VW Passat B6
U Biełarusi ceny na VW Passat B6 pačynajucca z adznaki ŭ 5 tysiač dalaraŭ — stolki prosiać za aŭtamabili pieršych hadoŭ vypusku, jakija, zychodziačy z apisańniaŭ pradaŭcoŭ, znachodziacca daloka nie ŭ samym lepšym stanie.
Fota: skrynšot z sajta av.by
U susiedniaj Litvie VW Passat B6 dasiažny pa cenach ad 1500 jeŭra (tut i dalej my nie budziem pieravodzić jeŭra ŭ dalary, pakolki valuty na siońnia amal parytetnyja).
Fota: skrynšot z sajta autoplius.lt
Padobnaja situacyja z cenami na Passat i ŭ Hiermanii: tam samyja tannyja V6 siarod aŭto biez paškodžańniaŭ aceńvajuć u 1400-1800 jeŭra.
Opel Zafira B
Kampaktven Opel Zafira B u Biełarusi pradajuć pa cenach ad 5-5,5 tysiačy dalaraŭ. Aŭtamabili z paznakaj «u dobrym stanie» pradaŭcy aceńvajuć u 6000-7000 $.
Fota: skrynšot z sajta av.by
Samyja tannyja z Opel Zafira B u Litvie dasiažnyja za 1700-2000 jeŭra. Pry hetym bolšaść darestajlinhavych «Zafir» pradajuć u cenavym dyjapazonie 2500-3500 jeŭra.
Fota: skrynšot z sajta autoplius.lt
BMW 5 e60
BMW 5 sieryi je60, jakuju ŭ narodzie kličuć «lisoj», u Biełarusi pradajuć ad 7000 dalaraŭ.
Fota: skrynšot z sajta av.by
U Litvie padobnyja aŭto vystaŭlajuć na prodaž pa cenach ad 2500 jeŭra, a ŭ Hiermanii — ad 2000 jeŭra.
Fota: skrynšot z sajta mobile.de
Renault Scenic III
Renault Scenic treciaha pakaleńnia pieršych hadoŭ vypusku ŭ Biełarusi kaštuje kala 7500-8000 dalaraŭ. U toj ža čas u Hiermanii ci Litvie anałahičnyja aŭtamabili pradajucca za 3000-4000 jeŭra.
Fota: skrynšot z sajta autoplius.lt
Jak bačym, aŭtamabili 10-15 hadovaha ŭzrostu ŭ Biełarusi kaštujuć u 2-3 razy daražej, čym u ES. Tym nie mienš, heta nie aznačaje, što biełarusam jość sens pryhladacca da pryhonu takich aŭto z-za miažy, pakolki vysokija zaharadžalnyja pošliny zrobiać heta finansava niavyhadnaj spravaj.
Dla taho, kab aŭtamabil z trecich krain było vyhadna impartavać u Biełaruś, jon musić być nie starejšym za 5 hod. To-bok heta mašyny, jakija syšli z kanviera nie paźniej za druhuju pałovu lipienia 2017 hoda. Tamu ŭ druhoj častcy ahladu my skancentrujem uvahu mienavita na takich aŭto.
Passat B8
VW Passat B8 2017 hoda vypusku ŭ Biełarusi kaštuje 17-18 tysiač dalaraŭ, u toj čas jak u Litvie «prachadnyja» V8 pradajucca pa cenach ad 12-14 tysiač jeŭra.
Fota: skrynšot z sajta autoplius.lt
U Hiermanii ci Niderłandach ceny na anałahičnyja aŭto startujuć z adznaki ŭ 11 tysiač jeŭra.
Fota: skrynšot z sajta mobile.de
Ford Mondeo
Mondeo 2017 hoda vypusku ŭ Biełarusi možna znajści ad 15 tysiač dalaraŭ. U Litvie samyja tannyja varyjanty z 5-hadovych Ford Mondeo acenieny ŭ 11-12 tysiač jeŭra.
Fota: skrynšot z sajta av.by
Renault Talisman
Fota: skrynšot z sajta autoplius.lt
Piacihadovyja «talismany» ŭ Biełarusi pradajucca za 15-16 tysiač dalaraŭ. U Hiermanii Renault Talisman 2017 hoda vypusku možna nabyć minimum za 10-11 tysiač jeŭra. U Litvie takija aŭto dasiažnyja pa 11-12 tysiač jeŭra.
Pra toje, što varta viedać dla taho, kab pryhnać aŭtamabil ź ES ci ZŠA, možna pačytać tut.
Čytajcie taksama:
Biełarusy znoŭ mohuć uvozić elektramabili biez spłaty mytu, ale jość niuasy
Biełarusy pieraklučylisia na darahija aŭto ź Jeŭropy i ZŠA. Čamu tak?
