Fota: unsplash.com/@wevibe
Ci treba raskazvać partnioru pra svaje seksualnyja fantazii? Jak heta rabić?
«Ja prapanuju raźbić hetaje pytańnie na niekalki. Ci varta razmaŭlać pra seks uvohule? Biezumoŭna. Tamu što pakul u vas jość niejkija viedy pra siabie, ale jany ŭnutry i pra ich nichto nie viedaje, znajści kropki sudotyku z partnioram budzie składana. U vas jość ujaŭleńni ab tym, što vam padabajecca, i ŭ partniora taksama — vam treba znajści, dzie heta ŭsio pierasiakajecca», — tłumačyć Zoja Pryšyvałka.
Pry hetym jość praviły hutarak pra seks. Razmovy mohuć adbyvacca niepasredna ŭ samim pracesie albo pa-za jaho miežami. U pieršym vypadku adbyvajecca situacyjnaje supravadžeńnie seksu, usio musić być pa spravie i vielmi koratka. Nievierbalnaja kamunikacyja tut taksama vitajecca, naprykład, vy nakiroŭvajecie ruku partniora.
«Razmovy pra seks, jakija prachodziać nie ŭ samim pracesie, buduć bolš praduktyŭnyja. Treba damovicca, što ŭ vas budzie hutarka na intymnuju temu pa jakim-niebudź pytańni.
Naprykład, možna vykarystoŭvać takija frazy — «mianie cikavić hetaja tema ŭ seksie», «u mianie voś tak adbyvajecca, a jak u ciabie?», «mnie chaciełasia b pra heta pahavaryć».
Uvohule staŭciesia da hetaha jak da zvyčajnaj razmovy.
Prosta pra seks ludzi nie navučany razmaŭlać. Plus časta nie chapaje słoŭ. Pieršapačatkova treba mieć u hałavie słoŭnikavy zapas, kab nazyvać častki cieła, pracesy. Kali vam składana vymavić, to, mahčyma, varta napisać ci pakazać.
Pry hetym, kali vam niepryjemna pra što-niebudź kazać, to heta tak i treba patłumačyć partnioru.
Naprykład, «mnie strašna, tamu što niezrazumieła», «ja złujusia, bo na takuju temu nie razmaŭlała», — raić Zoja.
Časam na niekatoryja temy ŭ seksie varta razmaŭlać z dapamohaj praktykavańniaŭ dla par. Naprykład, vy abmiarkoŭvajecie z partnioram, što novaha chacieli b pasprabavać ci što ličycie absalutna niedapuščalnym.
«Pradajucca śpiecyjalnyja kartki (ci vy možacie sami ich zrabić), jakija vy raskładvajecie razam, vyznačajučy, što dla vas prymalna, a što nie. Abo kartki z pytańniami, jakija abmiarkoŭvajecie. Heta rassłablaje i vučyć razmaŭlać pra seks», — kaža kansultantka.
Što tyčycca fantazij u seksie, to Zoja zaŭvažaje, što heta tema časta pałochaje ludziej. Byccam toje, pra što jany dumajuć, moža adrazu stać realnaściu.
«Abo bajacca, što ich niechta pasłuchaje i vyrašyć, jaki jon ci jana nienarmalnyja.
U nas va ŭsich jość niejki bekhraŭnd seksualnaha dośviedu. Uražańni, pieražytyja situacyi, pačutaje adkładajecca ŭ hałavie. Na pavierchniu jano, moža, i nie pakazvacca, akramia jak praz sny ci fantazii. Toje, što jany jość, jašče nie značyć, što vy sam taki. Časam navat treba hladzieć mietafaryčna, pra što taja ci inšaja fantazija», — tłumačyć ekśpiertka.
Čamu važna razmaŭlać pra seksualnyja fantazii?
«Kali my prahavorvajem heta, to enierhietyčny składnik pamianšajecca. Dumka śviarbić i balić da taho momantu, pakul vy nie vykažacie jaje. Sama dapuščalnaść taho, što takaja fantazija moža być, i toje, jak vas ź joj prymaje partnior, havoryć ab blizkaści.
Kali hetuju fantaziju partnior daŭ raspavieści da kanca — heta značyć, što vy važny dla jaho čałaviek. Adpaviedna, uźnikaje adčuvańnie taho, što daviarać jamu varta», — robić vysnovu jana.
Pra što lepš nie raskazvać partnioru?
«Ja b tut uviała takoje paniaćcie, jak dyjapazon seksualnaj prymalnaści. Heta pra toje, što va ŭsich u nas jość šyrynia taho, pra što i jak my možam razmaŭlać na kožnuju temu. U tym liku i pra seks.
Kali raptam vy traplajecie ŭ kampaniju ludziej, u jakoj hety dyjapazon vužejšy, čym u vas, to, mahčyma, jak inicyjataru takoj hutarki, varta akuratna pytacca. Moža być, heta niesupastaŭlalna z relihijnymi, kulturnymi pohladami, naprykład. I naadvarot, kali ŭ vas dyjapazon vužejšy, pakłapaciciesia pra siabie.
Kali vam prapanujuć razmovy, da jakich vy nie hatovy, to tak i varta skazać. Naprykład, «ja nie razumieju pakul, jak pra heta raskazvać», «bajusia pra heta havaryć», «mnie niepryjemna», — kaža Zoja.
Seks utroch — heta narmalna?
«Kali vy ab čymści damovilisia z saboj, potym ab hetym ža z partnioram i vas abodvuch heta zadavalniaje, pry hetym vy nie pryčyniajecie škodu sabie, blizkamu čałavieku, navakolnym, to heta ličycca vašaj indyvidualnaj normaj, — tłumačyć ekśpiertka i pryvodzić prykład: —
Kali vam padabajecca zajmacca seksam u hramadskich miescach, ale pry hetym vy nie spytali ŭ inšych ludziej, ci chočuć jany heta bačyć, to takoje nie źjaŭlajecca normaj».
Nie varta zabyvać, što seksualnaje dziejańnie ličycca narmalnym, kali jano adbyvajecca pa ŭzajemnaj zhodzie.
«Vy zadajacie pytańnie darosłamu, stałamu čałavieku, jaki moža nieści adkaznaść za svajo žyćcio i bačyć nastupstvy svaich rašeńniaŭ. Pry hetym jon nie znachodzicca ŭ stanie narkatyčnaha ci ałkaholnaha apjanieńnia, a taksama čałaviek psichična zdarovy. Adrazu stanovicca zrazumieła, čamu seks ź dzicia nie norma», — raskazvaje jana.
Indyvidualnaja norma — heta śpiecyfika kožnaha čałavieka. Ale, kali vy pačynajecie ad hetaha pakutavać albo nie možacie zajmacca seksam nijak inakš, a tolki tak, jak vy ŭstalavali, — heta nie jość dobra.
Ci palapšaje jakaść seksu prahlad filmaŭ dla darosłych?
«Kožny čałaviek pavinien vyznačyć dla siabie, čaho jon kankretna choča lepiej, čym u jaho jość, — zaŭvažaje Zoja. —
U zaležnaści ad hetaha jość šmat varyjantaŭ, jak možna pahłyblać svaje adčuvańni padčas seksu. Prahlad porna ŭniasie raznastajnaść ŭ seksualnaje žyćcio čałavieka. Naprykład, jon moža ŭbačyć pozy, pra jakija raniej nie viedaŭ, ci jak možna ruchacca. I tady, biezumoŭna, jak krynica pašyreńnia heta kłasna, ale tolki ŭ tym vypadku, kali čałaviek razumieje, navošta tudy pajšoŭ i što jon choča atrymać.
Kali my havorym ab zaležnaści ad seksualnaha kantentu, to ŭ takim vypadku budzie składana ŭzbudzicca z realnym partnioram u realnym žyćci i atrymać zadavalnieńnie».
Zamiest partniora padčas seksu ŭjaŭlaju inšaha čałavieka. Čamu tak?
«Heta pra fantazijny śviet, tak praściej. Albo čałavieku ciažka iści ŭ cialesnyja adčuvańni.
A časam moža być supraćlehła — ludzi tak ratujucca ad niepryjemnaha. Mahčymy kanflikt z partnioram, tady ad jaho praściej abstrahavacca, ujavić, što z vami inšy čałaviek», — kaža jana.
Čytajcie taksama:
«Časam ja ŭjaŭlaju, jak zajmajusia seksam i na mianie niechta hladzić»
«U jaho da mianie, mabyć, ničoha nie było. Prosta seks». Historyi taho, jak pierajezd paŭpłyvaŭ na adnosiny pamiž kachanymi
