Fota: mlyn.by
«Kab vy sabie ŭjaŭlali psichałahičny partret Paršyna: suvoraŭskaje dziacinstva, trahičnaja hibiel dački, — kaža pra Paršyna jaho kaleha ź milicyi. — Pałomničaŭ na Afon (pravasłaŭny manastyr u Hrecyi. — NN), chodzić u carkvu pa niadzielach, ale ŭ siłu prafiesijnaj defarmacyi žyvie ŭ viečnym režymie «vakoł vorahi». Zbroju jon zaŭsiody nosić z saboj», — dadaje aficer.
«Chłopcu jašče pašancavała, što Paršyn jaho vypadkova nie zabiŭ», — kaža jon.
U łukašenkaŭskich telehram-kanałach źjavilisia publikacyi, jakija majuć na mecie dyskredytavać padletkaŭ i abialić Paršyna. Ale źviarnuła ŭvahu, što łukašenkaŭcy dałučyli da ich dva fotazdymki, ale nie videa epizoda całkam.
Krynicy «Našaj Nivy» kažuć, što ŭ Paršyna paśla hetaj sutyčki dyjahnastavali «strasieńnie mozhu».
Dziejny siłavik kamientuje: «Takich «strasieńniaŭ» było šmat paśla 9 žniŭnia 2020-ha, bo treba było niejak stavić dyjahnazy, kab pakazvać kolki siarod milicyi «achviar». Strasieńnie — niemahčyma dakazać, jość jano ci nie. Daktary taki dyjahnaz pišuć prosta pa fakcie padzieńnia».
Artykuł 29 zakona «Ab orhanach unutranych spraŭ» zabaraniaje ŭžyvać zbroju pry značnym skapleńni ludziej, kali ad hetaha mohuć paciarpieć inšyja asoby, a taksama ŭ dačynieńni niepaŭnaletnich, kali ich uzrost vidavočny abo viadomy.
Na kadry bačna, što ŭ dvary znachodzicca hrupa padletkaŭ.
«Ale ŭ zakonie jość prypiska: aproč vypadkaŭ učynieńnia ŭkazanymi asobami ŭzbrojenaha abo hrupavoha napadzieńnia ci inšych dziejańniaŭ, jakija pahražajuć žyćciu ci zdaroŭju hramadzian.
Niezaležny sud paličyŭ by, što jaŭnaja pahroza žyćciu — heta kali na ciabie pruć z nažom abo bitaj.
A ŭ vypadku Paršyna heta moža naciahvacca tak: kali padletkaŭ šmat, moža być, niechta sprabavaŭ raźniać jaho z chłopcam, dakranuŭsia da Paršyna, i jon skaža, što ŭspryniaŭ heta jak akružeńnie i kalektyŭnaje napadzieńnie.
A ŭdar ad chłopca ŭ kupie sa «strasieńniem» moža traktavacca jak «jaŭnaja pahroza zdaroŭju». A kali jamu hetaje «strasieńnie» aformiać jak atrymanaje ŭ suviazi z vykanańniem słužbovaj dziejnaści, «spyniajučy kryminalnaje złačynstva», to jon atrymaje hrašovuju kampiensacyju, nu i strachoŭku jašče», — ličyć aficer.
Kali raźbirać jurydyčna, kažuć kalehi, to ŭ dziejańniach Paršyna niekalki kryminalnych artykułaŭ: pieravyšeńnie ŭłady i słužbovych paŭnamoctvaŭ (artykuł 426), chulihanstva (339).
Zhodna z artykułam 64 KK, abciažvajučymi abstavinami źjaŭlajecca ździajśnieńnie złačynstva hramadska niebiaśpiečnym sposabam (p.4).
«Zbroja ŭžyvajecca tolki tady, kali niama inšych sposabaŭ spynić napadzieńnie. Nie kažučy pra papieradžalny streł. Paršyn moh kryknuć ab dapamozie, užyć pryjomy samaabarony, uciačy, narešcie, kali jamu zdavałasia, što jamu niešta pahražaje.
My hladzim na kadry «napadu z roznych bakoŭ»: vakoł chłopca i Paršyna stajać try dziaŭčyny. Dźvie hladziać na toje, što adbyvajecca, a adna naohuł kudyści sychodzić. Na nastupnym kadry chłopiec chapaje Paršyna za ruku, pry hetym iznoŭ vakoł try dziaŭčyny — napeŭna, niepaŭnaletnija.
U hetaj situacyi, kali mužčyna ŭ cyvilnym dastaŭ u hramadskim miescy pistalet i pahražaje, pry hetym vakoł troje niepaŭnaletnich i navat adna małaletniaja (da 14 hadoŭ) dziaŭčyna, chłopiec, pa zakonie, byŭ abaviazany spynić kryminalnaje złačynstva.
Viadoma, pa-dobramu ŭvohule nie treba było leźci — telefanuj u 102, kali tabie zdajecca, što parušajecca hramadski paradak. A tak… Pa hramadziancy lezieš vučyć žyćciu dziaciej. A potym stralaješ. Navat kali kazać pra nieabchodnuju samaabaronu, to tut vidavočnaje jaje pieravyšeńnie.
Nichto navat z taho łahieru nie acenić hetuju bzduru jak podźvih», — dadaŭ aficer.
«Žyvu ŭ svabodnaj krainie»: padletak pasadziŭ na ziamlu eks-kiraŭnika HUBAZiKa. Toj u adkaz pačaŭ stralać PADRABIAZNAŚCI
