Alaksandr Paŭłoŭski kiravaŭ Dziaržpahrankamitetam, a paśla pracavaŭ u Ministerstvie zamiežnych spraŭ. Fota: skrynšot ANT
«Miljonnaja armija va Ukrainie — heta nie armija, heta prosta miljon čałaviek. Armija — heta najaŭnaść techniki, uzbrajeńnia, padrychtavanych kadraŭ, sfarmavanych padraździaleńniaŭ, jakija prajšli bajavoje zładžvańnie. Hetaha va Ukrainie niama», — skazaŭ Alaksandr Paŭłoŭski.
Takoj zajavaj Paŭłoŭski sprabuje dyskredytavać ukrainskuju armiju, vystavić jaje niejkim zboryščam marhinałaŭ, nacyjanalistaŭ i bajevikoŭ. Ale ŭźnikaje pytańnie: kali va ŭkraincaŭ niama padrychtavanych kadraŭ i sfarmavanych padraździaleńniaŭ, to z kim tady vajuje rasijskaja armija (nibyta druhaja armija ŭ śviecie) užo piaty miesiac?
Fota: Armija-Inform
Pośpiechi rasijskaj armii (jakaja realna chacieła ŭziać Kijeŭ za 48 hadzin) bolš čym ścipłyja. Ni łakalnyja, ni hłabalnyja mety pucinskaj «śpiecapieracyi» nie vykananyja: Ukraina zachavała svoj suvierenitet, dziaržaŭny aparat vystajaŭ, instytucyi praciahvajuć svajo funkcyjanavańnie, ukrainskija ŭłady pryznajucca ŭsim śvietam, piensijaniery atrymlivajuć piensii na svabodnych terytoryjach, adnaŭlajecca ekanamičnaja aktyŭnaść. Ukraina nie admoviłasia ni ad demakratyčnaha ładu, ni ad svaich terytoryj, ni ad samastojnaj zamiežnaj palityki, ni ad ukrainskaj movy i identyčnaści. Ukraina atrymała mižnarodnuju salidarnaść i dapamohu ad usiaho zachodniaha śvietu, Rasija — sankcyi, izalacyju i zrujnavany mif pra «druhuju armiju śvietu».
Nasamreč, nichto ŭ Jeŭropie nie maje ciapier takoha dośviedu kiravańnia vojskami padčas realnaj vajny, jak ukrainskija aficery, jakija hartavalisia ŭ realnych bajach.
U adroźnieńnie ad biełaruskaj ci rasijskaj, ukraincy zbudavali decentralizavanuju armiju ź sietkavaj, nieijerarchičnaj strukturaj kiravańnia.
Ukraincy vučyli kamandziraŭ nievialikich padraździaleńniaŭ dumać samastojna, dziejničać hnutka i adraklisia savieckich madelaŭ kiravańnia źvierchu.
Alaksandr Paŭłoŭski praciahvaje:
«Źviartaje ŭvahu, što na pryzyŭnych punktach čerhi nie stajać. Pa aficyjnych danych, u Rasii znachodzicca tolki 2,2 młn hramadzian Ukrainy. Kala 5—6 młn znachodziacca na Zachadzie. Heta značyć, jany vajavać asabliva nie chočuć».
I znoŭ manipulacyja i chłuśnia. Pa-pieršaje, uvieś śviet bačyŭ čerhi kala ŭkrainskich pryzyŭnych punktaŭ u pieršyja tydni vajny, u roznych haradach i miastečkach krainy.
Čarha ŭ vajenkamat Ciarnopala
Pa-druhoje, amal usie ŭkraincy, jakija ciapier znachodziacca za miažoj — heta žančyny i dzieci. Jany i nie pavinny vajavać, heta biežancy, jakija biahuć ad kryvavaj ahresiŭnaj vajny, raźviazanaj Rasijaj. A vyjezd mužčynam pryzyŭnoha ŭzrostu zabaronieny.
