Pa słovach Padalaka, Rasija pastajanna prydumlaje farmaty i kancepcyi viadzieńnia vajny:
1. 72 hadziny — zachoplivajem uradavy kvartał u Kijevie, tak łamajem Ukrainu. Heta nie vyjšła.
2. Zachodzim u Kijeŭskuju vobłaść, ździekujemsia ź ludziej, masavym hvałtam, zabojstvami, kab byli paničnyja nastroi. Heta nie spracavała.
3. Adciskajem Ukrainu ad akvatoryi Azoŭskaha i Čornaha mora, zachapiŭšy ŭschod i poŭdzień Ukrainy.
4. Vajna na ŭschodzie Ukrainy, jakaja, z punktu hledžańnia vajennaj stratehii, idzie na źniščeńnie haradoŭ, jak Maryupal i Sievieradanieck.
5. Kryłatyja rakiety pa žyłych kvartałach — i ź Biełarusi, i z akvatoryj Čornaha i Kaśpijskaha mora.
Apošniaja novaja taktyka — abstreł žyłych damoŭ.
«Jany zmahajucca nie za terytoryju, a kab źniščyć kankretnuju dziaržavu. I pierafarmatavańnie biaśpieki ŭ Jeŭropie. Kali Rasija dadušyć Ukrainu, Jeŭropy jak adzinaj kanhłamieracyi dziaržaŭ, jakija mohuć siabie abaraniać, nie budzie isnavać. Heta meta Rasii», — kaža Padalak.
Pavodle jaho słoŭ, palityčnaja elita Rasii ŭ siońniašnim vyhladzie — absalutna iracyjanalnaja. Im abyjakavyja praviły.
«Jany praktyčna adkryta kažuć śvietu: «A što vy nam zrobicie? My možam zabić peŭnuju kolkaść ludziej, prosta tak, nazaviem heta «śpiecyjalnaja apieracyja». Pačniem bambić harady. Jany demanstratyŭna kažuć, što sami buduć ustaloŭvać praviły. Heta adkrytaja demanstracyja dziorzkich pavodzin na hłabalnym rynku. Heta robić Rasija», — kaža Padalak.
Na jahonuju dumku, taktyka Rasii palahaje ŭ tym, kab napałochać śviet nastolki, kab jon adviarnuŭsia ad vajny va Ukrainie i skazaŭ — «addavajcie ŭsio, što jany chočuć, hałoŭnaje, kab hety žach nie pradaŭžaŭsia, kab my jaho nie bačyli kožny dzień na staronkach svaich haziet, abo ŭ svaim teleefiry».
Jon ličyć, što Rasija i dalej budzie iści pa šlachu eskałacyi. U toj ža čas heta aznačaje, što budzie ŭsio bolš i bolš pramych złačynstvaŭ, jakija pavinny napałochać śviet.
«Mienavita tamu buduć kryłatyja rakiety. Zrešty, jany buduć bić nie pa ŭkrainskaj armii (tamu što rasijanie vielmi bajacca Uzbrojenych Sił Ukrainy), a pa žyłych kvartałach. My pavinny heta razumieć».
