«Usio bolš jaŭny raskoł pamiž Uzbrojenymi siłami i ŭładami Ukrainy — adznačajuć vajennyja ekśpierty», — svaim firmovym hrudnym hołasam pačynaje siužet viadučaja Natalla Niemahaj. Pry hetym nivodnaha mierkavańnia ekśpierta ŭ siužecie nie budzie pryviedziena.
Na karcincy — tvar u tvar Zialenski i vajskoŭcy. Nadpis — «Ukrainskaja armija niezadavolenaja kiraŭnictvam krainy». Adnak i tut hrubaja padtasoŭka. Kadr — z apošniaha naviedvańnia Zialenskim frontu ŭ Zaparožskaj i Łuhanskaj abłaściach. Heta byŭ śmieły ŭčynak Zialenskaha. Dla paraŭnańnia, Pucin i Łukašenka na linii frontu nie byli. Nijakich kanfliktnych situacyj padčas sustreč Zialenskaha z vajskoŭcami nie było. Choć Ukraina — kraina demakratyčnaja, i tam prezidenta da vajny krytykavali niaredka — u adroźnieńnie ad biełaruskaj i rasijskaj dyktatur.
«Usie niaŭdačy na froncie ofis prezidenta vyrašyŭ zvalić na vajskoŭcaŭ», — śćviardžaje ANT. Iznoŭ ža, nijakich cytat Zialenskaha nie pryvodzicca. Nasamreč, ich nie isnuje. Zialenski nie havaryŭ pra «niaŭdačy na froncie» ŭ svajoj zajavie.
«Zialenski abvinavaciŭ hałoŭnakamandujučaha Uzbrojenych Sił Valeryja Załužnaha ŭ tym, što ŭsio bolš sałdat hatovyja skłaści zbroju i zdacca», — praciahvaje viadučaja ANT, choć Zialenski nikoli publična nie kazaŭ ničoha padobnaha.
Zialenski nie tolki nie abvinavačvaŭ vajennaha kiraŭnictva, jon u pryncypie nikoli nie kazaŭ, što nibyta «ŭsio bolš sałdat hatovyja skłaści zbroju i zdacca». Naadvarot, Zialenski ŭvieś čas padkreślivaje vysoki bajavy duch ukrainskaj armii i sałdat. Zrešty, sam fakt, što pry niaroŭnych siłach praciŭnikaŭ rasijskaja armija ŭžo try z pałovaj miesiacy nie moža dasiahnuć svaich metaŭ, pra hety bajavy duch krasamoŭna śviedčyć.
Sproba pierakanać nasielnictva, što ŭ praciŭnika, nibyta, nizki bajavy duch — standartny pryjom vajskovych prapahandystaŭ, da jakoha treba stavicca aściarožna.
Admietna, što siužet na ANT vyjšaŭ u adzin dzień z čarhovaj chvalaj rasijskaj prapahandy, jakaja imkniecca pierakanać aŭdytoryju u tym, što pamiž Zialenskim i Załužnym, nibyta, isnuje niejki kanflikt. Ale rasijskija prapahandysty ŭ svaich paviedamleńniach nie apuskajucca da takoj prymityŭnaj chłuśni, jak ANT. Admietna taksama, što materyjał ANT repościać inšyja prapahandysckija resursy, pačynajučy ź BiełTA.
Što ž nasamreč skazaŭ Zialenski pra Załužnaha? Zialenski paprasiŭ Załužnaha pravieryć, ci zabiaśpiečany ŭkrainskija abaroncy nieabchodnymi srodkami abarony.
«Paprasiŭ hałoŭnakamandujučaha ŭzbrojenymi siłami Ukrainy vielmi ŭvažliva pastavicca da paviedamleńniaŭ u ŚMI i ŭ sacsietkach ab tym, što ŭ častki našych bajcoŭ niama dastatkova srodkaŭ indyvidualnaj abarony.
Dakłady, jakija ja atrymlivaju, istotna adroźnivajucca ad taho, što abmiarkoŭvajecca hramadstvam.
I ja čakaju pravierki łahistyki ŭ vojsku — pravierki pastavak i taho, jak raźmiarkoŭvajucca srodki indyvidualnaj abarony.
Na siońnia ŭsim, chto znachodzicca ŭ zonach bajavych dziejańniaŭ, pavinna chapać usiaho nieabchodnaha dla abarony. Dziaržava zabiaśpiečvaje takija pastaŭki», — kazaŭ Zialenski ŭ svaim niadaŭnim videazvarocie.
Rasijskija ŚMI manipulatyŭna pierakazali hety zvarot tak: «Zialenski ŭ svaim tradycyjnym videazvarocie abvinavaciŭ Załužnaha ŭ tym, što toj nie dakładvaje ab adsutnaści srodkaŭ indyvidualnaj abarony ŭ vajskoŭcaŭ».
Nu a biełaruskaja dziaržaŭnaja prapahanda nie prosta pierakruciła słovy Zialenskaha, a ŭvohule schłusiła pra toje, što «Zialenski abvinavaciŭ Załužnaha ŭ tym, što ŭsio bolš sałdat hatovyja skłaści zbroju i zdacca».
«U siecivie ŭ hieamietryčnaj prahresii raście kolkaść rolikaŭ, dzie ŭkrainskija vajskoŭcy skardziacca na svajo biadotnaje stanovišča», — praciahvaje Natalla Niemahaj. Źviarnicie ŭvahu — nie prosta raście, a ŭ hieamietryčnaj prahresii raście. Ale pry hetym fonam iduć… videazapisy z ukrainskimi pałonnymi. To i ŭkraincy niamała pałonnych zapisali.
Iznoŭ ža, u demakratyčym hramadstvie niama ničoha niezvyčajnaha, kali vajskoŭcy na niešta narakajuć, voś tolki videa i aŭdyjazapisaŭ z narakańniami rasijskich siłavikoŭ na niedachop uzbrajeńnia, składanuju situacyju na froncie ci razychodžańnie prapahandy z realijami Ukrainy ŭ siecivie sustrakajecca, badaj, bolš.
Dalej prapahandysty z ANT zajaŭlajuć, što «cyvilnyja ŭłady Ukrainy pastajanna traplajuć u hučnyja skandały z raskradvańniem vajennaj «humanitarki».
Asobnyja vypadki ź jaje raskradańniem sapraŭdy zdarajucca, ale ŭsie jany tyčacca raskradańnia na nizavym uzroŭni, kali asobnyja machlary prysvojvajuć achviaravańni indyvidualnych dabračyncaŭ. U vajennaj realnaści heta niepaźbiežnaja situacyja, navat u tatalitarnych krainach padčas vajny było toje samaje.
Prapahandyscki narytyŭ pra toje, što pamiž Zialenskim i vajskoŭcami isnuje niejki raskoł — nie novy. Jaho rasijskaja i biełaruskaja prapahanda raskručvaje ź pieršych dzion vajny. Takim čynam Maskva i Minsk sprabavali hety raskoł pasiejać.
Nahadajem, Pucin u pieršyja dni vajny zaklikaŭ ukrainskich vajskoŭcaŭ brać uładu u svaje ruki. Jon skazaŭ, što ź imi Maskvie budzie lahčej damovicca, čym «z chieŭraj narkamanaŭ i nieanacystaŭ» u Kijevie.
Mahčyma, rasijanie i praŭda vieryli ŭ toje, što pamiž cyvilnym i vajennym kiraŭnictvam Ukrainy isnuje niejki kanflikt. Tut rasijanie mahli stać albo achviarami niejkaj dezynfarmacyi z boku ŭkraincaŭ, albo prosta pavieryli ŭ svaju ž adarvanuju ad realnaści prapahandu.
4 sakavika, na 9-y dzień vajny, prezident Zialenski prysvoiŭ Załužnamu zvańnie hienierała. 6 maja jamu była ŭručanaja najvyšejšaja ŭznaharoda — «Kryž bajavych zasłuh».
Realnaść takaja, što i Załužny — vielmi papularnaja va Ukrainie postać, i sam Zialenski maje kałasalnuju padtrymku ŭnutry krainy i vahu na mižnarodnaj arenie.
Abodva zasłužyli pavahu jak svajoj śmiełaściu, tak i pośpiechami ŭ supraćstajańni ahresii. Alaksandr Łukašenka čakaŭ pieramohi Rasii za 3—4 dni, miž tym ukraincy zdoleli vybić ahresara z-pad Kijeva, Charkava, Čarnihava i ŭtrymać Mikałajeŭ i Adesu. Rasijskaja armija paniesła straty ŭ žyvoj sile i technicy bolšyja, čym ukrainskija vojski.
Ci moža Załužny kinuć vyklik Zialenskamu? Moža, čamu b i nie. Ukraina — demakratyčnaja kraina. Ale hetaha nie zdarycca, pakul idzie aktyŭnaja faza vajny. Ukraincy demanstrujuć zachaplalnaje adzinstva, nasupierak tamu, što čakali Pucin i Łukašenka.
Varta narešcie nahadać, što 4 sakavika, na 9-y dzień vajny, prezident Zialenski prysvoiŭ Załužnamu zvańnie hienierała. A 6 maja ŭznaharodziŭ jaho «Kryžam bajavych zasłuh».
Natalla Niemahaj, jakaja začytała łžyvy siužet, pracuje na ANT užo 20 hadoŭ. Ukazańni ab tym, pra što paviedamlać i jak, telekanałam spuskajuć z Administracyi prezidenta.
Čytajcie taksama:
Ukrainski Manerhiejm. Chto jon, hienierał Załužny, i čamu jaho taktyku ciapier vyvučajuć va ŭsim śviecie
