Tak były vajskovy aeradrom Ziabraŭka pad Homielem vyhladaŭ 8 hadoŭ tamu
Pa słovach Ivana, miascovyja žychary kantaktujuć z rasijskimi vajskoŭcami, apošnija pavodziać siabie prystojna, prynamsi jon asabista nie čuŭ, kab kaho zhvałcili i pakryŭdzili.
Što da staŭleńnia miascovych žycharoŭ da rasijskich vojskaŭ, to jano roznaje.
Čym starejšyja ludzi — tym staŭleńnie pazityŭniejšaje, moładź ža «usia suprać. Ličyć ich akupantami». Sam surazmoŭca, choć siaredniaha ŭzrostu, taksama stavicca da rasijan niehatyŭna.
Uvohule abmiarkoŭvać biahučuju situacyju ludzi ciapier bajacca, maŭlaŭ, «navat tyja, chto byŭ suprać Łukašenki, praz strach źmianili svajo mierkavańnie i stali ŭžo havaryć, što nie chočuć Cichanoŭskuju, bo nie chočuć z palakami žyć».
Rasijskaja prapahanda ŭździejničaje na miascovych dastatkova mocna, prynamsi heta bačna, kali zachodzić havorka pra Buču ci Irpień. Mnohija havorać uśled za televizaram, što «heta ŭsio fota— i videamantaž. Niekatoryja navat kazali, što ŭ žycharoŭ Irpieni i Bučy byli biełyja stužki i jany nibyta za rasiejcaŭ byli, tamu ich ukraincy rasstralali».
Razumieńnia taho, što Ziabraŭka ciapier robicca lehitymnaj vajskovaj cellu dla USU, u mnohich miascovych niama.
Adnosna zajavy ŭkrainskaha Hienštaba, što Ziabraŭka pierajšła pad poŭny kantrol Rasii surazmoŭca skazaŭ, što tak było i raniej:
«Tam i tak było stolki vajskoŭcaŭ i stolki techniki, što ni pra što inšaje možna było i nie razvažać».
Rasijskija vajskoŭcy žyvuć nibyta ŭ pałatkach, budynkaŭ tam nijakich užo niama. Choć za savieckimi časami, tam była vialikaja infrastruktura: dyśpietčarskaja vyška, majsterni dla ramontu samalotaŭ. Usie budynki byli. Ale paśla dvuch junakoŭ zavaliła tam plitami, paśla čaho ŭsie budynki ŭzarvali, a miascovaje nasielnictva potym raściahnuła ŭsio heta na cehłu. Zastalisia tolki darohi i «ruložki» (častki lotnaha pola aeradroma, jakija spałučajuć pamiž saboj elemienty lotnaha pola).
Da pačatku vajny zanadta vialikaja prysutnaść rasijskich vojskaŭ była zaŭvažnaja, asabista infarmatar bačyŭ mnohija elemienty rasijskaha ciažkoha ŭzbrajeńnia: «TOS (ciažkuju ahniamiotnuju sistemu) «Sancapiok», vielmi šmat bačyŭ ciažkaj artyleryi husieničnaj, šmat tankaŭ, samachodak. TOS pieravozilii z takimi raźlikami: idzie dva ciahača, tank, TOS, bajavaja mašyna piechoty. Heta była samaja pieršaja partyja. Potym, kali jany viartalisia z Ukrainy, to bačna było, što ciahnuli ŭsialakaje chłamjo, matracy, šmotki, navat budki niejkija sabačyja. I było bačna, što vajskoŭcy złyja».
Druhaja ž partyja rasijskich vajskoŭcaŭ, jakija tudy pryjechali:
«Heta ŭžo byli rakietčyki. Jany ŭstalavali kompleks S-400. Druhaja partyja pryjechała dzieści ŭ druhoj pałovie sakavika. I pryhnali taksama biełaruskich vajskoŭcaŭ. Biełarusy pryjechali na svaich tankach na T-72. Jany ich u lesie zamaskavali. Biełaruskija terminoŭščyki žyvuć u namiotach».
Čytajcie taksama:
Hienštab Ukrainy: Biełaruś addała aeradrom u Ziabraŭcy pad kantrol rasijan
