Śviatłana Cichanoŭskaja zastajecca suśvietna pryznanym lidaram ruchu za vyzvaleńnie Biełarusi. A jaje muž, Siarhiej Cichanoŭski, asudžany na 18 hadoŭ turemnaha źniavoleńnia
U pačatku hetaha tydnia ŭ Bierlinie prajšoŭ t. zv. «forum demakratyčnych siłaŭ Biełarusi». Heta ŭžo druhoje mierapryjemstva pad takoj ambicyjnaj nazvaj, pieršaje prajšło ŭ mai ŭ Varšavie. Ale kali tady jano nie vyklikała asablivaha rezanansu ŭ biełaruskich miedyja, to ciapier cikavaść z boku ŚMI, palityzavanych telehram-kanałaŭ i karystalnikaŭ sacyjalnych sietak była kudy bolšaja. Bo hetym razam kudy bolš artykulavana, čym minuły raz, prahučała stratehičnaja meta sklikańnia hetych mierapryjemstvaŭ — skidańnie z pjedestała ci prynamsi adsoŭvańnie na druhasnyja roli z kiraŭnictva biełaruskaha demakratyčnaha ruchu «nieadpaviednaj biahučamu momantu» Śviatłany Cichanoŭskaj i zamiena jaje na «bolš rašučych» lidaraŭ.
Najbolšy rezanans vyklikali dva rezka krytyčnyja ŭ dačynieńni da Cichanoŭskaj i jaje kamandy vystupy — byłoha staršyni Viarchoŭnaha Savieta 13-ha sklikańnia Siamiona Šareckaha i byłoha paśpiachovaha restaratara, a ciapier adnaho sa stvaralnikaŭ biełaruskaha pałka «Pahonia» ŭ składzie ŭkrainskaha vojska Vadzima Prakopjeva. I kali 85-hadovy Šarecki — admysłova pad patreby forumu vyciahnutaja z zabyćcia palityčnaja fihura z zusim inšaj epochi, vystupleńnie jakoj u 2022 hodzie ŭsprymajecca chutčej jak kurjoz, to Prakopjeŭ — sprava inšaja. Jon čałaviek u poŭnym roskvicie siłaŭ, ź vidavočnymi palityčnymi ambicyjami, niakiepski aratar. Nie dziŭna tamu, što jahonaje vystupleńnie na ŭ cełym blakłym forumie aktyŭna cytavałasia i nabyło šyroki rezanans. Tym bolš što sam vystupoŭca, treba dumać, całkam śviadoma zrabiŭ jaho vielmi pravakacyjnym.
Prakopjeŭ, jak i mnohija inšyja śpikiery nie tolki na hetym mierapryjemstvie, bačyć krynicu našych ciapierašnich prablem u «adsutnaści palityčnaha lidarstva». Śviatłana Cichanoŭskaja, na jahonuju dumku, jaŭna nie maje jakaściaŭ, kab być lidaram u sučasnych abstavinach, choć Prakopjeŭ i pryznaje, što tak prosta jaje z karabla historyi nie skinieš, bo nichto inšy nie maje mandata ad biełaruskaha naroda i, adpaviedna, lehitymnaści ŭ vačach suśvietnaj supolnaści.
Tamu były restaratar vykazvaje aryhinalnuju ideju, što najbolš aptymalnym varyjantam było b nie pazbaŭlacca Śviatłany Hieorhijeŭny całkam, a adsunuć jaje ŭbok: kali ŭžo mižnarodnaja supolnaść tak jaje lubić, to chaj sabie Cichanoŭskaja vykonvaje čysta pradstaŭničyja funkcyi, sustrakajecca ź lidarami zachodniaha śvietu i havoryć ź imi ni pra što. Ale pobač ź joj musić być rašučy premjer-supiermien, «biełaruski Čerčyl», jaki b zajmaŭsia realnymi spravami. Jak vykazaŭsia Prakopjeŭ: «Cichanoŭskaja pje harbatu z Džo Bajdenam, pakul u susiednim pakoi premjer-ministr razmaŭlaje ź ministram abarony Ościnam». A paśla «premjer-ministr raz u čaćvier asabista dakładvaje karalevie Lizaviecie pra naša prasoŭvańnie na frantach, paźbiahajučy padrabiaznaściaŭ».
Pad «biełaruskim Čerčylem», zapeŭniŭ Prakopjeŭ, jon maje na ŭvazie nie siabie samoha, ale ŭ jaho jość na prykmiecie adna kandydatura: «viedajučy čałavieka asabista, bolš za toje, ja ź im pažyŭ i papracavaŭ, jaki moh by, na moj pohlad, być adnym z kandydataŭ dla našaha biełaruskaha Čerčyla, dla našaha premjer-ministra, i, što vielmi važna ŭ biahučych abstavinach, hetaha čałavieka viedaje ŭsia Ukraina. My prajechali ź im paŭkrainy, ad Čarnihava da Lvova, i na kožnym błokpastu jaho paznajuć, jaho pavažajuć». Proźvišča ni tady, ni ŭ nastupnyja dni pakul što tak i nie prahučała, što daje padstavy dla samych roznych zdahadak, cho b heta moh być — nazyvajucca, naprykład, imiony byłoha stvaralnika «Biełaha lehijona» Siarhieja Čysłava (Bulby), śpievaka Siarhieja Michałka ci byłoha kamandzira bresckaha desantu Valeryja Sachaščyka.
Na ŭsio heta možna było b i nie źviartać asablivaj uvahi, pakolki pramova Prakopjeva na forumie maje ŭsie prykmiety zvyčajnaha papulizmu. Adna intryha ź nienazyvańniem imia «sapraŭdnaha lidara» čaho vartaja — vidavočna heta zroblena tolki z metaj stvareńnia štučnaha ažyjatažu. Čałaviek asabista pijarycca, i robić heta dastatkova ŭmieła.
Ale ŭ toj ža čas nielha nie pryznać, što śpič Prakopjeva — nie tolki jahonyja asabistyja fantazii, jon u bolšaj ci mienšaj stupieni adlustroŭvaje sučasnyja nastroi častki biełarusaŭ. Jakija ŭ tym, što dabicca svaich metaŭ my možam tolki ŭzbrojenym šlacham i dla hetaha musim zamianić raniejšych palityčnych lidaraŭ, jakija za mirnuju baraćbu, na bolš rašučych ludziej. Dakładniej, bolš rašučaha čałavieka: «supiermien» pavinien być na samym viersie i źjaŭlacca tvaram našaha ruchu.
Takija pohlady — adbitak žyvučych stereatypaŭ pra viertykal ułady jak ledź nie najbolš efiektyŭny sposab kiravańnia pracesami. Što voś treba adziny lidar, jaki budzie razdavać źvierchu zahady, a pad im piramida vykanaŭcaŭ, jakija buduć hetyja zahady dakładna vykonvać. I tady ŭsio budzie iści jak najlepiej. Kali ž Cichanoŭskaja lidar nie takoha kštałtu, to jaje treba zamianić na kahości bolš adpaviednaha, i tady ŭžo ŭsio pojdzie chutčej dy žvaviej.
Ale na samaj spravie toje, što mienavita zhurtavanaść vakoł adnaho čałavieka i adpaviedna poŭnaja zaviazanaść na jaho asobu dajuć najlepšyja vyniki — možna paspračacca. Choć by ŭ kantekście rasijska-ŭkrainskaj vajny vidać, naprykład, što ŭkrainskaja decentralizavanaja sistema pa vyniku pracuje prynamsi nie mienš spraŭna, čym faktyčna viertykalnaja rasijskaja. Uładzimir Zialenski navat padčas vajny tam nie navisaje nad usimi inšymi, tam niama taho, što jość adzin lidar, jaki adnaasobna prymaje ŭsie važnyja rašeńni, a astatnija — tolki pieški ŭ jahonych rukach, pazbaŭlenyja ŭłasnaj subjektnaści. Navat pasady ministra abarony Ukrainy i hałoŭnakamandujučaha USU raźviedzienyja. U toj ža čas śfiera prezientacyi ŭsioj baraćby ŭkrainskaha naroda, vykanańnie funkcyi jahonaha hałoŭnaha tvaru jak unutry krainy, tak i navonki — tut rola Zialenskaha biezumoŭna pieravažnaja, i jon ź joj spraŭlajecca prosta bliskuča, čamu siarod inšaha spryjaje i artystyčnaje minułaje.
Viadoma, najaŭnaść jarkaha, ambicyjnaha i vielmi rašučaha dy charyzmatyčnaha lidara moža adyhrać navat vyrašalnuju rolu ŭ peŭny pikavy momant, kali sychodziacca roznyja zorki i aŭtarytarny režym u krainie pačynaje chistacca. Całkam vierahodna, što jakraz hetaha i nie chapiła biełaruskim pratestam letam-vosieńniu 2020-ha. Nie vyklučana, što moža heta mieć značeńnie i ŭ niejkaj dalokaj ci niedalokaj budučyni, kali dla nas adkryjecca novaje akno mahčymaściaŭ.
Vadzim Prakopjeŭ staŭ adnym z arhanizataraŭ biełaruskaha dobraachvotnickaha pałka «Pahonia»
Ale ŭ situacyi takoha mižčaśsia, jakoje my majem ciapier i jakoje nieviadoma na kolki zaciahniecca, jakraz pamiarkoŭnaja i niekanfliktnaja fihura Cichanoŭskaj, jakaja nie ciahnie koŭdru na siabie i nie sprabuje ŭsich padparadkavać svajoj žorstkaj voli — ci nie idealnaja dla taho, kab zachoŭvać u biełaruskich asiarodkach na emihracyi chacia b adnosnaje adzinstva.
Bo poŭnaje, jak viadoma, moža być tolki na mohiłkach. U kožnym razie naša siła, pry abjektyŭnym niedachopie samych roznych resursaŭ, moža być tolki ŭ adzinstvie.
Charakternaja asablivaść ciapierašniaj struktury biełaruskaha ruchu na emihracyi — što jana ŭsio ž jaŭna nie viertykalnaja, a haryzantalnaja. Jość Cichanoŭskaja sa svaim Ofisam, jakaja źjaŭlajecca simvaličnaj fihuraj i hołasam Biełarusi na mižnarodnaj arenie, jość Nacyjanalnaje antykryzisnaje ŭpraŭleńnie Paŭła Łatuški, jakoje dziejničaje paralelna z Ofisam Cichanoŭskaj, nie ŭ niepasrednym jamu padparadkavańni, ale pakul i nie ŭ varožaści. Jość šerah bujnych inicyjatyŭ, skiravanych na pracu z adpaviednaj aŭdytoryjaj i ŭ adpaviednych śfierach — BYSOL, BYPOL, Biełaruskaja Rada kultury, Fond spartyŭnaj salidarnaści, Rabočy ruch i da t. p. I jašče jość niamała inicyjatyŭ bolš drobnych, jakija hurtujuć dyjasparu na łakalnych uzroŭniach.
Efiektyŭnaść i spraŭnaść kožnaj inicyjatyvy zaležyć ad arhanizacyi pracy niepasredna ŭ joj, i mnohaje, viadoma, zaležyć ad asabistych jakaściaŭ lidaraŭ. U ramkach hetaha artykuła nie miesca raźbirać dasiahnieńni i niaŭdačy kožnaj. Ale pazityŭnym, adnak, źjaŭlajecca toje, što bujnyja i efiektyŭnyja inicyjatyvy pakul što, zdajecca, nie kancentrujucca na vyśviatleńni adnosin pamiž saboj i na zmahańni ź Cichanoŭskaj, nie asprečvajuć jaje prava na ahulnuju reprezientacyju ruchu — im chapaje pakul dla samarealizacyi ŭłasnaj dzialanki. Pretenzii ž na pierafarmatavańnie ŭsioj ciapierašniaj struktury vykazvajuć pieradusim ludzi, jakim zusim nie znajšłosia ŭ ciapierašniaj raskładcy miesca, adpaviednaha ichnym ambicyjam, nakštałt Valeryja Capkały ci Volhi Karač — hałoŭnych arhanizataraŭ taho samaha bierlinskaha forumu. A nie znajšłosia tamu, što ichnija ambicyi — nie ŭ kiravańni niejkaj asobnaj śfieraj, nie ŭ stvaralnaj pracy choć na važnym, ale ŭsio ž abmiežavanym učastku. Jany pretendujuć na kiravańnie rucham uvohule. To-bok heta pretenzii na rolu Cichanoŭskaj.
A Cichanoŭskaja siońnia ŭ hetaj sistemie — nie niejki viarchoŭny pravadyr, jaki kantraluje ŭsio i ŭsich, daje zahady, sočyć za ich vykanańniem i «raz u čaćvier» čakaje ŭsich adkaznych za asobnyja ŭčastki z dakładami. Nie padnačalenyja joj umoŭnyja Stryžak, Azaraŭ ci Budkin, nie spravazdačacca jany pierad joju. Rola Cichanoŭskaj i jaje Ofisa — chutčej kaardynacyjnaja, zasnavanaja nie na farmalnym padparadkavańni ŭsich jaje ŭładzie, a na pryznańni i nie asprečvańni — prynamsi publičnym — inšymi subjektami jaje roli jak adzinaha lehitymnaha pradstaŭnika i kalektyŭnaha hołasu biełaruskaha naroda. Cichanoŭskaja zvyčajna sama nie inicyjuje i nie arhanizuje niejkich aktyŭnaściej — ale jana ich publična padtrymlivaje. I heta bolš-mienš usich klučavych hulcoŭ zadavalniaje, što maje pazityŭnuju rolu. Dumaju, što kali b Cichanoŭskaja stała prajaŭlać aŭtarytarnyja tendencyi i sprabavała ŭsich padmiać pad siabie, to my b mieli siońnia situacyju kudy bolšaha raskołu i ŭzajemnaj varožaści.
U toj ža čas u Ofisa Cichanoŭskaj jość i svoj samastojny ŭčastak pracy — mižnarodnaje pradstaŭnictva supolnaści i reprezientacyja dy abarona jaje intaresaŭ pierad zamiežnymi ŭradami i mižnarodnymi arhanizacyjami.
Nakolki efiektyŭna Cichanoŭskaja na dadzieny momant z hetym spraŭlajecca? Tut mohuć być roznyja dumki ŭ zaležnaści ad vystaŭlenych kryteryjaŭ, ale ŭ kožnym razie pry lubych sprobach davać acenki hałoŭnaje — suadnosić pažadanaje z realnymi mahčymaściami. Abaviazkova treba prymać jak dadzienaść toje, što čaroŭnych pałačak, pry dapamozie jakich možna rabić adnym uzmacham cudy, u pryrodzie niama.
Ale ŭžo adno toje, što navat praz amal dva hady paśla biełaruskaha žniŭnia 2020 hoda intensiŭnaść pracoŭnaha hrafika Cichanoŭskaj i ŭzrovień jaje sustreč pryncypova nie mianiajecca, śviedčyć pra toje, što jaje asnoŭnaja misija prynamsi nie pravalenaja.
Uvohule zabyvacca pra biełaruskaje pytańnie na Zachadzie nie daje, viadoma, i sam Łukašenka, rehularna padkidajučy drovaŭ u, byvała, dobra ŭžo pryhasłaje vohnišča. Ale toje, što apazicyja Łukašenku i jaje pradstaŭnictva ŭ emihracyi dahetul usprymajecca zachodnimi lidarami jak partnior, ź jakim varta mieć znosiny na samym vysokim uzroŭni — tut jość, niesumnienna, i niepasrednaja zasłuha lidaraŭ ruchu, jakija adekvatna razumiejuć biahučuju situacyju, hnutka prystasoŭvajucca pad jaje źmienu i prymianiajuć pravilnyja padychody ŭ pracy z zachodnim palitykumam.
Cichanoŭskaja, moža, tamu i prymajecca tak doŭha ŭ zachodnich stalicach, što ŭ jaje asobie i ŭ jaje atačeńni zachodnija lidary bačać adekvatnych palitykaŭ, ź jakimi mohuć havaryć na zrazumiełaj im movie. Što heta ludzi, jakija nie lotajuć u abłokach i realistyčna hladziać na śviet dy svajo miesca ŭ im. Nie skočvajučysia da epatažnaha papulizmu ni ŭ dziejańniach, ni ŭ rytorycy. Bo biełaruskaja ž supolnaść nie ŭ takim stanie, kab stavić kamuści ultymatumy i demanstravać «rašučaść» z metaj pijaru, nie majučy dla hetaha nijakaha ziamnoha hruntu.
Kiraŭniki realnych dziaržaŭ dy realnych uradaŭ — zanadta zaniatyja ludzi, kab sustrakacca z palitykami ŭ vyhnańni biez realnaj ułady ŭ rukach, kali jany, jak kateharyčna śćviardžaje Prakopjeŭ, «adstali ad paradku dnia». I tym bolš rabić heta rehularna, ledź nie na płanavaj asnovie. Kali sustrakajucca ź Cichanoŭskaj, značyć, nie ličać, što adstała.
I dumka akurat hetych ludziej vartaja ŭvahi, bo jany, u adroźnieńnie ad byłoha biznesoŭca, štodzionna ŭ farmavańni hetaha paradku dnia niepasredna ŭdzielničajuć, i zusim nie na nizavym uzroŭni.
Nu i nie varta ličyć zachodnikaŭ niejkimi durniami, jakim možna padsunuć, kab papić harbaty, piešku, u toj čas jak za jaje śpinaj usim budzie zapraŭlać fierź-supiermien. Takaja pycha da dabra nie davodzić, tym bolš kali ŭ ludziej, jakija strojać takija płany, ułasnych palityčnych dasiahnieńniaŭ pakul niašmat. Nasamreč Cichanoŭskuju ŭ śviecie ŭ samych vysokich kabinietach siońnia prymajuć mienavita tamu, što bačać u joj samastojnuju palityčnuju fihuru z upłyvam na značnuju častku biełaruskaha hramadstva, a nie biazvolnuju maryjanietku, jakuju niechta torhaje za nitački, navat hetaha nie chavajučy. Cichanoŭskaja jak «anhlijskaja karaleva» nie budzie cikavaja Bajdenu i jon prosta nie budzie tracić svoj kaštoŭny čas, kab ź joj sustrecca. Adpaviedna i Ościn nie budzie sustrakacca ŭ susiednim kabiniecie z «supiermienam».
Tamu skinuć z pjedestała Cichanoŭskuju, viadoma, možna. Ale tolki razam ź jaje statusam i zaviazanymi na jaho mižnarodnymi suviaziami. Svaje suviazi treba budzie zdabyvać samastojna, i ŭmieńnie rašuča adčyniać nahoj dźviery moža tut nie dać čakanaha efiektu.
Uvohule z «rašučaści», kali idzie havorka pra vialikuju palityku, a nie bojku ŭ dvary, nie treba rabić kultu. Takaja jakaść, viadoma, u palitycy važnaja, ale heta nie niejki ŭniviersalny čyńnik, što pracuje niezaležna ad kankretnych abstavin i abjektyŭnych umoŭ. Tak, u peŭnaj situacyi jana sapraŭdy mocna patrebnaja i losavyznačalnaja, ale ŭ inšych moža stvarać prosta kamičny (abo trahikamičny) efiekt.
Prosty prykład. Usie my pamiatajem situacyju z sumnaviadomym strajkam, abvieščanym na 1 listapada minułaha hoda Biełaruskim abjadnańniem rabočych na čale ź Siarhiejem Dyleŭskim, jaki za miažoj zbliziŭsia z kołam «Chartyi-97», što źjaŭlajucca prychilnikami «rašučych dziejańniaŭ». Hetyja rašučyja ludzi razvažali tak: navošta «žavać sopli», čakajučy dla strajku spryjalnaha momantu, a da taho pa miery mahčymaści pravodzić patajemnuju padrychtoŭčuju pracu? Daješ zabastoŭku tut i ciapier! Nu i prajavili rašučaść, abjavili strajk z-za miažy. Paśla jon niekalki tydniaŭ ci mo i miesiacaŭ išoŭ virtualna ŭ sacsietkach i ŚMI «radykałaŭ», a na realnych pradpryjemstvach u Biełarusi jaho nichto nie zaŭvažyŭ.
Dyk čaho vartaja takaja pustaja «rašučaść», abapiertaja tolki na słovy, ale nie na choć by jakija dziejnyja struktury, dy prajaŭlenaja ŭ absalutna nie spryjalnaj dla hetaha źniešniaj i ŭnutranaj situacyi? Nijakaj karyści dla spravy jana nie daje, a voś dyskredytacyi ŭ pryncypie pravilnych zadumak jaŭna spryjaje.
Toje ž samaje raspaŭsiudžvajecca i na inšyja śfiery, u tym liku i na farmiravańnie vajskovaj siły. Nu voś ujavim, što ŭ nas źjaviŭsia rašučy lidar, jaki publična zajaviŭ, što ni pra jaki mirny supraciŭ havorki bolš niama, staŭka tolki na ŭzbrojenaje zmahańnie. I što heta mianiaje? Zrazu pad ściahi hetaha lidara stanoviacca tysiačy biełarusaŭ i arhanizujecca biełaruskaje vojska, jakoje idzie brać šturmam Minsk? Ale adkul jany voźmuć zbroju, dzie buduć farmiravacca, chto ich budzie navučać, chto budzie finansavać hetuju oj jakuju niatannuju spravu?
Sajuźniki, pavodle Prakopjeva, Polšča i Brytanija, ale ci buduć jany akazvać biełaruskaj spravie mienavita vajskovuju padtrymku? Na čym hruntujecca takaja ŭpeŭnienaść? Chiba my nie bačym, nakolki ciažka niešta surjoznaje vybivać z krain Zachadu ŭkraincam, nakolki nieachvotna idzie toje ž NATA na niejkija kroki, jakija mohuć patencyjna raśćvialić Pucina i paspryjać niepasrednamu ŭklučeńniu Aljansa ŭ kanflikt jak adnaho z vajujučych bakoŭ? A Brytanija i Polšča — členy NATA, i jany nie zmohuć takija rečy, jak stvareńnie i ŭzbrajeńnie vajskovych farmiravańniaŭ, adkryta zatočanych na zmahańnie ź biełaruskim i rasijskim režymami, rabić biez uzhadnieńnia z partniorami. Navat kali b sami i chacieli.
Zrešty, zychodziačy sa zhadki Prakopjeva, što prapanavanaha im «premjera» pry Cichanoŭskaj «viedaje ŭsia Ukraina», možna mierkavać, što raźlik robicca na stvareńnie biełaruskaha vojska pry ŭkrainskaj armii i pry padtrymcy ŭkrainskaha ŭrada. I heta, viadoma, bolš realistyčna. Ale nie zusim zrazumieła, čym takaja ŭžo kiepskaja forma ciapier najaŭnych nacyjanalnych dobraachvotnickich bataljonaŭ dy pałkoŭ. Užo niekalki miesiacaŭ isnuje połk Kalinoŭskaha, ciapier Prakopjeŭ z adnadumcami nibyta dafarmiravali połk «Pahonia», jaki nieŭzabavie maje pajści ŭ boj. Biełaruskija chłopcy i navat dziaŭčaty, jakija ličać patrebnym ciapier nabiracca realna bajavoha vopytu z prycełam vykarystać heta ŭ budučyni, zdajecca, majuć mahčymaść heta rabić.
I chiba Cichanoŭskaja z usioj jaje «nierašučaściu» čynić hetamu pieraškody, chiba jana vystupaje suprać udziełu biełarusaŭ u hetych farmiravańniach? Zdajecca, jana ŭ svaich publičnych vystupach zaŭsiody kalinoŭcaŭ padtrymlivała i nivodnaha kiepskaha słova pra ich nie kazała.
To navošta dla taho, kab zajmacca farmiravańniem biełaruskich vajskovych padraździaleńniaŭ va Ukrainie, śpiecyjalistam u hetaj halinie treba abaviazkova brać pad kantrol biełaruskaje palityčnaje pradstaŭnictva na Zachadzie? Što heta moža praktyčna dać nie dla asabistych ambicyj asobnych ludziej, a dla kankretnaj spravy? Što, inšy lidar zmoža abjavić usieahulnuju mabilizacyju biełarusaŭ, kab pavialičyć kolkaść vajaroŭ? Nu, abjavić to jon moža, ale ž realizavać heta nijakich realnych miechanizmaŭ niama.
Tak ci inakš, ale apora musić być i nadalej tolki na dobraachvotnikaŭ, a ich kolkaść moža pavialičvacca tolki ŭ vypadku sapraŭdy dobraj pastanoŭki spravy, vysokaha prestyžu i biezdakornaj reputacyi samich farmiravańniaŭ dy ich kamandavańnia. Na žal, raz za razam naziranyja apošnim časam publičnyja vyśviatleńni adnosin to pamiž roznymi pałkami dy bataljonami, to pamiž vajskovymi farmiravańniami dy inšymi strukturami śviedčać chutčej pra advarotnaje. I bajusia, što najbolšaja prablema akurat u hetym, a nie ŭ «nierašučaści» Cichanoŭskaj.
Zrešty, ja nie vyklučaju, što z časam takaja patreba sapraŭdy moža źjavicca, i ŭ peŭny, navat užo i niedaloki histaryčny momant rubam stanie pytańnie, kab na čale biełaruskaha ruchu na samym vysokim uzroŭni źjaviŭsia navat nie «biełaruski Čerčyl», a «biełaruski de Hol», to-bok lidar-vajskoviec. Usio moža być.
Ale prapanova, ahučanaja Prakopjevym ciapier — heta raźmiaščeńnie voza papieradzie kania. Adna sprava, kali b sapraŭdy ŭ najaŭnaści byŭ niejki nadzvyčaj aŭtarytetny čałaviek, jakomu vidavočna ŭdałosia zrabić niejkuju vielmi patrebnuju dla supolnaści spravu, i kab jaje praciahnuć ci pašyryć, patrebnyja dadatkovyja paŭnamoctvy. Ale pakul ničoha nie śviedčyć, što heta tak.
Paŭnamoctvy prapanujecca dać niejkamu pakul navat nie nazvanamu čałavieku faktyčna avansam, pad adno tolki česnaje słova, što jon nie padviadzie. Ale my heta ŭžo prachodzili, na žal. I ničoha ŭ hetym dobraha niama.
Čytajcie taksama:
Navošta biełarusam Cichanoŭskaja?
«Realpolitik — jana takaja». Padalak, Cichanoŭskaja dy naturalnyja i situatyŭnyja sajuźniki Ukrainy
čto za probieł?
t.zv. - zaraz pišacca tolki tak.
https://d367rzjs5oyeba.cloudfront.net/295569