Jak prachodzić pracedura vakcynacyi?
U kalandar abaviazkovych pryščepak «antyklaščavaja» nie zaniesienaja, ale miedyki rekamiendujuć rabić jaje ŭsim, chto žyvie pobač ź lasami, płanuje vybiracca pa jahady i hryby, časta byvaje ŭ hustazasiejanych parkach, palaŭničym. Taksama zarazicca kleščavym encefalitam možna pry ŭžyvańni syroha, niekipiačonaha kazinaha małaka.
Vakcyny jość jak darosłyja, tak i dziciačyja (da 16 hod). Poŭny kurs uklučaje ŭ siabie dva kampanienty, jakija robiacca ź pierapynkam piać-siem miesiacaŭ, a taksama revakcynacyju praz hod. Paśla hetaha «abnaŭlać» vakcynu dla dziejsnaha vypracoŭvańnia antyciełaŭ suprać uzbudžalnika virusa kleščavoha encefalitu treba budzie kožnyja try hady. Idealna rychtavacca da siezona vosieńniu, ale kali hetaha nie zdaryłasia, možna startavać z kursam vakcynacyi i letam, u tak zvany epidsiezon.
«Na dadzieny momant u nas svabodnyja akiency na pieršuju pryščepku na červień. Vakcyna rasijskaj vytvorčaści — «EnceVir». Pry nieabchodnaści revakcynacyju možna zrabić i praź miesiac, i navat praz dva tydni (ekstranaja prafiłaktyka) — hałoŭnaje mieć na rukach nakiravańnie ad terapieŭta z paćvierdžańniem supraćpakazańniaŭ da vakcynacyi (dla tych, chto robić jaje pieršy raz)», — raskazali ŭ Centry vakcynaprafiłaktyki.
Jaki košt?
Vakcynacyja ad encefalitu dla hrup ryzyki ŭ Biełarusi biaspłatnaja. U jaje ŭvachodziać supracoŭniki lesaŭparadkavalnych arhanizacyj, jakija vykonvajuć pracy na terytoryjach nacyjanalnaha parka «Biełaviežskaja pušča», Biarezinskaha bijaśfiernaha zapaviednika i ŭ inšych enzaatyčnych miescach (dzie naziralisia ŭsploski zachvorvańnia).
Usie astatnija žadajučyja mohuć pryščapicca na płatnaj asnovie.
Na terytoryi Biełarusi ahułam dazvolenyja dla vykarystańnia nastupnyja vakcyny: «EnceVir» i «Klešč-E-VAK» vytvorčaści Rasijskaj Fiederacyi, a taksama «TykaVak» i «TykaVak Džunior» vytvorčaści Pfizer Inc. (ZŠA).
U minskim Centry vakcynaprafiłaktyki (Jakuboŭskaha, 53), naprykład, adna pryščepka «EnceVir» kaštuje 25,75 rubloŭ. Pra najbližejšyja da doma punkty vakcynacyi možna daviedacca ŭ miascovych paliklinikach ci centrach hihijeny i epidemijałohii.
Robiać pryščepku ad kleščavoha encefalitu i ŭ pryvatnych miedcentrach. Naprykład, u «Nardzin» poŭny kurs vakcynacyi «TykaVak» na siońnia kaštuje 96 rubloŭ.
Jano varta taho? Jakaja ŭ vakcyny efiektyŭnaść?
Zhodna z dadzienymi Respublikanskaha centra hihijeny, epidemijałohii i hramadskaha zdaroŭja, štohod u Biełarusi rehistrujecca bolš za dźvie tysiačy vypadkaŭ chvaroby Łajma i kala 100 vypadkaŭ kleščavoha encefalitu. Pryčym u suviazi z paciapleńniem pieršyja vypadki ŭkusaŭ rehistrujucca ŭžo ŭ lutym.
Kaniečnie, abaranić siabie ad klaščoŭ i ich infiekcyi možna roznymi «narodnymi» sposabami: nasić u lasach zakrytaje adzieńnie, karystacca repielentami, jakija adpužvajuć členistanohich, pravodzić samaahlad paśla naviedvańnia lasoŭ i parkaŭ, uvažliva ahladać chatnich žyvioł, nie pić syroha kazinaha małaka.
Čym mienš klešč znachodzicca na čałavieku, tym mienšaja imaviernaść, što jon zaniasie infiekcyju. Ličycca, što kali klešč prasiadzieŭ na vas mienš za 24 hadziny, niebiaśpieka małaja.
Kaniečnie, kali kantakt zdaryŭsia, u paliklinicy prapanujuć prafiłaktyčnaje lačeńnie — pryznačać pryjom antybijotykaŭ. Ale samaj nadziejnaj abaronaj ad encefalitu miedyki nazyvajuć mienavita pryščepku.
U kamientaryi «Našaj Nivie» minski epidemijołah adznačyŭ, što siarod pryščeplenych ludziej zaražeńniaŭ u ich praktycy nie nazirałasia.
Ale važna, kab druhaja pryščepka była zroblenaja za dva tydni da vyjezdu ŭ rajon, dzie mahčymaja imaviernaść sustrečy z klaščom, inakš imunitet nie paśpieje vypracavacca.
Čytajcie taksama:
Minzdaroŭja: Situacyja z COVID-19 stabilizavałasia, zvodki ciapier buduć raz na miesiac
