Julija i jaje palitźniavoleny muž Ihar Łaptanovič — aktyvisty z Pružanaŭ, jakija ciapier znachodziacca za kratami. Na voli ich čakajuć troje dziaciej.
Nahadajem, muža i žonku asudzili 4 žniŭnia 2021 hoda ŭ Breście pa «spravie karahodaŭ» za padziei 13 vieraśnia 2020 hoda, kali pratestoŭcy vadzili karahod i śpiavali pieśni, a ich razahnali vadamiotam. Tady Ihara asudzili da dvuch z pałovaj hadoŭ kałonii, a Juliju — da troch hadoŭ «chatniaj chimii». Praź niekalki miesiacaŭ paśla vyniasieńnia prysudu, 13 kastryčnika 2021 hoda, doma ŭ Julii prajšoŭ pieratrus, paśla jakoha jaje zatrymali ŭ miežach novaj kryminalnaj spravy.
Jak paviedamlaŭ Śledčy kamitet, padčas dopytu Julija raspaviała, što ŭ lipieni minułaha hoda ŭ sacsietkach ź joj źviazaŭsia karystalnik, jaki prapanavaŭ finansavuju padtrymku za pradastaŭleńnie infarmacyi ab słužbovych asobach, jakija ažyćciaŭlali ŭ dačynieńni da jaje siamji kryminalny pieraśled.
Žančyna pahadziłasia praź ciažkaje materyjalnaje stanovišča, bo vychoŭvaje traich niepaŭnaletnich dziaciej, a muž znachodzicca ŭ kałonii. Paviedamlajecca, što šmatdzietnaja maci vykanała ŭsie ŭmovy surazmoŭcy i atrymała hrašovy pieravod na sumu bolš za 500 jeŭra. Akramia hetaha, na rachunak abvinavačanaj pieravodzilisia hrošy, jakija jana pieradavała svaim znajomym u jakaści finansavaj dapamohi z-za miažy. Łaptanovič nibyta pieradała infarmacyju pra piersanalnyja danyja i dziejnaść słužbovych asobaŭ svajoj znajomaj, u jakoj byŭ vychad na «ekstremisckija tielehram-kanały». Usie źviestki byli apublikavanyja, a paciarpiełym, jak śćviardžaje śledstva, pastupali pahrozy i abrazy ŭ suviazi z vykanańniem imi słužbovych abaviazkaŭ.
14 lipienia na sudovym pasiadžeńni prakuror zapytaŭ dla Julii piać hadoŭ kałonii, a taksama štraf u pamiery 100 bazavych vieličyń (3200 rubloŭ).
18 lipienia Łaptanovič pryznali vinavataj pavodle šaści artykułaŭ Kryminalnaha kodeksa: art. 188 (paklop); č. 1 art. 13 art. 369 (stvareńnie ŭmovaŭ dla ździajśnieńnia abrazy pradstaŭnika ŭłady); č. 1 art. 1 art. 389 (stvareńnie ŭmovaŭ dla ździajśnieńnia pahrozy ŭ dačynieńni da sudździ); č. 6 art. 16 i č. 1 art. 366 (sadziejničańnie pahrozie hvałtam u dačynieńni da słužbovaj asoby); č. 3 art. 203-1 (niezakonnyja dziejańni ŭ dačynieńni da piersanalnaj infarmacyi); č. 1 art. 361-4 (sadziejničańnie ekstremisckaj dziejnaści). Sudździa Viktar Siańko vynies prysud — piać hadoŭ kałonii va ŭmovach ahulnaha režymu i štraf u pamiery 19 bazavych vieličyń (608 rubloŭ). Taksama sud pastanaviŭ spłacić 5000 rubloŭ maralnaj kampiensacyi na karyść adnaho paciarpiełaha prakurora.
Padtrymajcie Juliju banderolami, pasyłkami, hrašovymi pieravodami i listami salidarnaści pa adrasie:
Turma №1, 230023, h. Hrodna, vuł. Kirava, 1,
Julija Alaksandraŭna Łaptanovič.
Padtrymajcie Ihara:
PK №3, 211322, Viciebskaja vobłaść, h.p. Vićba.
