«Niečakana skončylisia sudy! Abvinavačany, asudžany, ale adsiadzieŭ i — volny! Da siamji dajechaŭ, dzieci zažmiakanyja, u mory vykupany. Usim siabram i znajomym, i nieznajomym, jakija dapamahali i pieražyvali — dziakuj, biez vas ja b zdoch», — napisaŭ były palitviazień.
A pra siabroŭ, jakija i siońnia zastajucca pa toj bok krataŭ, adznačyŭ:
«Vy ŭ majoj hałavie kožnuju siekundu».
Alaksandr Vasilevič byŭ uładalnikam rekłamnaha ahienctva Vondel/Hepta i prastory «Halereja Ŭ», saŭładalnikam sajta Kyky.org.
Za kratami Vasilevič znachodziŭsia z 28 žniŭnia 2020 hoda. Pieršapačatkova jaho zatrymlivali ŭ lipieni 2020 hoda, pierad vybarami. Tady jon padavaŭ paručalnictva za vyzvaleńnie Viktara Babaryki, ale byŭ zatrymany i atrymaŭ sutki.
28 žniŭnia, užo paśla vybaraŭ, pryjšli jašče raz. Vasileviča zatrymali, nieŭzabavie stała viadoma, što na jaho zaviedzienaja kryminalnaja sprava.
Alaksandru pahražała da piaci hadoŭ abmiežavańnia voli abo pazbaŭleńnie voli na termin ad troch da siami hadoŭ. Sud nad im prachodziŭ u zakrytym režymie.
Sudździa Maryna Fiodarava 4 lutaha abviaściła prysud: try hady kałonii ahulnaha režymu. Vasileviča vyzvalili ŭ zale suda ŭ suviazi z zakančeńniem terminu pryciahnieńnia da adkaznaści.
Pakul jon znachodziŭsia za kratami, u jaho naradziłasia dačka.
