Na praciahu voś užo dvuch hadoŭ umovy na Akreścina horšajuć. Biełarusy, jakija trapili ŭ CIP paśla antyvajennych pratestaŭ i vyzvalilisia ŭ sakaviku, kaho adpravili na sutki ŭ krasaviku 2022-ha, raspaviadajuć, što ŭ kamierach na 6 čałaviek trymajuć pa 30-40. Što źniavolenyja časam nie majuć nie tolki pasty, paduški i matraca, ale i tualetnaj papiery ci choć by kavałačka myła.
Prajekt «Tok» pahutaryŭ ź biełarusami, jakija nieadnarazova traplali na sutki. U filmie — historyja Siarhieja Krupieniča, jakoha pratrymali ŭ CIPie 112 sutak zapar, jak i jaho žonku, za pierasyłku paviedamleńniaŭ z ekstremisckich kanałaŭ adno adnamu. Historyja Juli Michajłavaj, jakuju zatrymlivali piać razoŭ, apošni raz razam z maci i bratam.
Raspoviedy pra ŭmovy ŭtrymańnia eks-dacentki MDŁU Natalli Dulinaj, piensijanierki z aktyŭnaj žyćciovaj pazicyjaj Haliny Łahackaj, tarhietołaha Anhieliny Bruckaj, jakaja trapiła na Akreścina zusim niadaŭna, u krasaviku 2022 hoda.
My paraŭnali siońniašniuju situacyju z toj, što była dziesiać hadoŭ tamu, u 2011-m, 2014-m, pahutaryŭšy z suzasnavalnikam Fonda miedycynskaj salidarnaści Biełarusi Andrejem Tkačovym i biznesoŭcam, kolišnim maładafrontaŭcam Ivanam Šyłam.
My raspytali eks-supracoŭnika IČU Mazyra, a siońnia bajpołaŭca Uładzimira Žyhara pra toje, jak uładkavanaja hetaja struktura znutry, chto tam pracuje.
A taksama raspytali psichołaha Natallu Skibskuju pra nastupstvy traŭmatyčnaha dośviedu, pravaabaroncu Paŭła Sapiełku pra maštaby represij u krainie, a historyka Irynu Ramanavu — čamu hetaja nialudskaja sistema katavańniaŭ stała mahčymaj u 2020-m hodzie.
