Kiolnski ŭniviersitet — adzin z zasnavalnikaŭ akademii
Kiolnski i Bonski ŭniviersitety, jakija adnosiacca da najbujniejšych VNU Hiermanii, vyrašyli padtrymać pierš za ŭsio ŭkrainskich daśledčykaŭ i dać im mahčymaść praciahnuć svaju navukovuju dziejnaść u siabie. Ale skarystacca z hetaj mahčymaści mohuć i rasijanie dy biełarusy, jakija musili pakinuć radzimu z-za palityčnaha pieraśledu.
U novuju akademiju zaprašajuć prafiesaraŭ, kandydataŭ navuk i ŭ niekatorych vypadkach aśpirantaŭ. Abiedźvie VNU płanujuć vydzielić dla ich pa dziesiać pracoŭnych miescaŭ u pamiaškańniach univiersitetaŭ. Akramia łahistyki, navukoŭcam abiacajuć padtrymku ŭ vyrašeńni administracyjnych pytańniaŭ.
Stypiendyi pa hetaj prahramie nie praduhledžanyja, ale zasnavalniki akademii abiacajuć dapamahčy z padačaj zajavak na indyvidualnaje finansavańnie ŭ roznyja fondy padtrymki.
Novy prajekt praduhledžany ŭ pieršuju čarhu dla pradstaŭnikoŭ jurydyčnaj i histaryčnaj navuk, palitałohii, a taksama kulturałohii abo linhvistyki. Vyrašalnym dla pryjomu ŭ akademiju źjaŭlajecca tematyčny kirunak pracy vučonaha. Daśledčy prajekt pavinien być źviazany ź Jeŭropaj: jeŭrapiejskija kaštoŭnaści, historyja Jeŭropy, supastaŭleńnie palityčnych i pravavych sistem, paraŭnalnaje movaznaŭstva.
Suiskalniki pavinny viedać anhlijskuju movu, viedańnie niamieckaj pažadanaje, ale nie abaviazkovaje. Pryjom dakumientaŭ budzie doŭžycca da kanca lipienia.
Dakładnyja terminy pačatku pracy «Akademii ŭ vyhnańni» arhanizatary pakul nie nazyvajuć. Spačatku treba budzie nabrać dastatkovuju kolkaść padychziačych kandydataŭ i znajści dla ich finansavańnie. Heta moža zaniać da šaści miesiacaŭ.
Płanujecca, što navukoŭcy praviaduć u Kiolnie abo Bonie dva-try hady, ale šmat što zaležyć ad dalejšaha raźvićcia palityčnaj situacyi. U cełym akademija zadumanaja jak doŭhaterminovy prajekt.
