«My bačym značny masiŭ dokazaŭ z raźviedvalnych i adkrytych krynic ab tym, što Rasija płanuje sprobu anieksavać dadatkovyja ŭkrainskija terytoryi. Rasija pačynaje abjaŭlać, možna skazać, svaje «praviły i ŭmovy» anieksii, jak heta było ŭ 2014 hodzie.
Rasija ŭžo pastaviła nielehitymnych kantralavanych asob na terytoryjach, jakija jana kantraluje. I my viedajem jaje dalejšyja kroki: spačatku hetyja «kiraŭniki» arhanizujuć pastanovačny refierendum ab dałučeńni da Rasii, potym Rasija vykarystoŭvaje hetyja «refierendumy» ŭ svajoj sprobie anieksavać novyja terytoryi Ukrainy», — skazaŭ jon.
Ź jahonych słoŭ, rasijski ŭrad ciapier razhladaje płan anieksii častak Chiersonskaj i Zaparožskaj abłaściej, a taksama całkam — Danieckaj i Łuhanskaj. Maskva ŭžo pačała padrychtoŭku da takoha kroku: uviała ŭ abarot rubli na akupavanych terytoryjach, błakuje dostup da Internetu, pieraśleduje ludziej z praŭkrainskimi pohladami i ŭstaloŭvaje kantrol nad ŚMI.
«Kreml nie abviaščaŭ času praviadzieńnia hetych refierendumaŭ, ale ichnyja namieśniki kazali, što jany adbuducca ŭ hetym hodzie, vierahodna razam z rehijanalnymi vybarami ŭ Rasii 11 vieraśnia», — adznačyŭ pradstaŭnik Biełaha doma i nahadaŭ, jak Rasija ŭ pačatku poŭnamaštabnaha ŭvarvańnia zajaŭlała, što ŭ jaje płany nie ŭvachodzić akupacyja Ukrainy.
«Kali Rasija ŭsio ž ŭvasobić u žyćcio svaje płany pa anieksii, naš adkaz budzie chutkim i ćviordym — i supolnym z našymi sajuźnikami i partniorami. Na Rasiju nakładuć dadatkovyja sankcyi, jana stanie jašče bolšym izhojem, čym ciapier. My nikoli nie pryznajem nijakija «anieksavanyja Rasiejaj terytoryi», — padkreśliŭ Kirbi.
Jon dadaŭ, što Ukraina, vierahodna, zmoža advajavać časova akupavanyja Rasijaj terytoryi vajennym šlacham.
Taksama Kirbi zajaviŭ, što na hetym tydni Administracyja prezidenta ZŠA abvieścić ab novym pakiecie dapamohi Ukrainie, kudy ŭvojduć, aproč inšaha, dadatkovyja RSZA M142 HIMARS.
Pa jahonych słovach, ukrainskija vajskoŭcy vielmi efiektyŭna vykarystoŭvajuć amierykanskuju zbroju dla stvareńnia pieravahi na poli boju.
