Vilnia: «Ukłaŭ u ramont 2,5 tysiačy jeŭra»
- Pošuk kvatery: krasavik 2022-ha.
- Mietraž: 50 kv. mietraŭ.
- Košt arendy: 550 jeŭra.
— U Litvie na rynku arendy žylla ciapier vialiki ažyjataž. Abjavy doŭha nie visiać. Siabry, jakija raniej pryjechali ŭ Vilniu, raspaviali, što arendadaŭcam treba telefanavać adrazu, jak tolki źjaŭlajecca patrebnaja abjava. Litoŭcy pavažajuć prava pieršynstva, tamu ŭ taho, chto pieršym datelefanavaŭsia i chutka pryniaŭ rašeńnie, bolš šancaŭ.
Niekatoryja šukajuć žyllo praz brokieraŭ. Košt takoj pasłuhi — 200-300 jeŭra, časam miesiačnaja arenda. Ale ja vyrašyŭ spačatku pasprabavać samatuham. Kvatery šukaŭ na en.aruodas.lt — asnoŭny sajt dla pošuku nieruchomaści.
Ja adrazu patelefanavaŭ pa ŭsich prydatnych abjavach i staŭ čakać novych. Dla apieratyŭnaści naładziŭ apaviaščeńnie na telefonie. Było šmat prapanoŭ jeŭradvušak, jakija bolš padychodziać siamiejnym param bieź dziaciej. Ale nam patrebnaja była jeŭratroška z dvuma spalniami (u nas dvoje dziaciej), a takich kvater vystaŭlałasia vielmi mała — 3-4 za sutki. Na ŭsialaki vypadak uklučyŭ u pošuk i dvuchpakajovyja kvatery. Spadziavaŭsia, što trapicca savieckaja dvuška, nie pieraroblenaja ŭ jeŭradvušku, u jakoj jość izalavanaja kuchnia.
Dla razmoŭ z arendadaŭcami vyvučyŭ na litoŭskaj frazu: «Prabačcie, ja nie razmaŭlaju na litoŭskaj» — i paśla hetaha pytaŭsia, ci možam my parazmaŭlać na anhlijskaj ci ruskaj.
Było šmat admoŭ, kali daviedvalisia, što my zamiežniki: prama kazali, što zdajuć tolki litoŭcam. Byli admovy z-za taho, što my ź dziećmi, i jašče z-za taho, što chočam u pierśpiektyvie pieravieźci kata.
Z adnoj haspadyniaj, jakaja zdavała dobruju jeŭratrošku za 800 jeŭra ŭ dobrym miescy, my amal damovilisia. Ale ŭ jaje nie akazałasia formy damovy na anhlijskaj movie, tamu jana prapanavała pieranieści ŭsio na nastupny dzień. A nazaŭtra dasłała paviedamleńnie, što kvatera zdadzienaja inšym ludziam, i pažadała pośpiechaŭ.
Bolš šancaŭ arandavać kvateru ŭ Vilni, kali jość litoviec, jaki moža za vas paručycca i raskazać arendadaŭcu, jakija vy dobryja ludzi. Naprykład, znajomym biełarusam tak dapamoh ich litoŭski siabar.
My ŭ vyniku znajšli kvateru praz try dni intensiŭnych pošukaŭ. Ja pieršym patelefanavaŭ haspadaru, jon byŭ hatovy zdać kvateru siamji zamiežnikaŭ ź dziećmi i chatnimi žyviołami. My damovilisia pra sustreču. Praz 4 hadziny paśla źjaŭleńnia abjavy na sajcie ŭ nas była padpisanaja damova arendy.
Kvatera, jakuju my zdymajem, — dvuchpakajovaja stalinka z dvuma izalavanymi spalniami i raździelnym sanvuzłom, z vysokimi stolami. 550 jeŭra za miesiac. Kvatera dastałasia ŭ mocna zapuščanym stanie (da nas u joj žyli pažyłyja ludzi). Niepryjemny pach, ciakuć truby, advalvajucca špalery, prapaleny niedakurkami linoleŭm, pylnyja kanapy. Ale nas heta nie źbiantežyła. My vyrašyli, što lepš ciapier zekanomim na arendzie i ŭkładziem hrošy ŭ kaśmietyčny ramont.
U ramont ukłali bolš za 2,5 tysiačy jeŭra, ź ich tysiaču jeŭra nam kampiensavaŭ haspadar. Ramont ja rabiŭ samastojna — pa viečarach i vychadnych na praciahu troch miesiacaŭ.
Varšava: «Haspadary ŭvažliva vyvučali Linkiedyn»
- Pošuk kvatery: krasavik—maj 2022-ha.
- Mietraž: 47 kv. mietraŭ.
- Košt arendy: 800 jeŭra (z usimi płaciažami).
U Varšavu pierajechała z Kijeva. Žyllo šukała razam z chłopcam. Na pošuki spatrebiłasia bolš za dva tydni. Uvieś hety čas žyli ŭ siabroŭki.
Haspadary kvater uvažliva vyvučali Linkiedyn, šmat pytalisia ab pracy. Chtości detalova raspytvaŭ pra staŭleńnie da ŭłady ŭ Biełarusi, kahości pałochała, što my pierajechali z Kijeva, usio voś-voś skončycca i my vierniemsia, a ŭłaśniku daviadziecca znoŭ šukać žycharoŭ.
Adzin z ułaśnikaŭ (žyvie ŭ Stakholmie) vybiraŭ žycharoŭ u niekalki etapaŭ. Spačatku my razmaŭlali ŭ Fejsbuku: jon raspytvaŭ, dzie my pracujem, čamu my ŭ Polščy. Praź dzień jon napisaŭ, što ja pakinuła pryjemnaje ŭražańnie i jaho začapiła naša suviaź sa Šviecyjaj (moj chłopiec pracuje ŭ biełaruska-šviedskim daśledčym centry). U vyniku my patrapili ŭ jaho šort-list.
U Calendly treba było zabraniravać słoty, kali zručna pryjści pahladzieć kvateru. Paśla hetaha nam pryznačyli dzień i čas.
Zatym haspadar uziaŭ čas na apracoŭku infarmacyi, paśla čaho ź dźviuma parami, u tym liku z nami, pravioŭ starannaje intervju ŭ Zoom na 40 chvilin. Ale pa vyniku kvatera dastałasia inšaj pary.
U vyniku znajšli dvuchpakajovuju kvateru ŭ samym centry za 800 jeŭra (arenda + usie płaciažy). Paśla taho jak uzhadnili ŭsie pytańni z haspadarami, treba było pačakać jašče kala troch tydniaŭ, kab ułaśniki źjechali. Darečy, jany vyvieźli ŭsio, akramia mebli. Navat matrac i posud. Pry zasialeńni nie było z čaho vady papić.
Poznań: «Pašancavała — nie daviałosia płacić 300 jeŭra za kavałak papiery, jaki jašče i pravieryć nielha»
- Pošuk kvatery: červień 2022-ha.
- Mietraž: 80 kv. mietraŭ.
- Košt arendy: 3000 złotych (z ulikam inšych płaciažoŭ).
Fota: pixabay.com
— Pracuju ŭ EPAM. Pytańni z arendaj kvater u Polščy supracoŭniki kampanii mohuć vyrašyć praz epamaŭskija mihranckija čaty. Tam možna znajści ludziej, jakija dapamohuć. Pracuje heta tak: ty šukaješ abjavy i prydatnyja varyjanty i skidvaješ takomu pamahatamu. Dalej jon źviazvajecca pa telefonie z arendadaŭcam i viadzie ź im pieramovy.
U Polščy jość arendadaŭcy, jakija nie žadajuć źviazvacca z zamiežnikami, navat z ajcišnikami. I taki makler raskazvaje haspadaram fejkavyja historyi, što kvateraj cikaviacca niejkija jaho svajaki. Za svaje pasłuhi takija pamahatyja biaruć kala 150-200 jeŭra.
Jašče adna asablivaść, ź jakoj sutyknulisia ŭ Polščy — niekatoryja haspadary kvater patrabujuć ad arandataraŭ list, jaki paćviardžaje, što vam jość dzie žyć u vypadku, kali vas pa niejkich pryčynach vysielać z arandavanaha žylla. Kab zrabić taki list, vam treba znajści jašče adnaho ŭłaśnika nieruchomaści ŭ Polščy, jaki hatovy piśmova paćvierdzić zhodu na vaša pražyvańnie ŭ jaho kvatery. Taki list dazvalaje arendadaŭcy vysielić vas z kvatery, kali vy, naprykład, pierastali płacić za arendu (inakš, pa polskim zakanadaŭstvie, vysialeńnie arandataraŭ ź dziećmi moža stać prablemaj dla ŭłaśnikaŭ žylla. — red.).
Pradastaŭleńnie takoha lista pieratvaryłasia ŭ ceły biznes — kaštuje pasłuha 150-300 jeŭra. Praŭda, navat kali ŭ vas budzie taki list, pravieryć sapraŭdnaść infarmacyi vy nie zmožacie. Heta možna zrabić pa kadastravaj bazie, ale jana dastupnaja tolki palakam.
Mnie pašancavała. Nie pryjšłosia płacić 300 jeŭra za kavałak papiery, jaki jašče i pravieryć nielha. Trapiłasia adekvatnaja haspadynia, jakoj my dali dvuchmiesiačny zakład.
A znajšoŭ kvateru vypadkova — ubačyŭ abjavu ŭ Fejsbuku. U kvatery vialikaja haścioŭnia, vialikaja kuchnia, spalnia i kabiniet plus svaja parkoŭka i vialiki bałkon. Nam dazvolili žyć z sabakam. Za kvateru płacim kala 3000 złotych na miesiac: 2700 złotych — arenda, 200 złotych — kamunałka, kala 80 złotych — internet (300 mbit/siek). Darečy, nie va ŭsich jość takoje ščaście, u niekatorych u kvaterach jašče staić ADSL.
Urocłaŭ: «Zapłaciŭ za hod napierad»
- Pošuk kvatery: krasavik 2022-ha.
- Mietraž: 50 kv. mietraŭ.
- Košt arendy: 3400 złotych (z ulikam inšych kamunalnych płaciažoŭ).
Kvateru šukaŭ doŭha — uvieś krasavik. Uvieś hety čas zdymaŭ kvateru na airbnb, patraciŭ 1300 dalaraŭ.
Arendadaŭcy ŭsio jak adzin kazali, što ŭ ich čarha i jany addajuć pryjarytet palakam, a taksama najmalnikam bieź dziaciej i žyvioł (u mianie kot). Ale pakolki popyt u asnoŭnym farmujuć ukraincy i biełarusy, to vyrašalnym faktaram jašče stanovicca płaciežazdolnaść.
Kab arandavać u vyniku kvateru, mnie pryjšłosia zapłacić za hod napierad — kala 40 tysiač złotych bankaŭskim pieravodam. Vykarystoŭvaŭ hatoŭku, pryviezienuju ź Biełarusi. U banku skazali bolš tak nie rabić, inakš na takija sumy mohuć źviarnuć uvahu i abaviazać zapłacić padatak.
Chacia haspadynia skazała, što joj važna, chto mienavita žyvie, a nie kolki hrošaj płacić. Tamu prabivała mianie staranna. Pravieryła ŭsie dakumienty, usie sacsietki, bankaŭski rachunak. Zapatrabavała daviedku ad polskaha pracadaŭcy ab tym, što mianie abaviazkova najmuć na pracu ŭ Polščy.
Kvatera dvuchpakajovaja 50-55 kv. mietraŭ, u novym domie, u dobrym rajonie. Adnosna niedarahaja —2600 złotych + 800 złotych kamunalnyja. Traplalisia varyjanty značna daražejšyja — 3500 złotych + 600 kamunalnyja.
Adzinym niepryjemnym siurpryzam kvatery stali muraški. Jak ja zrazumieŭ, muraški i prusaki tut — častaja źjava. Ale haspadary pakinuli śpiecyjalny srodak i rastłumačyli, jak karystacca. Zdajecca, murašak stała našmat mienš.
Batumi: «Pakul mianiaŭ hrošy, kvatera padaražeła na $100»
- Pošuk kvatery: viasna-leta 2022-ha.
- Mietraž: 26 kv. mietraŭ.
- Košt arendy: 600 dalaraŭ.
U krasaviku my z žonkaj źniali kvateru ŭ apart-hateli z adnoj asobnaj spalniaj. Košt byŭ pavabnym — 400 dalaraŭ za miesiac, tady jak u inšych miescach košty startavali ad 400 dalaraŭ za studyju.
Chacia pieršapačatkova mieniedžar abiacaŭ nam hetuju kvateru za 300 dołaraŭ. Ale pakul ja biehaŭ mianiać hrošy (spatrebiłasia 10 chvilin), košt vyras na 100 dalaraŭ.
Kvatera była nie vielmi śvietłaja, ź vidam na «kałodziež». Heta ŭnutrany dvor, jaki akružany damami. Ale z žonkaj vyrašyli, što nie varta admaŭlacca. Tym bolš vidavočnych prablem pry ahladzie nie ŭbačyŭ, a mieniedžar abiacaŭ usie mahčymyja prablemy vyrašyć ci znajści inšaje žyllo za tuju ž canu. Pa vyniku my źniali kvateru na dva miesiacy z poŭnaj pieradapłataj.
U pieršy ž dzień akazałasia, što pra šmatlikija «drobiazi» mieniedžar zmaŭčaŭ:
- Nie było haračaj vady na kuchni.
- Nie było častki stałovych pryboraŭ (nažoŭ kuchonnych).
- U spalni ad usadki doma pajšło raskolinami škło.
- Razietki vypadali z padrazietnikaŭ.Dzicia ledź tokam nie stuknuła.
- Ad vilhaci pa kutach pajšła čornaja ćvil, adsłojvalisia špalery.
- Vypadali ramy.
- Spružyny ŭ matracy zaržavieli.
- Kran u vannaj praciakaŭ.
- U vannaj raźvialisia makrycy.
- Kandycyjanier žudasna šumieŭ. Jaho admovilisia čyścić. Pry pracy tresłasia ściana, na jakoj jon byŭ zamacavany.
- Sa škłopakieta na bałkon vypadaŭ uščylnialnik, byŭ stały skraźniak.
- Kanapa była padranaja. Pry ahladzie prykryli paduškaj.
- Łaminat nadźmuŭsia i kryšyŭsia.
- Roŭtar stała adklučaŭsia, viečna prasiadaŭ sihnał.
Pa vyniku z usich prablem vyrašyli tolki z kranam u tualecie, uščylnialnikam u dźviery i roŭtaram (zamianiŭ pravajdar).
Pražyli dva miesiacy, bo viartać hrošy nam admovilisia. Pa vyniku my ŭžo byli hatovyja praciahnuć arendu, bo na rynku z červienia košty vyraśli jašče bolš. Ale mieniedžar skazaŭ, što ciapier takaja kvatera kaštuje nie mienš za 750 dalaraŭ. Matyvavaŭ heta tym, što da mora 300 mietraŭ. Na lubyja dovady, što ŭ kvatery absalutna niama ŭmoŭ dla takich koštaŭ, jon kazaŭ, što tańniej nie znajdu.
My krychu pasvarylisia, i ja za dzień znajšoŭ apartamienty płoščaj 26 kv. mietraŭ z asobnaj spalniaj u «Orbi Sici» za 600 dołaraŭ da kanca žniŭnia.
Amsterdam: «Šmat kvater zdajecca biez padłohi»
- Pošuk kvatery: vierasień—kastryčnik 2021-ha.
- Mietraž: 50 kv. mietraŭ.
- Košt arendy: 2000 jeŭra.
U Amsterdamie i ŭ Niderłandach u cełym jość dva hałoŭnyja resursy pa arendzie/kupli nieruchomaści — funda.nl i pararius.nl. Heta markietpłejsy, na jakich raźmiaščajecca bolšaść prapanoŭ ad ułaśnikaŭ kvater.
90% kvater haspadary zdajuć praz ahienctvy nieruchomaści. Kamisiju ahienctvu płacić arendadaŭca.
Adbor najmalnikaŭ žylla adbyvajecca nastupnym čynam.
Arandatar zachodzić na funda.nl i pararius.nl, šukaje prydatnyja varyjanty kvater i afarmlaje śpiecyjalnuju zajaŭku. Jaje vyvučajuć ahienctvy, jakija «adkaznyja» za tuju ci inšuju kvateru. Potym z taboj źviazvajucca pa telefonie ci poštaj, prosiać zapoŭnić padrabiaznuju ankietu i vysłać patrebnyja dakumienty. Vielmi časta, kab navat padać zajaŭku, treba padać pracoŭny kantrakt, pašpart, paviedamić, ci jość žyvioły, dzieci i h.d.
Jak praviła, pryjom zajavak na kvatery zakančvajecca za 1-2 dni, bo achvočych zaŭsiody šmat. Ahienctvy adbirajuć «najlepšyja» zajaŭki i zaprašajuć «pieramožcaŭ» na ahlad kvatery.
Ja sustrakaŭsia z dvuma vidami takich ahladaŭ.
- Ahient damaŭlajecca pra ahlad zahadzia. Na kožny ahlad zareziervavana 15 chvilin. Ahient siadzić ceły dzień u apartamientach i pakazvaje ich, adkazvaje na pytańni.
- Ahient pryjazdžaje na kvateru, zahadzia ŭsim zacikaŭlenym havoryć jaki-niebudź tajm-słot, naprykład, z 12.00 da 16.00. Usie pryjazdžajuć randomna, byvaje, što kvateru adnačasova hladziać adrazu 6-8 čałaviek. Abo ŭsie vystrojvajucca ŭ čarhu, a potym zachodziać pa adnym.
Tyja, kamu kvatera spadabałasia, robiać ofier arendadaŭcu. Ofier moža być na sumu bolšuju, čym paznačana ŭ abjavie.
Pa słovach ahientaŭ, vielmi redka chto dadaje da koštu bolš za 200-300 jeŭra. I tak kvatery vielmi darahija. Ja asabista dadaŭ adzin raz da sumy 150 eŭra. Ale ŭ toj raz ja sam adklikaŭ ofier, bo znajšoŭ inšuju kvateru.
Dalej arendadaŭca vybiraje siarod ofieraŭ. Kali nichto nie spadabaŭsia, usio paŭtarajecca spačatku i moža doŭžycca kolki zaŭhodna.
Ja mianie na pošuk žylla pajšło kala šeść tydniaŭ. Pryjšłosia praciahvać žyllo, jakoje vydzieliła kampanija ŭ ramkach rełakiejtu. Usiaho ja padaŭ 120+ zajavak na ahlad žylla, pravioŭ šeść ahladaŭ i zrabiŭ dva ofiery. U vyniku kvateru źniaŭ u biełaruski, jakaja tut žyvie niekalki hadoŭ.
Kvatera ŭ dobrym rajonie, dzie poŭna restaranaŭ, sportkłubaŭ, parkaŭ i zielaniny. Płošča 50 kv. mietraŭ (asobnaja spalnaja, haścioŭnia i kuchnia). U domie ŭnutrany dvor ź viełaparkoŭkaj.
Košty
Za kvateru ŭ siarednim za miesiac vychodzić amal 2000 jeŭra.
Štomiesiačnyja vydatki:
- arenda —1795 jeŭra;
- internet — 29 jeŭra;
- haz + elektryčnaść — 95 jeŭra;
- vada — 17,6 jeŭra.
Štohadovyja vydatki:
- vyvaz śmiećcia — 72 jeŭra;
- Inhabitans tax — 440 jeŭra.
Nam pašancavała, što ŭdałosia damovicca pakinuć staryja kantrakty na haz, internet, elektryčnaść i vadu, jakija zaklučaŭ jašče naš arendadaŭca. Kali b my sami zaklučali novyja kantrakty, košt byŭ by prykładna na 30% vyšejšym.
Što tyčycca ŭ cełym koštu kvater, tut upłyvaje siezonnaść. Naprykład, samaja haračaja para — heta ź vierasień-kastryčnik. Košty samyja vysokija i kvateru znajści składaniej/daŭžej. Musić, tamu što ekspaty, u asnoŭnym, pryjazdžajuć u hety čas.
Za bedroom apartment (haścioŭnia + spalnia + kuchnia) u centry ci ŭnutry ŭmoŭnaha «MKADA» prosiać ad 1700 jeŭra biez kamunałki. Kamunałka, u tym liku internet, moža abyścisia jašče ŭ 250-350 jeŭra. Zatoje pad novy hod usio naadvarot. Taksama tańniejšaje žyllo možna znajści ŭ turystyčnych miescach, bo nichto nie žadaje žyć siarod šumnych turystaŭ.
Inšyja asablivaści arendy žylla ŭ Amsterdamie
Časta kantrakt na arendu žylla abmiežavany maksimalnym terminam — 2 hady. Tak robiać z-za rostu koštaŭ na nieruchomaść. Praz dva hady toj ža arendadaŭca zmoža vystavić svaju kvateru daražej. A biahučych arandataraŭ nie vyhaniš i nie pavialičyš apłatu. Kantrakty tut pavažajuć, dy i zakon abaraniaje abodva baki.
Šmat kvater zdajecca biez padłohi (łaminat, parkiet). Zachodziš u kvateru, usio pryhoža — stoli, śviatło, kuchnia. A padłohi niama, adzin bieton. Tut darahoje padłohavaje pakryćcio, tamu ludzi zabirajuć jaho z saboj na nastupnuju kvateru.
Šmat kvater biez mebli. Lustry pa centry, jak u nas, taksama redka ŭbačyš. U asnoŭnym u kvaterach kropkavaje aśviatleńnie.
Malmio: «Stajali ŭ čarzie na arendu kvatery ad zabudoŭščyka»
- Pošuk kvatery: listapad 2021-ha.
- Mietraž: 80 kv. mietraŭ.
- Košt arendy: 12,5 tysiač šviedskich kron (kala 1175 dalaraŭ).
Fota: pixabay.com
U Biełarusi žyŭ try hady (pierajechaŭ z Rasii, pracavaŭ u EPAM), ale daŭno chacieŭ rełakavacca. Razhladaŭ roznyja varyjanty (Polšča, Ispanija, Turcyja), ale raptam uźnik varyjant z bujnoj pramysłovaj kampanijaj u Šviecyi, ź jakoj ja ŭ vyniku padpisaŭ kantrakt.
Ofis kampanii znachodzicca ŭ Łundzie. Ale ja ź siamjoj pierajechaŭ u Malmio. Tut ža šukali žyllo.
Rynak zdymnaha žylla ŭ Šviecyi vielmi maleńki. Kali pačynaješ šukać nie nadta papularnyja varyjanty (z žyviołami, tryma spalniami, kali dzieci raznapołyja, dla lehalnaha afarmleńnia adrasa ŭ padatkovuju), to kolkaść prapanoŭ nabližajecca da nula.
Jość niekalki partałaŭ dla pošuku žylla (naprykład, bostad.blocket.se), ale dla nas tam było mała padychodziačych varyjantaŭ. Kali šukaješ praz sajty, to kamunikacyja tolki ŭ čacie. Ale vielmi časta tabie nie adkazvajuć ci adkazvajuć admovaj.
My pieršyja dni žyli ŭ hateli prykładna za 120 jeŭra za sutki sa śniadankam. Chacia zahadzia źniali žyllo na bukinhu. Ale haspadar kvatery stamiŭsia čakać, pakul my pryjedziem, i źjechaŭ a 9-j viečara dadomu, tamu što jamu ŭ 8 ranicy treba było na pracu. A nam terminova treba było niedzie pieranačavać, tamu źniali numar u hateli.
Paśla znajšli tanny apart-hatel, dzie pražyli kala dvuch miesiacaŭ. Jon abyšoŭsia jašče ŭ 2 tysiačy jeŭra. Praz dva miesiacy pierajechali ŭ kvateru płoščaj 70 kv. mietraŭ. Hetuju kvateru my znajšli, kali jašče žyli ŭ Biełarusi. Ale tady jaje paśpieŭ niechta pierachapić. Potym z kvatery arandatar źjechaŭ i haspadar napisaŭ nam na ŭsialaki vypadak.
Miesiačnaja arenda abyšłasia ŭ 12 tysiač šviedskich kron (1100+ dołaraŭ). U hety košt było ŭklučana ŭsio, u tym liku elektryčnaść, aciapleńnie, haračaja vada, internet.
Paśla taho, jak zajechali i atrymali dakumienty (id card), zarehistravalisia na partale boplatssyd.se, kab znajści inšuju kvateru.
Heta płatny partał (300 kron za hod), na jakim vystaŭlajecca žyllo ŭ arendu niepasredna ad zabudoŭščyka. Paśla rehistracyi vy ŭstajacie ŭ čarhu na kvatery. Kožny dzień vam dasyłajuć prapanovy, treba zachodzić, vybirać. Akno dla vybaru vielmi maleńkaje — kala 2-3 dzion. Taksama treba ŭličvać nie vaša miesca ŭ čarzie, a ŭdzieł u čarzie. Naprykład, čarha 20 čałaviek, vy — 15-y. Kali kvatera spadabajecca kamuści, chto ŭ čarzie paśla vas, toje žyllo addaduć jamu.
Košty na kvatery ad zabudoŭščyka vysokija. Tannyja varyjanty ludzi čakajuć hadami, bo popyt na ich vialiki.
Naša čarha padyšła davoli chutka — praz dva miesiacy. 1 žniŭnia my pierajazdžajem u novuju kvateru płoščaj 80 kv. mietraŭ u novym domie. Košt arendy — 12,5 tysiačy kron. Kantrakt biesterminovy.
Pakul nie viedaju, ci možna budzie vykupić hetuju kvateru va ŭłasnaść, ale byŭ by rady takoj mahčymaści. U Šviecyi mnohija kuplajuć žyllo, tamu što košt arendy krychu vyšejšy za košt ipateki.
