Malik Chatažajeŭ
Z 1 lipienia kiprskaja kampanija «Varhiejminh Hrup Limited» bolš nie vałodaje dolami ŭ biełaruskaj jurasobie STAA «Hiejm Strym» (vałodała z krasavika 2012 hoda).
Asnoŭnym ułaśnikam (91,84% akcyj) STAA «Hiejm Strym» ciapier źjaŭlajecca hramadzianin Rasii Chatažajeŭ Malik Atchamavič, były hiendyrektar rasijskaha TAA «Lesta».
Minarytarnymi ŭładalnikami STAA «Hiejm Strym» zastajucca Śviatłana Piatrova (Ukraina) i Łarysa Kocikava (Biełaruś).
Adnačasova cikavyja źmieny adbylisia ŭ TAA «Lesta». Malik Chatažajeŭ, jaki 12 hadoŭ zajmaŭ u rasijskaj studyi WG pasadu hiendyrektara, 15 červienia sastupiŭ jaje Juryju Sucharavu. Zatoje sam z 28 červienia atrymaŭ u rasparadžeńnie ad «Varhiejminh hrup Limited» 100% TAA «Lesta».
Padobna na toje, biełaruski Wargaming paśpieŭ uciačy z-pad pastanovy Saŭmina №436 ad 1 lipienia 2022 hoda (ustupiła ŭ siłu krychu paźniej, paśla apublikavańnia), jakaja zabaraniła zamiežnym akcyjanieram 190 jurydyčnych asob (u tym liku i TAA «Hiejm Strym») adčužać doli (akcyi) u statutnych fondach, jakija im naležać, bieź śpiecyjalnaha dazvołu Minfina.
Takim čynam, kiprski «niedružalubny akcyjanier» Wargaming da pačatku lipienia paśpieŭ vyjści z abodvuch jurydyčnych asob — rasijskaj i biełaruskaj. Asnoŭnym uładalnikam abodvuch jurydyčnych asob staŭ rasijski top-mieniedžar WG.
Dahetul supracoŭniki minskaha ofisa WG raspaviadali, što častcy kamandy prapanujuć zastacca ŭ Biełarusi i pracavać na «Lestu». Pry hetym było niezrazumieła, ci idzie havorka ab pieraafarmleńni z adnoj jurydyčnaj asoby ŭ inšuju i likvidacyi TAA «Hiejm Strym». Z ulikam hetych navin možna vykazać zdahadku, što likvidacyja TAA «Hiejm Strym» ciapier nie spatrebicca. Jurydyčnaja asoba moža znachodzicca pad «Lestaj», jakaja ŭ svaju čarhu straciła farmalnuju suviaź z WG.
