Vilnia
U 2017 i 2018 hadach u Litvie pražyvała 46 000-49 000 zamiežnikaŭ, u 2019 hodzie — 58 000, u 2020-m — 73 800, u 2021-m — užo 87 300. U pačatku 2022 hoda vid na žycharstva ŭ Litvie ci nacyjanalnaja viza była ŭ 100 200 zamiežnikaŭ.
Hiestaŭtajte skazała, što bolš za ŭsio časovych vidaŭ na žycharstva vydali biełarusam i ŭkraincam (adpaviedna 20 500 i 19 600). Kala 3600 čałaviek pryjechali z Rasii, mienš za 1000 vidaŭ na žycharstva atrymali hramadzianie Indyi, Uźbiekistana, Kyrhyzstana, Małdovy, Kazachstana, Nihieryi i Hruzii.
Bolš za ŭsio nacyjanalnych viz taksama vydali biełarusam — 21 300, ukraincam — 12 100, rasiejcam — 2800.
Kali splusavać kolkaść VNŽ i nacyjanalnych viz, vydadzienych Litvoj biełarusam, atrymlivajecca, što 41 800 našych suajčyńnikaŭ žyvuć siońnia ŭ Litvie. Heta jak cełyja Kalinkavičy ci Vaŭkavysk.
Chvala emihracyi ź Biełarusi, vyklikanaja žorstkimi represijami suprać hramadzianskaj supolnaści paśla vybaraŭ 2020-ha hoda, uzmacniłasia paśla ŭvarvańnia Rasiei va Ukrainu. Mnohija biznesy sutyknulisia ź niemahčymaściu dalejšaj pracy i vialikimi ryzykami va ŭmovach, kali Biełaruś vykarystoŭvajecca Rasiejaj dla ataki na Ukrainu i pryznajecca suśvietnaj supolnaściu pasiŭnym suahresaram, i pačali aktyŭnuju rełakacyju supracoŭnikaŭ.
Raniej stała viadoma, što dazvoł na žycharstva ŭ Polščy majuć 50 tysiač biełarusaŭ, 45 tysiač ź ich vyjechali z krainy paśla žniŭnia 2020-ha.
