pucin.
Napiaredadni ahienctva «Rojtars» paviedamlała, što ES maje namier razmarozić srodki niekatorych rasijskich bankaŭ dla tranzakcyj, źviazanych z charčavańniem i ŭhnajeńniami. Pa danych ahienctva, Jeŭrasajuz moža razmarozić srodki VTB, Saŭkambanka, Navikombanka, Pramsuviaźbanka, VEB, banka «Adkryćcio» i navat banka «Rasija», kantralavanaha blizkim znajomym Pucina.
Na minułym tydni Jeŭrakamisija prapanavała ŭdakładnić sankcyi suprać Rasii — ale tolki tak, kab jany «nijakim čynam nie byli nakiravanyja na sielskahaspadarčuju pradukcyju».
Amierykanskija ŭłady apiaredžvajuć jeŭrapiejcaŭ u hetym kirunku. Jašče na minułym tydni stała viadoma, što ZŠA dazvalajuć tranzakcyi z Rasii, źviazanyja z uhnajeńniami, charčavańniem, pasiaŭnymi materyjałami, lekami i miedabstalavańniem. Na hetaje rašeńnie ŭ Tehieranie źviarnuŭ uvahu Pucin.
«Jak vy viedajecie, skažam, abmiežavańni, źviazanyja z pastaŭkami na suśvietny rynak rasijskich uhnajeńniaŭ, amierykancami faktyčna źniatyja. Spadziavajusia, što toje ž samaje, kali jany ščyra chočuć palepšyć situacyju na suśvietnych rynkach, adbudziecca i z pastaŭkami na ekspart rasijskaha zbožža», — skazaŭ jon paśla pieramovaŭ. Pucin śćviardžaje, što zachodnija krainy ŭziali na siabie abaviazacielstvy «usio heta zapakietavać», i «nichto nie piarečyŭ da hetaha času, u tym liku i amierykanskija našy partniory».
Vašynhton, kamientujučy vizit Pucina ŭ Tehieran, vykazaŭsia vielmi skieptyčna. Hety vizit demanstruje, nakolki Maskva izalavanaja, zajaviŭ kaardynatar Rady nacbiaśpieki Biełaha doma Džon Kirbi.
