U vyniku bojki zahinuŭ 28-hadovy Vital Hryščyk. Na videa bačna, što pakul jon lažyć na travie, inšy mužčyna nanosić jamu rezkija ŭdary pradmietam, padobnym na nož. Zatym napadnik sychodzić, a paśla viartajecca ź bitaj i pačynaje bić užo joju.

Jak paviedamlaje milicyja, napadnik — 30-hadovy Rusłan Kuźniacoŭ. Pa stanie na ranicu sierady jaho jašče nie znajšli, raspaviali ŭ Vaŭkavyskim RAUS.

«Škada, što dziaŭčynka budzie raści biez baćki»

Pra napadnika Rusłana Kuźniacova viadoma nie šmat. Tolki toje, što jon rodam z Vaŭkavyska i žyvie niedaloka ad miesca złačynstva. Jaho znajomy, ź jakim udałosia pahavaryć, adhukajecca pra jaho niehatyŭna. Jon nie zmoh navat skazać, dzie pracuje Rusłan.

— U jaho byli prablemy z zakonam, — davoli abciakalna adkazvaje surazmoŭca.

Pra zahinułaha Vitala Hryščyka infarmacyi krychu bolš. Naradziŭsia i žyŭ u Vaŭkavysku, pracavaŭ na miascovym miasakambinacie. Mužčyna byŭ žanaty, ź pieršaj žonkaj raźvioŭsia. U jaho zastałasia šaścihadovaja dačka. Siabry zahinułaha kažuć, što Vital byŭ niekanfliktnym čałaviekam, vydatnym siabram.

— Jon byŭ dobrym čałaviekam, viasiołym, spahadlivym. U ciažkija momanty zaŭsiody byŭ hatovy dapamahčy, — raskazvaje adzin ź siabroŭ mužčyny. — I dačku jon lubiŭ, časta zabiraŭ jaje da siabie, nadavaŭ šmat uvahi. Škada, što dziaŭčynka budzie raści biez baćki.

Treciaha mužčynu, jaki na videa lažyć na travie, zavuć Artur. Znajomy mužčyny kaža, što jon mocna paciarpieŭ, ale ciapier znachodzicca doma.

Ci to kanflikt z-za dziaŭčyny, ci to z-za abrazy

Pieradhistoryju taho, što było na videa, dakładna raskazać pakul nie moža nichto. Znajomy Rusłana i Vitala kaža, što ŭsio pačałosia z telefonnaha zvanka.

— Rusłan paklikaŭ ich sustrecca, pahavaryć z voka na voka. Jany pryjechali prosta pahavaryć ź im, a vyjšła toje, što ŭsie bačyli na videa, — tłumačyć naš surazmoŭca.

Byłaja ciešča Vitala, ź jakoj u jaho zachavalisia dobryja adnosiny, kaža, što vierahodnaja pryčyna kanfliktu — dziaŭčyna.

— Była bojka, była «strełka». Nakolki my viedajem, z-za dziaŭčyny, — tłumačyć jana.

A voś śviedka padziej, jakaja dasyłała ŭ redakcyju videa bojki, kaža pra inšuju viersiju.

— Sa słoŭ znajomych, napiaredadni adzin druhoha nazvaŭ «pietušaraj». Jany na niadzielu zabili «strełku», a hety šałaputny doma nožyk prychapiŭ — pierakazvaje čytačka.

Na videa bojki sapraŭdy čuvać, jak napadnik bje adnaho z mužčyn sa słovami: «Ty kaho pieŭniem nazvaŭ?» Ale niezrazumieła, ci było heta pieršapačatkovaj pryčynaj svarki. Niekalki surazmoŭcaŭ taksama vykazvali viersii, što napadnik moh znachodzicca ŭ stanie ałkaholnaha abo narkatyčnaha apjanieńnia.

Клас
1
Панылы сорам
10
Ха-ха
3
Ого
3
Сумна
28
Абуральна
21