Alaksandr Łukašenka i Uładzimir Pucin u Sočy 23 maja. Skrynšot ź videa

Alaksandr Łukašenka i Uładzimir Pucin u Sočy 23 maja. Skrynšot ź videa

«Jość cikavyja niejkija rečy niečakana va Ukrainie. Vy heta vydatna viedajecie. Nas, dy i vas heta pavinna turbavać, što jany (palityki) užo robiać kroki da taho, kab raździalić Ukrainu», — zajaviŭ Łukašenka.

«Nas turbuje toje, što jany hatovyja, — palaki, nataŭcy — vyjści, «dapamahčy» takim čynam zabrać, jak da 1939 hoda, Zachodniuju Ukrainu. Nas heta naściarožvaje nie tolki z punktu hledžańnia siońniašniaj biaśpieki. Heta ich stratehija i pa Zachodniaj Biełarusi. Tamu my vucha trymajem.

I, jak ja kazaŭ, jašče ŭkraincam daviadziecca nas prasić, kab my nie dapuścili adryvu hetaj zachodniaj častki i inšych častak ad Ukrainy. Heta maja takaja pazicyja, ale vy heta dakładna viedajecie», — skazaŭ Alaksandr Łukašenka.

Heta chłuślivyja zajavy. Nasamreč, heta Rasija ŭ 2014 hodzie zachapiła Krym i častku Danbasa, a ŭ 2022-m pasprabavała zachapić Ukrainu całkam, ale zdoleła zaniać tolki častki Chiersonskaj, Zaparožskaj, Danieckaj, Łuhanskaj i Charkaŭskaj abłaściej, bo sutyknułasia z upartym supraciŭleńniem ukraincaŭ. Polšča nie tolki nie pretenduje na ziemli Ukrainy, a akazała hihanckuju dapamohu Kijevu — jak finansavuju, tak i zbroju, a taksama prytuliła na čas vajny miljony žančyn i dziaciej z Ukrainy. Tym nie mienš, rasijskaja prapahanda, a na jaje zahad i biełaruskaja, pušać temu nibyta namieru Polščy zaniać Zachodniuju Ukrainu. Hetaja dezynfarmacyja maje apraŭdać napad Rasii na Ukrainu. Maŭlaŭ, palaki źbiralisia, a my prosta apiaredzili ich. 

Alaksandr Łukašenka nie pieršy raz za apošnija miesiacy hruba absłuhoŭvaje prapahandysckija zapyty Rasii. Raniej abjektam kpinaŭ u Biełarusi i Ukrainie stała jaho zajava ŭ Kramli «a ja vam pakažu, adkul na Biełaruś rychtavaŭsia napad, čatyry pazicyi».

«Tut u nas taksama prablem nie mienš, ale ŭžo nie našych prablem. Ich prablemy, jakija nam pryjdziecca vyrašać. Učarašnija niezrazumiełyja pavodziny ŭ Kijevie prezidenta Dudy. Darečy, jaki praktyčna ničoha nie vyrašaje ŭ Polščy. Zajmajecca hetymi fejkami», — skazaŭ Łukašenka.

Uładzimir Pucin padčas hetaj zajavy torhaŭ nahami i rukami, što charakterna dla jahonych pavodzin u apošni čas.

Taksama Łukašenka zajaviŭ, što ekanomika ŭ Rasii i Sajuznaj dziaržavie na fonie sankcyjnaha cisku niečakana intensiŭna ŭmacoŭvajecca.

«Vielmi važna (vy niejak heta adznačali), što ekanomika ŭ Rasii i naohuł u nas u sajuzie nie prosta ŭmacoŭvajecca, a niečakana intensiŭna ŭmacoŭvajecca. Vaźmicie inflacyju, vaźmicie biespracoŭje. Jano akazałasia mienšym. Padaje ŭzrovień biespracoŭja. Heta dobra. Nu, i rubiel umacoŭvajecca šalonymi tempami. Kab my tut nie pierabrali. Tamu niečakanyja rečy adbyvajucca. Nu, heta dla ich niečakanyja. My ž čakali, što heta budzie. Heta čas mahčymaściaŭ. I jany (Zachad), sami nie razumiejučy taho, nas padšturchnuli zajmacca bolš intensiŭna svajoj ekanomikaj», — skazaŭ jon.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?