U pryvatnaści, dziaržaŭnaje telebačańnie źniała pra spravu Aŭtuchoviča niekalki dakumientalnych filmaŭ.
U pieršy ž dzień suda dziaržaŭnyja ŚMI davali padrabiaznyja cytaty jak samoha Aŭtuchoviča, tak i inšych ludziej, jakija prachodziać pa spravie. Padrabiazna apisvalisia materyjały spravy, u tym liku toje, što ŭ jaho znajšli siłaviki. Apisvajecca emacyjny stan padazravanych i ichnija emacyjnyja repliki. Paviedamlajecca pra kožny karotki pierapynak u sudzie, pra kožnuju źmienu ŭ składzie advakataŭ. Prapahandysty padrabiazna apisvajuć emocyi paciarpiełych.
BiełTA, «Sovietskaja Biełoruśsija», dziaržaŭnyja telekanały i praŭładnyja błohiery dajuć šmat fotazdymkaŭ pracesu, u roznych rakursach i varyjacyjach. Ničoha padobnaha padčas pracesaŭ Kaleśnikavaj, Sieviarynca ci Statkieviča nie było.
BiełTA, naprykład, paviedamlaje pra kožnaje chadajnictva Aŭtochoviča, jahonyja repliki. Dziaržaŭnyja prapahandysty navat pišuć pra vypadki, kali abvinavačanyja ŭ ramkach spravy admaŭlajucca davać pakazańni. Chto jakoje chadajnictva zajaviŭ, chto padtrymaŭ, chto nie padtrymaŭ, u jakim nastroi byli abvinavačanyja — usio heta staranna fiksujecca dziaržaŭnaj prapahandaj.
Takoje detalovaje apisańnie pracesu naŭrad ci było b mahčymym biez ukazańnia z boku ŭładaŭ. Pakul ciažka skazać, z čym źviazanaje takoje ŭkazańnie. Mahčyma, tamu što, u adroźnieńnie ad tysiač inšych anałahičnych pracesaŭ, dzie ludziam štampujuć turemnyja prysudy za ŭdzieł u demanstracyjach suprać uzurpacyi ŭłady dyktataram, hałoŭny abvinavačany tut pryznaje svaje radykalnyja dziejańni, i łukašenkaŭskaja prapahanda takim čynam raźličvaje apraŭdać svaje zakidy ŭ tym, što palityčnyja praciŭniki mieli namier zachapić ułady hvałtoŭnym šlacham. Abo tłumačeńnie ŭ tym, što Aŭtuchoviča vinavaciać u suviazi z ukrainskimi śpiecsłužbami — jakuju jon kateharyčna abviarhaje. Ale za takoj asablivaj uvahaj moža chavacca i inšaja pryčyna, jakuju my nieŭzabavie zrazumiejem.
Nahadajem, Mikałaja Aŭtuchoviča i šerah źviazanych ź im, na dumku śledstva, ludziej, zatrymali ŭ śniežni-studzieni 2020 hoda. Ułady adrazu abviaścili Aŭtuchoviča arhanizataram i kiraŭnikom «terarystyčnaj hrupoŭki», jakaja dziejničała na terytoryi Hrodzienskaj vobłaści i nibyta padpalvała aŭtamabili i damy supracoŭnikaŭ milicyi. Usiaho pa «spravie Aŭtuchoviča» prachodziać 12 čałaviek.
Mikałaj Aŭtuchovič, abvinavačvajecca pavodle 12 artykułaŭ Kryminalnaha kodeksa, siarod jakich zdrada dziaržavie, sadziejničańnie ŭ terarystyčnaj dziejnaści, niezakonnyja dziejańni ŭ dačynieńni da ahniastrelnaj zbroi i vybuchovych rečyvaŭ, zamach na zachop ułady niekanstytucyjnym šlacham, stvareńnie złačynnaj arhanizacyi, raspalvańnie rasavaj, nacyjanalnaj, relihijnaj varožaści abo varožaści, kantrabanda, akt teraryzmu.
Čytajcie taksama: Dziaržaŭnyja ŚMI: «Aŭtuchoviča mohuć rasstralać». Ci praŭda heta?
