Andrej Stryžak byŭ adnym z arhanizataraŭ fondaŭ biełaruskaj salidarnaści. Heta zrabiła jaho abjektam atak łukašenkaŭcaŭ
Asobnyja biełyja nitki manipulacyi ŭ infarmacyi, jakaja kačuje pa rasijskich i łukašenkaŭskich kanałach, vytyrkajucca adrazu. Voś, naprykład: «Alaksandr Łukašenka pieradaŭ Maskvie śpis hramadzian Rasii, jakija pieraličvali hrošy ŭ BYSOL — fond, jaki źbiraŭ hrošy na ažyćciaŭleńnie dziaržpieravarotu ŭ respublicy. Usiaho jon paśpieŭ sabrać kala 14 młn jeŭra, vialikaja častka hetych hrošaj była ŭ vyniku vyviedzienaja z krainy i rastvaryłasia ŭ pryvatnych kišeniach», — z hetaha pačynajecca paviedamleńnie.
Ale stop: jakoje «była ŭ vyniku vyviedzienaja z krainy»? BYSOL nikoli nie bazavaŭsia ŭnutry Biełarusi, ułady hetaha nie dazvolili b. Naadvarot, hrošy biełarusy źbirali za miažoj i z ryzykaj dla siabie, roznymi šlachami, na sabie ci praz rachunki samaachviarnych biznesoŭcaŭ, uvozili ŭ krainu, kab jany mahli dajści da represavanych. Za dapamohu va ŭvozie hrošaj i ich pieradavańni mnohich aryštavali.
Siarod ich, da prykładu, miedyjamieniedžar Andrej Alaksandraŭ i jahonaja dziaŭčyna Iryna Złobina, jakich sudziać hetymi dniami.
I druhi stop adrazu. Jakoje «ažyćciaŭleńnie dziaržpieravarotu», kali fond sabraŭ svaje niemałyja pa biełaruskich mierkach hrošy nie da, a paśla padziej žniŭnia, u adkaz na masavyja represii?
Ci jość u infarmacyi rasijskich kanałaŭ dola praŭdy? Ci praŭdzivaja suma 14 miljonaŭ jeŭra? Ci sapraŭdy ŭciakli śpisy achviaradaŭcaŭ? Ci padtrymlivali biełaruski pratest znakavyja postaci rasijskaj intelihiencyi i estrady? Intryhoŭna.
Ci mahli śpiecsłužby zdabyć śpisy achviaradaŭcaŭ?
«Toj błok infarmacyi, jakuju my atrymlivajem, zachoŭvajecca ŭ śpiecyjalnych umovach adpaviedna sa strohim pratakołam biaśpieki. Słaba sabie ŭjaŭlaju, jakim čynam adtul što-niebudź možna ŭziać», — kaža Andrej Stryžak, jaki stajaŭ u vytokach BY_help dy BYSOL.
I dadaje:
«Kali razmova idzie pra 2020 hod, to tam zbor u asnoŭnym išoŭ praz alternatyŭnyja placoŭki, naprykład, Fejsbuk. I maju ščyryja sumnievy, što, Fejsbuk moža vydać niejkija danyja pa zapycie rasijskaj albo biełaruskaj ułady. Tamu čysta technična nie ŭjaŭlajucca mahčymymi ŭciečki, pra jakija iduć razmovy.
Dy i, pahadziciesia, kamičnymi ujaŭlajucca dziejańni, skažam, Aleha Dzierypaski, jaki adkryta pieravodzić hrošy ŭ Biełaruś i jašče kaža pry hetym: «Voś vam na źmienu kiraŭnictva krainy».
Ci mahli rasijskija zorki kštałtu Makareviča albo BH sapraŭdy dapamahać biełaruskim pratestoŭcam ci represavanym?
«Tamtejšyja pradstaŭniki intelihiencyi dapamahali praz šerah kancertaŭ salidarnaści ź ludźmi, što stali achviarami represij biełaruskaj ułady, — zhadajcie chacia b bujnuju anłajn-imprezu, zładžanuju ahladalnikam «Novaj haziety» Janam Šenkmanam, — kaža Andrej Stryžak, ale nahadvaje: — Dva hady tamu nichto nikoha nie abvinavačvaŭ u pieravarotach. Ludzi byli źbityja, paranienyja, traŭmavanyja — i patrabavali dapamohi. Ciapier, viadoma, možna vydavać heta za padrychtoŭku niejkaha miaciežu. Ale heta nie maje dačynieńnia da realnaści».
Niebanalny momant: śpiecsłužby ŭ novych abvinavačańniach adnačasova pasprabavali i najechać na apanientaŭ unutry Rasii, i zamazać u hetuju spravu biełaruskuju apazicyju. Stryžak pahadžajecca:
«Pryjom sapraŭdy cikavy. Ale nahadvaje taktyku, što ŭžyvaje rasijskaja armija va Ukrainie — adnačasovy nastup u niekalkich kirunkach. Z punktu hledžańnia vajskovaj navuki heta całkam nieapraŭdany padychod. Toje ž samaje i tut: kudy praściej dy łahičniej było b bić kropkava. A tut atrymlivajecca, što ŭsio skinuli ŭ adnu kuču. Adpaviedna, heta vyklikaje niedavier hramadstva. Pracytuju ulubiony kamientar da hetaj naviny: «Pračytaŭ śpis. Nie zrazumieŭ: a dzie Coj?»
Stryžak źviartaje ŭvahu, što ŭ śpisie abvinavačanych vielmi raznarodnyja asoby, ale jość vyrazny momant, jaki ich abjadnoŭvaje: usie jany vystupili z asudžeńniem sproby zachopu Ukrainy i likvidacyi jaje dziaržaŭnaści.
Juryj Dudź, Maksim Hałkin, Andrej Makarevič. Kałaž: fota z sacsietak
«Abvinavačvajucca albo krytyki siońniašniaj rasijskaj ułady, albo tyja, chto vystupiŭ suprać vajennaha ŭvarvańnia va Ukrainu», — adznačaje Stryžak. Na jaho dumku, «śpisy», pra jakija viadzie razmovu «Niazyhar», majuć takoje ž dačynieńnie da biełaruskaj realnaści, što i karty, «otkuda hotoviłoś napadienije».
A suma — 14 miljonaŭ jeŭra — realnaja? Biełarusam sapraŭdy ŭdałosia naźbirać tak šmat?
«Chutčej za ŭsio, chtości z prapahandystaŭ śviatkuje 14-ha dzień naradžańnia, bo inšaj numierałohii padvieści pad sumy niemahčyma, — kaža Stryžak. — Faktyčnyja zbory, što ažyćciavili BY_help dy BYSOL, nie pieravyšajuć 10 młn jeŭra. I heta za ŭvieś čas — z 2020 hoda pa siońnia. Na ŭsie ž inšyja prydumki reahuju pryblizna tak, jak Andrej Makarevič va ŭčorašnim dopisie-adkazie na abvinavačvańni».
Rasijskaja prapahanda anansuje film, dzie abiacaje «ŭskryć zmovu rasijskich mastackich dziejačoŭ dla padrychtoŭki revalucyi ŭ Minsku». Andrej upeŭnieny: ničoha novaha tam nie pakažuć.«Pojduć raskručvacca ŭžo zajezdžanyja tezisy».
Na dumku Stryžaka, skaardynavanaja miedyjaataka viadziecca suprać luboj siły, što imkniecca supraćstajać režymu Łukašenki.
«Śviatłana Cichanoŭskaja, my, dobraachvotniki ź Biełarusi, jakija ŭdzielničajuć u vajnie na ŭkrainskim baku, — pieraličvaje Andrej. — Usich nas imknucca sutyknuć iłbami».
Varta dadać, što sama placoŭka, praź jakuju była raspaŭsiudžanaja infarmacyja, heta vyklučna nieaŭtarytetny kanał «Niazyhar». Voś prykład.
Palčys raźvioŭ «Niazyhara»: napisaŭ im poŭnuju achinieju, a jany nadrukavali biez pravierki
Tolki kali ŭ 2019 hodzie «Niazyhara», blizkaha da kiraŭnictva dziaržaŭnaha rasijskaha infarmacyjnaha ahienctva TASS, Maskva vykarystoŭvała suprać Alaksandra Łukašenki, to ciapier dla tranślacyi Łukašenki.
Vyhladaje, što novym ukidam Alaksandr Łukašenka prosta znoŭ, nakolki ŭmieje i moža, padyhryvaje rasijskaj prapahandzie, jakoj ciapier treba ablić brudam viadomych ludziej, što navažylisia vystupić suprać impieryjalistyčnaj vajny va Ukrainie.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
