Prezident Rasii paabiacaŭ siońnia padpisać ukaz ab dapamozie siemjam vajskoŭcaŭ, jakija zahinuli na vajnie va Ukrainie, i bolšuju častku svajho karotkaha vystupu pryśviaciŭ apraŭdańniu napadu.

«Rasija dała papiaredni adpor ahresii, heta było adzinaje pravilnaje rašeńnie, — skazaŭ Pucin. — Hibiel kožnaha sałdata — heta hora dla nas usich, zrobim usio, kab dapamahčy siemjam i dzieciam vajskoŭcaŭ, jakija zahinuli va Ukrainie».

Rasijskim vojskam nie ŭdałosia da 9 maja zachapić Danieckuju i Łuhanskuju vobłaści Ukrainy. 

Učora abaroncy Maryupala dali pres-kanfierencyju ŭ žyvym efiry, paśla čaho stała niemahčymym abviaščeńnie i pra ŭziaćcie Maryupala. 

U kancy sakavika rasijskija vojski byli vymušanyja adstupić z poŭnačy Ukrainy. Za dva z pałovaj miesiacy vajny rasijanam udałosia zaniać tolki adzin abłasny centr Ukrainy — Chierson. Siońnia rasijskija vojski sabrali ŭ hetym horadzie niekalki dziasiatkaŭ čałaviek na šeście «Nieśmiarotnaha pałka».

Źviarnuła ŭvahu admiena pavietranaha paradu ŭ roznych haradach Rasii. U minułym hodzie samaloty pralacieli, niahledziačy na doždž. Sioleta pralot avijacyi admienieny «ŭ suviazi z kiepskim nadvorjem». 

Pryčym nie tolki ŭ stalicy, ale i ŭ Pieciarburhu, Murmansku, Jekaciarynburhu, Rastovie-na-Donie, Kalininhradzie i Samary.

Raniej mierkavałasia, što nad Maskvoj pralacić samalot, abstalavany pad punkt kiravańnia Rasijaj na vypadak jadziernaj vajny. 

Mahčyma, admiena pavietranaha paradu tłumačycca tym, što Rasija nie zdoleła dabicca poŭnaha panavańnia ŭ pavietry nad Ukrainaj i straciła dziasiatki samalotaŭ i viertalotaŭ. U apošnija dni ŭkraincy nanieśli šerah adčuvalnych pavietranych udaraŭ pa pazicyjach rasijskich vojskaŭ.

U svaju čarhu, prezident Ukrainy Uładzimir Zialenski zapisaŭ svoj zvarot da Dnia Pieramohi na Chryščaciku, pieraharodžanym procitankavymi vožykami.

Ën nazvaŭ siońniašniaha voraha Ukrainy «sumieśsiu ardy i nacyzmu». 

«My zmahajemsia za svabodu dla svaich dziaciej, a značyć, pieramožam. My nikoli nie zabudziem toje, što zrabili našy prodki ŭ Druhoj suśvietnaj vajnie, u jakoj zahinuła bolš za vosiem miljonaŭ ukraincaŭ. I zusim chutka va Ukrainie buduć dva Dni Pieramohi. A ŭ kahości nie zastaniecca ni adnaho, — skazaŭ Zialenski.

— Pieramahli tady. Pieramožam i ciapier. I Chryščacik ubačyć parad Pieramohi — Pieramohi Ukrainy! Z Dniom Pieramohi nad nacyzmam! Słava Ukrainie!»

Učora Zialenski ŭdzielničaŭ u videasamicie «Vialikaj siamiorki», a siońnia, jak čakajecca, prezident ZŠA padpiša zakon ab lend-lizie dla Ukrainy — hety instrumient dapamohi ŭ svoj čas dapamoh pieramahčy hitleraŭskuju Hiermaniju.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?