Navošta jechać
Kali biełarus čuje pra Zakapane, jon chutčej zhadaje zimovy turyzm dy hornyja łyžy, i naŭrad ci padumaje pra letniaje padarožža tudy. Ale ž letam polskija hory nie mienš pryhožyja dy vartyja ŭvahi, čym uzimku. Taki adpačynak padydzie amataram aktyŭnaha turyzmu dy tym, chto nie baicca ciažkaściaŭ, ale ž zatoje vy na svaje vočy pabačycie pryrodu redkaj pryhažości i pravierycie svaje siły na niaprostych i nie zaŭsiody biaśpiečnych hornych ściežkach (chacia i małym dzieciam budzie dzie tam pahulać).
Jak dabiracca
Zručniej za ŭsio było b dajechać u Tatry na aŭtamabile, heta taksama b palehčyła pierasoŭvańnie i pa samim Zakapane. Kali ž vy nie majecie takoj mahčymaści i žadajecie skarystacca hramadskim transpartam, možna jechać abo praz Varšavu, abo praź Biełastok.
Dabracca ź Minska da Varšavy možna, naprykład, na aŭtobusie dziaržaŭnych pieravozčykaŭ (šukajcie varyjanty na infobus.by) abo kampanii Ecolines, ceny vahajucca ad 85 da 125 rubloŭ. Takim ža čynam možna znajści bilety i da Biełastoka, ceny — ad 75 da 125 rubloŭ.
Dalej spatrebicca pierasadka. Možna vybrać aŭtobus — ceny na bilety ŭ roznych pieravozčykaŭ startujuć ad 10,5 jeŭra, padabrać bilet možna praz sajt busradar.com. A možna skarystacca polskimi ciahnikami — jany duža zručnyja i kamfortnyja, padobnyja da našych štadleraŭskich elektryčak. Bilety koštam ad 52 złotych (kala 30 rubloŭ) nabyvajcie na sajcie polskaj čyhunki pkp.pl (raździeł dastupny tolki na polskaj movie).
Pa samim Zakapane možna pierasoŭvacca pieššu ci karystacca miascovymi aŭtobusami, bilet na jakija kaštuje 3 złotyja (kala 1,7 rubla, nabyć možna ŭ kiroŭcy ci ŭ biletamacie ŭ aŭtobusie). Chodziać jany nie nadta časta, tamu rychtujciesia da špacyraŭ — tym bolš što vas čakajuć hornyja ściežki!
Jašče trochi karysnaj infarmacyi. Ceny na prosty adnamiesny numar (ci adnapakajovyja apartamienty) u Zakapane startujuć niedzie ad 150 złotych (ad 85 rubloŭ), paabiedać u tradycyjnaj karčmie možna za 50-60 złotych z čałavieka (28-34 rubli). Kali žadajecie bolš biudžetny pačastunak, źviartajcie ŭvahu na miascovyja kafe samaabsłuhoŭvańnia: naprykład, na sietku ŭstanoŭ Bar Mleczny ci na bistro Bar Grota.
Hory
Pačać znajomstva z Tatrami možna z samaj papularnaj viaršyni Zakapane — Hubałuŭki (Gubalówka). Dla hetaha navat nie treba nikudy vyjazdžać z horada: prosta spuściciesia pa centralnaj zakapanskaj vulicy Krupuŭki (Krupowka) da zakapanskaha rynka, pierajdzicie jaho — i voś vy ŭžo la nižniaj stancyi kanatnaj darohi na Hubałuŭku. Ceny na bilet pačynajucca ad 21 złotaha (12 rubloŭ) u adzin bok. Kali ž vy vyrašycie iści pieššu, to patracicie na šlach pa ściežcy, što idzie paralelna kanatnaj darozie, prykładna hadzinu — zatoje atrymajecie niebłahuju treniroŭku pierad bolš składanymi (i bolš cikavymi) viaršyniami.
Naziralnaja placoŭka na Hubałuŭcy. Fota: Gazeta Krakowska / Łukasz Bobek
Kab na svaje vočy pabačyć usiu pryhažość Tatraŭ, a nie tolki Hubałuŭku, dla pačatku treba trapić u Tatranski nacyjanalny park, dzie i znachodziacca usie samyja cikavyja ściežki dy viaršyni. Z Zakapane da roznych uvachodaŭ u park iduć maršrutki, košt pačynajecca ad 4 złotych i moža dachodzić da 15 złotych u vypadku z bolš addalenymi abjektami (ad 2 da 8 rubloŭ). Znajści patrebnuju maršrutku možna na časovym aŭtavakzale, što znachodzicca na parkinhu na vulicy Aleja 3-go Maja, uvachod u park zaraz kaštuje ad 8 złotych (4,5 rubla).
Vam budzie značna lahčej, kali pojdziecie ŭ hory ŭ naležnym abutku. Lepiej admovicca ad basanožak i, kali heta budzie mahčyma, padrychtavać abutak dla trekinhu. Jon maje bolš ćviorduju padešvu, jakaja nie defarmujecca na ściežkach sa składanym reljefam, u dadatak vam nie budzie ślizka — na raźbitych erozijaj kamianiach heta maje značeńnie.
Nie zabudźciesia ŭziać z saboj krychu ježy dy vady, kab padsiłkavacca paśla padarožža, i adzieńnie z doŭhimi rukavami — na bolš vysokich viaršyniach tempieratura moža być zaŭvažna nižejšaja za tuju, što była la ŭvachodu na ściežku. Dobra budzie taksama skarystacca soncaachoŭnaj kaśmietykaj, bo atrymać soniečny apiok paśla špacyru ŭ harach nie ciažka. I padrychtujcie najaŭnyja hrošy, bo ŭ hornych prytułkach časam nielha raspłacicca kartkaju, a vypić kavy ŭ takim prytułku — duža cikavy i pryjemny vopyt.
Top-3 ściežki, pa jakich abaviazkova treba prajścisia
1. Morskie-Oka
Niahledziačy na daŭžyniu (9 kiłamietraŭ u adzin bok!), ściežka da Morskie-Oka — daloka nie samaja ciažkaja, jakuju možna znajści ŭ polskich Tatrach. Usia sprava ŭ tym, što ledźvie nie ŭsia hetaja ściežka ŭjaŭlaje ź siabie asfaltavuju darohu, dy jašče i davoli pakatuju, i tolki ŭ niekatorych miescach možna zrezać šlach praź ściežku pa kamianiach. Možna prajechać amal uvieś šlach na konnaj pavozcy (ceny ad 60 złotych — 34 ruloŭ — u adzin bok), ale i ŭ takim vypadku pryjdziecca iści pieššu niedzie paŭtara kiłamietry, bo pavozki nie dajazdžajuć da voziera.
Vid, jaki adkryjecca vam la voziera, pieraŭzychodzić usie čakańni. Varta prajścisia pa ściežcy ŭzdoŭž vady, kab znajści biaźludnaje miesca i zrabić lepšyja foty — ci prosta adpačyć ź vidam na niepaŭtornuju panaramu.
Kali ŭ vas jašče zastalisia siły, to ad Morskie-Oka idzie ŭvierch niekalki cikavych ściežak, u tym liku i šlach na samuju vysokuju viaršyniu Tatraŭ — Rysy (2503 mietry). Ale ž to ŭžo zadańnie dla padrychtavanych turystaŭ.
2. Dalina Kaścialiska
Kažuć, hetaje miesca asabliva pryhožaje ŭviesnu, kali ŭsia dalina pakryvajecca dyvanom z kvietak. Ale i letam tut možna znajści cikavyja ściežki, jakija pralahajuć to kala hornych rek i ručajoŭ, to ŭ sasnovym lesie, to kala piačor i žyvapisnych łuhoŭ. Tut taksama jość konnyja pavozki, ale ž našmat cikaviej prachodzić uvieś šlach pieššu, bo tolki tak vy dakładna nie prapuścicie pryhožyja tatranskija vidy.
3. Kasprovy Vierch
Kali vy majecie choć troški sumnievaŭ u svajoj fizičnaj padrychtoŭcy, lepiej padymacca na hetuju haru (1987 mietraŭ) na kanatnaj darozie. Heta nie tannaje zadavalnieńnie, bo ceny na bilet startujuć ad 109 złotych (ad 62 rubloŭ) u adzin bok, ale ž šlach na viaršyniu sapraŭdy ciažki.
Na samaj viaršyni pierad vami adkryjecca vid na asnoŭnyja viaršyni Tatraŭ jak na polskim, tak i na słavackim baku. Padrychtavanyja turysty mohuć praciahnuć svoj šlach da niekatorych ź ich — naprykład, da Śvinicy ci Čyrvonych-Vierchaŭ (Czerwone Wierchy). Inšyja ž padarožniki pry najaŭnaści siłaŭ mohuć samastojna spuścicca z hary. Na šlachu da nižniaj stancyi, jak i ŭ vypadkach ź inšymi papularnymi ściežkami, jość horny prytułak, dzie možna padsiłkavacca.
Kali ž vam nadakučać Tatry (naŭrad ci heta mahčyma), to pasprabujcie na dzień-dva pakinuć Zakapane dziela ekskursij pa inšych abjektach paŭdniovaj Polščy. Tut vam i Krakaŭ ź jaho słavutaj historyjaj, i Čenstachova — duchoŭnaja stalica Polščy, i znakamityja salanyja šachty Vialički, i šmat usiaho inšaha. Tolki paśpiavaj dzivicca!
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Prafiesijnaja padarožnica raspaviała, jak źbiracca ŭ pajezdki i jakija try rečy abaviazkova ŭziać z saboj
Češski Raj. Ad zamka da zamka: zachaplalny maršrut dla piešaha padarožža pa słavianskim pahraniččy
