«Amierykanskija karystalniki Twitter rezka adreahavali na płany Paŭnočnaatłantyčnaha aljansu pavialičyć kolkaść sił chutkaha reahavańnia z 40 da 300 tysiač čałaviek i pašyryć prysutnaść u Jeŭropie. Mnohija karystalniki žachnulisia ad padobnaj zajavy, pakolki ŭpeŭnienyja, što jana moža pryvieści da novaha hłabalnaha sutyknieńnia, raźviazanaha z-za nieabdumanych dziejańniaŭ NATA», — piša RIA Novosti, i za joj paŭtaraje BiełTA.
Dalej pryvodziacca «kamientary» hetych nieabyjakavych amierykancaŭ padobnaha typu.
- «Dazvolcie mnie pierafrazavać: NATA prahnie vajny z Rasijaj».
- «Heta ŭvachodziła ŭ ich płany z samaha pačatku. Nichto nie moža vinavacić u hetym Rasiju, usia adkaznaść lažyć na aljansie».
- «Błok vykidvaje hrošy na viecier, u jaho niama namieru vajavać. Z kim? Z Rasijaj, u jakoj jość jadziernaja zbroja? Dy vy, napeŭna, žartujecie?!»
Užo nie ŭpieršyniu prapahandysty vydajuć kamientary ŭ tvitary za hramadskaje mierkavańnie hramadzian zachodnich krain. Nie pryvodziacca ani vyniki sacyjałahičnaha apytańnia amierykancaŭ, ani vykazvańni ekśpiertaŭ ci lidaraŭ hramadskaj dumki. Niama tam navat replik marhinalnych prakramloŭskich błohieraŭ i manipulatyŭnaha apytańnia minakoŭ na vulicy, dzie śviadoma padabranyja adkazy.
Kali raniej prapahandysty chacia b davali skrynšoty na hetyja kamientary, albo pisali niki, pa jakich hetyja kamientary možna było znajści (i pabačyć, što jany, pieravažna, napisanyja botami), to zaraz abyšlisia i biez hetaha.
Jany prosta pryvodziać «kamientary» nieviadomych «amierykancaŭ» navat bieź niknejmaŭ i skrynšotaŭ i vydajuć ich za hramadskaje mierkavańnie.
Takim čynam, prapahandysty mohuć navat nie tracić hrošy na tvitarskich trolaŭ dla patrymańnia masoŭki. Navošta patrebnyja jany, kali RIA Novosti i tak usio napišuć?
Samit NATA prajšoŭ 28-30 červienia ŭ Madrydzie. Udzielniki sustrečy abviaścili, što Rasija dla aljansu bolš nie partnior, a «pahroza miru i stabilnaści». Pry hetym lidary NATA abviaścili rašeńnie ab novym raźmiaščeńni sił u Jeŭropie.
Padobnaja žorstkaja reakcyja NATA stała adkazam na ahresiŭnyja dziejańni Rasii, jakaja raźviazała vajnu va Ukrainie. Mnohija členy NATA miarkujuć, što krytyčna nieabchodna ŭmacavać uschodni fłanh NATA, kab krainy Bałtyi i Polšča nie stali nastupnymi mišeniami rasijskaha vojska.
