Tvar Uładzimira Zialenskaha vyrazna źmianiŭsia ŭžo za 40 dzion vajny, a jak vyhladajuć praz dva hady zmahańnia adny z asnoŭnych pradstaŭnikoŭ apazicyi i režymu? Sabrali foty niekatorych ź ich.
Flejtystka Maryja Kaleśnikava ŭ 2020-m hodzie pieraniała palityčnuju estafietu ŭ Viktara Babaryki, štabam jakoha kiravała. My nie viedajem, jak jana ciapier vyhladaje ŭ homielskaj kałonii, u jakoj adbyvaje źniavoleńnie (11 hod). Ale miarkujučy pa jaje ŭśmiešcy ŭ sudzie i pryvitańni ŭ listach, jana ŭsio tak ža ŭśmichajecca i šle biełarusam sercajki.
Fota: «Naša Niva» i sb.by
Toje samaje možna skazać i pra eks-bankira Viktara Babaryku. U navapołackaj kałonii, dzie Viktar adbyvaje źniavoleńnie, na jaho ŭsialak cisnuć: inšym źniavolenym zabaraniajuć ź im kamunikavać, palityku dajuć ciažkuju pracu, źmiaščajuć u ŠIZA, ale jon praciahvaje padavać prykład niazłomnaści i ŭ takich umovach.
Fota: telehram-kanał Viktara Babaryki i sb.by
Śviatłana Cichanoŭskaja ŭstupiła ŭ prezidenckuju honku zamiest zatrymanaha muža Siarhieja. I voś užo dva hady pradstaŭlaje Biełaruś na mižnarodnaj arenie, transfarmavaŭšysia z «haspadyni» ŭ palityka i źniešnie, i ŭnutrana.
Fota: «Naša Niva» i skrynšot ź jutub-kanała Śviatłany Cichanoŭskaj
Mnohaje było b niemahčymym biez kamandy, jakaja zhurtavałasia vakoł Cichanoŭskaj. U tym liku jaje daradcy Franaka Viačorki. Takim jon byŭ na apošnich strymach.
Fota: skrynšoty ź jutub-kanała Śviatłany Cichanoŭskaj
A tak za kratami vyhladaŭ sam Siarhiej Cichanoŭski, asudžany da 18 hod kałonii.
Fota: «Naša Niva» i sb.by
Alaksandr Łukašenka, možna padumać, nie mianiajecca, jak i nie mianiajecca bolš za 20 hod jaho pasada. Ale kali pryhladziecca da jaho vystupaŭ, to možna zaŭvažyć, što dva apošnija hady nie prajšli biasśledna i, jak minimum, dadali jamu stomlenaści. Na fota źleva jon biez hrymu na mitynhu 16 žniŭnia 2020 hoda. Na fota sprava — u hrymie padčas niadaŭniaj sustrečy ŭ Pucinym.
Fota: TASS, AP Ramil Sitdikov
A voś staršynia Savieta Respubliki Natalla Kačanava ŭ svaim ampłua trymajecca roŭna. Ëj, vidavočna, daspadoby miesca pry ŭlubionym kiraŭniku, jakoha jana ličyć adzinym čałaviekam, zdolnym być prezidentam, i sustrečy sa studentami ci supracoŭnikami pradpryjemstvaŭ, jakich treba dadatkova ideałahična prapracavać.
Fota: «Naša Niva» i minsknews_by
Ci pamatała žyćcio prapahandystaŭ? Prydumlać i pakazvać biełaruskuju idealnuju karcinku i štodzień palivać brudam «vorahaŭ» — sprava nie ź lohkich.
Muž pres-sakratarki Łukašenki Ivan Ejsmant byŭ pryznačany na pasadu staršyni «Biełteleradyjokampanii» ŭ 2018 hodzie, źmianiŭšy Hienadzia Davydźku. Naŭrad ci jon čakaŭ, što ŭžo ŭ 2020-m jamu pryjdziecca sprabavać «supakoić» svaich supracoŭnikaŭ, jakija vyjšli na zabastoŭku, i prymać zajavy na zvalnieńni.
Fota: tut.by, belta.by
Napiaredadni vybaraŭ-2020 Ejsmant daŭ vialikaje intervju TUT.BY, a siońnia z kalehami pa cechu ŭ «Kłubie redaktaraŭ» stabilna prachodzicca pa partale, chacia jon i byŭ razhromleny ŭ 2021 hodzie, nazyvaje Cukierbierha novym Hitleram i zaklikaje zabaranić u Biełarusi Fejsbuk.
Ryhor Azaronak pryjšoŭ na źmienu baćku. Zdolnaść plažyć apazicyju akazałasia zapatrabavanaj — jak kažuć, čałaviek apynuŭsia ŭ patrebnym miescy ŭ patrebny čas. I voś užo ŭ Ryhora svajo aŭtarskaje šou, i jon adzin ź niamnohich, kaho zaprašajuć na ŭsie mierapryjemstvy z Łukašenkam, chto atrymlivaje miedal «Za advahu».
Fota: skrynšot CTV.by i telehram-kanał Hryhoryja Azaronka.
Padobnym čynam składvajecca i karjera jašče adnaho prapahandysta — Ihara Tura. A maryŭ u svoj čas stać spartovym žurnalistam i rekłamavaŭ adzieńnie ŭ nacyjanalnym styli.
Fota: skrynšoty ź videa ANT
U minułym prahramist, aktyvist štaba Capkały Illa Biahun dałučyŭsia da prapahandysckaj kampanii ŭ 2021 hodzie, kali niečakana viarnuŭsia ŭ Biełaruś sa svajoj palitemihracyi. Ličycca, što jon bajaŭsia viartacca ŭ Biełaruś i vyrašyŭsia na taki krok pad harantyi biaśpieki ad Juryja Vaskrasienskaha. Adsiul robicca zrazumiełym, jak jon staŭ udzielnikam kruhłaha stała apošniaha. Praŭda, nienadoŭha.
Fota: dev.by i skrynšot ź videa minsknews.by
A voś na dziaržaŭnych telekanałach Biahun pryžyŭsia: u jaho atrymlivajecca dobra palivać brudam apazicyju. Na «Minsk-novosti» jon viadzie svaju kałonku, a ŭ siužetach ANT vystupaje jak «miedyjaekśpiert» i navat «ekśpiert pa fotamantažy».
Eks-ministr unutranych spraŭ Juryj Karajeŭ, adkazny za žorstki razhon pratestaŭ paśla 2020 hoda, jak pamočnik prezidenta pa Hrodzienskaj vobłaści źmianiŭ formu na cyvilnaje adzieńnie i ŭsio čaściej jaho možna zaŭvažyć ŭ rabočym łuku na subotniku ci na pryborcy śniehu. Ale na jaho pierakanańni, viadoma, heta nijak nie paŭpłyvała: čaho tolki vartaja historyja zaŭziataraŭ, jakich sudzili za toje, što jany nie ŭstali padčas himna na hulni «Niomana» i «Homiela» ŭ Hrodnie. Sami zaŭziatary raskazvali, što zahad zatrymać ich addaŭ Karajeŭ.
Fota: «Naša Niva» i belta.by
U 2020 hodzie Pavieł Łatuška byŭ jašče dyrektaram Kupałaŭskaha teatra. Paśla jaho zvalnieńnia adtul Minkultam syšła i amal usia trupa, jakaja praciahvaje pracu za miažoj pad brendam «Kupałaŭcy» (u toj čas jak u Kupałaŭski na Enhielsa pravodziać užo vośmy kastynh, kab nabrać akcioraŭ).
Fota: «Naša Niva» i jutub-kanał Paŭła Łatuški
Sam Łatuška na pasadzie kiraŭnika Narodnaha antykryzisnaha kiravańnia pracuje na mižnarodnym froncie. Adna ź jaho apošnich prapanoŭ — zaklik pryznać Biełaruś terytoryjaj, časova akupavanaj Rasijaj. Na Łatušku paviesili status «terarysta» i kryminalnuju spravu, pieraśled zakranuŭ i jaho svajakoŭ.
Dniami my raskazvali pra čarhovy pahrom kvatery, jaki pad vyhladam «pieratrusaŭ» pravodziać siłaviki ŭ Biełarusi. Dajšli i da doma Vieraniki i Valeryja Capkałaŭ.
Capkały ŭ 2020 hodzie
Ličycca, što heta taksama pomsta za dziejnaść eks-kandydata ŭ prezidenty i jaho žonki, jakaja paśla ŭvajšła ŭ abjadnany štab ź Cichanoŭskaj i Kaleśnikavaj.
Fota: telehram-kanał Valeryja Capkały. 2022 hod, Forum demakratyčnych siłaŭ Biełarusi
Drennyja ŭmovy ŭ biełaruskich turmach i izalatarach tak ci inakš adbivajucca na zdaroŭi viaźniaŭ. Zhadajcie chacia b, jak vyhladała Natalla Chierše paśla vyzvaleńnia z kałonii. I ŭražvaje, nakolki pry hetym hodna trymajucca eks-palitźniavolenyja, demanstrujučy niazłomnaść i zahartavanaść.
Cichan Klukač trapiŭ za kraty ŭ 18 hod. Razam z Safijaj Małaševič jon razmalavaŭ bałončykam z farbaj ščyty śpiecyjalnych srodkaŭ zaharodžy na adnym z maršaŭ i atrymaŭ za heta hod i šeść miesiacaŭ pazbaŭleńnia voli. Tak Cichan vyhladaje ciapier.
Fota: staronka Cichana ŭ fejsbuku.
Čytajcie taksama:
Zatrymali dyrektara miedcentra. Jaho abvinavačvajuć u supracoŭnictvie z «Bajpołam»
Eks-supracoŭnik izalatara časovaha ŭtrymańnia: pra ideałahičnuju apracoŭku, sačeńnie, sistemu ździekaŭ i zarobki
